လါနိၣ်၀့ဘၢၣ် ၁ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ်အပူၤ ခီဖျိပယီၤသုးခးလီၤနါစိၤကျိဖးဒိၣ် လၢဒူသ၀ီပူၤအဃိ ဘၣ်သံ၀ဲကမျၢၢ်တဂၤဒီး လီၢ်က၀ီၤကမျၢၢ်(၃၀၀၀)ဘျဲၣ်ဘၣ်ဃ့ၢ်ပလဲၥ်သးလၢတၢ်ဘံၣ်တၢ်ဘၢလီၢ်အဂ့ၢ်န့ၣ် ကီၢ်ရ့ၣ်တၢ်ကစီၣ်ဒီးတၢ်ဘိးဘၣ်ရၤလီၤထုးထီၣ်ပၥ်ဖျါ၀ဲဖဲတနံၤအံၤလါနိၣ်၀့ဘၢၣ် ၁ သီအံၤန့ၣ်လီၤ.
ဖဲလါအီးကထိဘၢၣ် ၃၀ သီ ဟါခီ ၅ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးခီၣ်ချ့သုးရ့ၣ်(ခမရ-၂၃၁)သုးရ့ၣ်စုတီၤဖီလၥ် အမျိၥ်သုးကလၢၤခးလီၤတပျုၥ်တပျီၥ်၀ဲ(ဟီၤ၀့ၤစၤ) Howitzer ကျိဖးဒိၣ် ၂၄ ဖျၢၣ်လီၤတဲၥ်ပိၢ်ဖးထီၣ်၀ဲလၢ ယ့ၤပူၤကၠံသ၀ီ, ကီၢ်၀ါလဲ,နီၤတမၤ ဒီး၀့ပၠၣ်သ၀ီသ့ၣ်တဖၣ်အံၤအချၢအဃိ ဘၣ်သံ၀ဲယ့ၤပူၤကၠံသ၀ီဖိ မါကၠီၤစွၤအူ(၄၇)နံၣ်အံၤအဂ့ၢ်န့ၣ် လံၥ်တၢ်ပၥ်ဖျါအပူၤစံး၀ဲန့ၣ် လီၤ.
ဒ်လံၥ်တၢ်ထုးထီၣ်ပၥ်ဖျါပူၤပၥ်ဖျါ၀ဲအသိးန့ၣ် လီၢ်က၀ီၤဖဲန့ၣ်အပူၤတၢ်ဒုးကဲထီၣ်တအိၣ်၀ဲဘၣ်ဒီး ဘၣ်ဆၣ်သုးကီၣ်ကး အမျိၥ်သုးကလၢၤအံၤညီနုၢ်န့ၣ်ခးလီၤနါစိၤ၀ဲကျိဖးဒိၣ်ကအိၣ်လၢကိးမုၢ်နံၤဒဲးဃၣ်ဃၣ်ညါအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါအီးကထိဘၢၣ် ၂၈ သီ ဒီး ၂၉ သီအနံၤန့ၣ်စ့ၢ်ကီး သုးကီၣ်ကးအမျိၥ်သုးကလၢၤတဒူၣ်ဃီ၀ဲအံၤ ခးလီၤ၀ဲ(ဟီၤ၀့ၤစၤ)ကျိဖးဒိၣ်တဖၣ်ဆူယ့ၤပူၤကၠံကရူၢ် ယ့ၤပူၤကၠံသ၀ီပူၤအဃိ ဘၣ်ဟးဂီၤ၀ဲသ၀ီဖိအဟံၣ်(၂)ဖျၢၣ်,ဘုဖီဃုၥ်ဒီး တၢ်ထူၣ်တၢ်ဘိတဖၣ်ဟးဂီၤ၀ဲအသိးဆၣ်ဖိကီၢ်ဖိစ့ၢ်ကီးသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ဘၣ်သ့ၣ်ညါဘၣ်န့ၣ်လီၤ.
တကတီၢ်ဃီသုးကီၣ်ကးအမျိၥ်သုးကလၢၤအံၤခီဖျိခးလီၤ၀ဲကျိဖးဒိၣ်တလီၢ်လီၢ်ဆူဒူသ၀ီပူၤအဃိ တကီၢ်ခါခဲအံၤ ယ့ၤပူၤကၠံသ၀ီဖိ ကမျၢၢ်ပၥ်ဖှိၣ်ခဲလၢၥ်(၃၇၄၀)ဂၤ ဘၣ်ဟးဃ့ၢ်ပလဲၥ်သးလၢတၢ်ဘံၣ်တၢ်ဘၢလီၢ်အဂ့ၢ်န့ၣ် ကီၢ်ရ့ၣ်တၢ်ကစီၣ်ဒီး တၢ်ဘိးဘၣ်ရၤလီၤ အပူၤ ပၥ်ဖျါ၀ဲန့ၣ်လီၤ.
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်အပူၤ သုးကီၣ်ကးအသုးကလၢၤလၢအိၣ်ဆီလီၤသးဖဲဟီၣ်က၀ီၤအပူၤသ့ၣ်တဖၣ် တၢ်ဒုးကဲထီၣ် အိၣ်ဂ့ၤတအိၣ်ဂ့ၤ အ၀ဲသ့ၣ်အံၤသူ၀ဲဒၣ်ကဘီယူၤ,ကျိဖးဒိၣ်ပညိၣ်ခးလီၤတၢ်ဆူလီၢ်က၀ီၤကမျၢၢ်ဒူသ၀ီ, တၢ်ဖံးအီၣ်မၤအီၣ်လီၢ်ကျဲ တလီၢ်လီၢ်ဒီးမၤကမၣ်၀ဲပှၤဟီၣ်ခိၣ်ဖိခွဲးယၥ်အဃိ ပှၤကမျၢၢ်ဘၣ်သံဘၣ်ဒိဘၣ်ထံးကဲထီၣ်သးအိၣ်၀ဲခဲအံၤခဲအံၤ အသိး ဟံၣ်ဃီ, တၢ်ဆါဟံၣ်,ကၠိ,တၢ်ဘူၣ်တၢ်ဘါတၢ်သူၣ်ထီၣ်သ့ၣ်တဖၣ်စ့ၢ်ကီးဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
