လါနိၣ်ဝ့ဘၢၣ် ၂၀သီ, ၂၀၂၄နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်, တး(ခ်)ကီၢ်ရ့ၣ်,မဲၢ်ဆီးဟီၣ်ကဝီၤ, ထၣ်စဲၤလူၣ်ဝၢၣ်,၇၀ (ရဲၣ်)တၢ်လီၢ်န့ၣ် တၢ်ကဲထီၣ်သးလၢ ပှၤကီၢ်ပယီၤဖိလၢအမ့ၢ် အီၣ်ကိၣ်ကိၣ် တဂၤဘၣ်တၢ်မၤသံအီၤဒီး ပှၤဖီၣ်မၤသံတၢ်န့ၣ်မ့ၢ်ဝဲ (BGF) သုးဖိသ့ၣ်တဖၣ်အဂ့ၢ် ကၠီၣ်တဲၣ်သုးစံးဘၣ်ဝဲ ကၠီၣ်တဲၣ်တၢ်ကစီၣ်သန့ Manager Online ဖဲ လါနိၣ်ဝ့ဘၢၣ် ၁၅သီအနံၤန့ၣ်လီၤ.
ဒ်ကၠီၣ်တဲၣ်တၢ်ကစီၣ်သန့ Manager Onlineပၥ်ဖျါဝဲဒၣ်အသိးန့ၣ် ကၠီၣ်တဲၣ်သုး ခၠဖီၣ်ကံး ရၣ်ခၠါမနူ 431,ဖီၣ်ဒီးသမံသမိးဝဲ အီၣ်ကိၣ်ကိၣ်အံၤဝံၤဒီးပျၢ်လီၤက့ၤဝဲဒၣ်အဂ့ၢ်, ပျၢ်လီၤက့ၤဝဲဝံၤအလီၢ်ခံ (BGF)လၢအအိၣ်ဆီလီၤသးဖဲ တၢ်လီၢ်(၇၀ ရဲၣ်) (၁၅)ဂၤဖီၣ်အီၤဒီး စံးဝဲလၢအီၣ်ကိၣ်ကိၣ်အံၤမ့ၢ်ဝဲ ကၠီၣ်တဲသုးတၢ်မဲၥ်ချံအဃိမၤသံကွံၥ်ဝဲဝံၤဟဲကွံၥ်လီၤဝဲဆူကီၢ်ကၠီၣ်တဲၣ်တပၤအဂ့ၢ် ကၠီၣ်တဲၣ်သုးတကပၤပၥ်ဖျါဝဲဒၣ်န့ၣ်လီၤ.
လၢတၢ်ဂ့ၢ်ဝဲအံၤအဖီခိၣ်န့ၣ် တၢ်လီၢ်ဝဲန့ၣ်လၢပယီၤကီၢ်တကပၤန့ၣ်မ့ၢ်ဝဲ Myawaddy complex,မဲးပူၣ်(သဲပုံ)Heng Sheng Cacino တၢ်လီၢ်ဒီးဖဲန့ၣ်သုးခိၣ်မီၣ်သိးအပှၤလၢအိၣ်ခိး ခၣ်စံၣ်နိၣ်အိၣ်ဘၣ်ဆၣ် လၢသူမွဲကျိဝၢ်ဘးခီတပၤန့ၣ်တလဲၤခီဝဲဒၣ်ဘၣ်အဂ့ၢ် (BGF)ဒုးယၤဟီၣ်ကဝီၤနီၣ်ဂံၢ်(၂)အဒုးယၤခိၣ် သုးခိၣ်ဒိၣ်စိစီၤတ့ၤဝ့ စံးဘၣ်ဝဲဒၣ် ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“မ့ၢ်အိၣ်ဘူးဒီးခၣ်စံၣ်နိၣ်န့ၣ် ကမ့ၢ်ဝဲ မဲးပူၣ်(သဲပုံ)ဟ့ရှ့ Heng Sheng cacinoန့ၣ်လီၤ.မ့မ့ၢ်တၢ်လီၢ်ဖဲန့ၣ် န့ၣ်သုးခိၣ်မီၣ်သိးအပှၤအိၣ်ခိးခၣ်စံၣ်နိၣ်အိၣ်လီၤ.နၥ်က့လၢထံဝၢ်ဘးခီတပၤန့ၣ်တအိၣ်ဘၣ်.အအိၣ်ခိးတၢ်လၢခၣ်စံၣ်နိၣ်လီၤ.လၢန့ၣ်ပၤန့ၣ်တအိၣ်ဘၣ်.လၢအပူၤကွံၥ်ကီၢ်ဆၢဟီၣ်ကဝီၤတၢ်မ့ၢ်ကဲထီၣ်သးဒ်သိးပှၤဟုၣ်သိလ့ၣ်ဟဲဆူကီၢ်ပယီၤန့ၣ်ကၠီၣ်တဲၣ်သုးဆဲးကျိးပှၤပလူၤဃုစၢၤအဝဲသ့ၣ်ဒီးပမ့ၢ်ထံၣ်န့ၣ်အဝဲသ့ၣ်ဟဲဟံးန့ၢ်က့ၤဝဲအိၣ်န့ၣ်လီၤ.ဘၣ်ဆၣ်တၢ်ဂ့ၢ်တခါအံၤတဟဲဆဲးကျိးပှၤဘၣ်.တၢ်တခါအံၤတဲတဘၣ် ဘၣ်. ”အဂ့ၢ်စံးဝဲဒၣ်န့ၣ်လီၤ.
ဒ်ကၠီၣ်တဲသုးပၥ်ဖျါဝဲဒၣ်အသိးန့ၣ် (BGF)လၢအမၤသံ အီၣ်ကိၣ်ကိၣ်န့ၣ်မ့ၢ်ဝဲဒၣ် (BGF)သုးရ့ၣ်(၁၀၂၂)ဒီးဟဲအိၣ်ဆီလီၤသးဖဲတၢ်လီၢ်ဝဲန့ၣ်ပှၤကညီ(၁၅)အဂ့ၢ်ပၥ်ဖျါဝဲဒၣ်န့ၣ်လီၤ.(BGF) (၁၀၂၂) အံၤဘၣ်တၢ်တီခိၣ်ရိၣ်မဲအီၤလၢ သုးခိၣ်မီၣ်သိးအဃိဒ်သိးကသ့ၣ်ညါအါထီၣ်ဘၣ်တၢ်ဂ့ၢ်ဝဲအံၤအဂီၢ်ကညီကွဲၤလ့လိၤဆဲးကျိးသံကွၢ်ဒီးသုးခိၣ်မီၣ်သိးအဖၢမုၢ်အဂ့ၢ်ဒုးသ့ၣ်ညါဘၣ်ပှၤဒိကနၣ်တၢ်ဖိကိးဂၤဒဲးန့ၣ်လီၤ.
ခီဖျိလၢဖဲအပူၤကွံၥ်လါနိၣ်ဝ့ဘၢၣ် ၁၄သီအနံၤန့ၣ် Fortify Right ဃ့ထီၣ်ဝဲကၠီၣ်တဲၣ်ပဒိၣ်ဒ်သိး ကဃုထံသမံသမိးဟံးန့ၢ်ဝဲ ကၠီၣ်တဲၣ်သုးဖိလၢအပၣ်ဃုၥ်ပၣ်ဂီၢ်လၢ အီၣ်ကိၣ်ကိၣ် အတၢ်သံဘျီဝဲအံၤအရ့အဖီခိၣ် ကၠီၣ်တဲၣ်သုးတကပၤ ပၥ်ဖျါထီၣ်က့ၤဝဲလၢပှၤမၤသံတၢ်န့ၣ်မ့ၢ်ဝဲ(BGF)သုးဖိသ့ၣ်တဖၣ်န့ၣ်လီၤ.
ဒ် Fortify Right အတၢ်ဃ့ထီၣ်အိၣ်ဝဲအသိးန့ၣ် အီၣ်ကိၣ်ကိၣ် (၃၇)နံၣ်အံၤန့ၣ် ဘၣ်တၢ်ဖီၣ်မၤဒၢၣ်မၤလိၥ်အီၤလၢကၠီၣ်တဲၣ်သုးခိးကီၢ်ဆၢ(၄)ဂၤအဃိ ဖဲအပူၤကွံၥ်လါယနူၤအါရံၤ(၁၂)သီအနံၤန့ၣ်သံကွံၥ်ဝဲဒၣ်ဒီးအခဲအံၤပှဲၤထီၣ် အလါ(၁၀)ဘျဲၣ်လံဘၣ်ဆၣ် တၢ်ဃုထံၣ်သ့ၣ်ညါဝဲပှၤလၢမၤကမၣ်တၢ်တန့ၢ်ဒံးဘၣ်ဒီး သမံသမိးစံၣ်ညီၣ်ဝဲန့ၢ်ထဲပှၤလၢထံၣ်ဘၣ် တၢ်မၤဒၢၣ် အီၣ်ကိၣ်ကိၣ် လၢမဲၥ် ပှၤကီၢ်ဖိတဂၤလၢအမ့ၢ် စံၤရၤခၠူၣ် ၂၄နံၣ်တဂၤန့ၣ အဖီခိၣ် ကဲထီၣ်ဝဲဒၣ်တၢ်သံကွၢ်ဖးဒိၣ်တခါအဂ့ၢ် Fortify Right လံၥ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ.
တၢ်လီၢ်လၢအဘူးဒီးတၢ်ထံၣ်န့ၢ် အီၣ်ကိၣ်ကိၣ်အစိၣ် န့ၣ် ကၠီၣ်တဲၣ်ကိးဝဲဒၣ်လၢ (၇၀ ရဲၣ်) ဒီး လၢသမွဲကျိဝၢ်ဘးခီကီၢ်ပယီၤတကပၤန့ၣ်အိၣ်ဘူးဒီးMyawaddy complex,မဲးပူၣ်(သဲပုံ)Heng Sheng Cacinoန့ၣ်လီၤ. လၢအပူၤကွံၥ် ၁၉၉၄)လါယူၤလံအကတီၢ်ခီဖျိတၢ်စူၤဒီးထံအီၣ်ဝးတရံးဟီၣ်ခိၣ်အဃိ ပယီၤတပၤဟဲဆီလီၤဝဲဒၣ်အနီၣ်တယၢ်ဖဲတၢ်လီၢ်ဝဲန့ၣ်ဒီး(BGF) ဟဲအိၣ်ဆီလီၤသးဖဲန့ၣ်အဂ့ၢ်ကၠီၣ်တဲၣ်သုးတကပၤစံးဝဲဒၣ်ဘၣ်ဆၣ် (BGF)သုးဖိလၢကလဲၤအိၣ်ဆီလီၤသးလၢသူမွဲကျိဝၢ်ဘးခီန့ၣ်တအိၣ်ဘၣ် (BGF)တကပၤစံးဝဲဒၣ်န့ၣ်လီၤ.
