လါနိၣ်၀့ဘၢၣ် ၅ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ အပူၤကွံၥ်စှၤသီအခါ ခီဖျိပယီၤသုးကျိၤ နုၥ်လီၤဒီးတၢ်ဒုးကဲအဖီခိၣ် ကရူၢ်(၃)ဘ့ၣ်ကမျၢၢ်လၢအဃ့ၢ်ထီၣ်တဖၣ်တကီၢ်ခါခဲအံၤက့ၤဆူအဒူသ၀ီအဟံၣ်အဃီလံအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံး၀ဲန့ၣ်လီၤ.
ဖဲလါအီးကထိဘၢၣ် ၃၀ သီတုၤလၢတလါအံၤလါနိၣ်၀့ဘၢၣ် ၃ သီအနံၤန့ၣ် ပယီၤသုးကျိၤနုၥ်လီၤ၀ဲဒၣ်လၢကၠဲးထိၣ်ကီၢ်ဆၣ် ၀ီၢ်ကျီၢ်, ဖွ့ဖူကၢ်,ဆီသုးခံကရူၢ်(၃)ဘ့ၣ်အံၤအပူၤတကးဒံးဘၣ် တၢ်ဒုးကဲထီၣ်စ့ၢ်ကီး၀ဲလၢပယီၤသုးဒီးဟီၣ်က၀ီၤ(KNLA)သုးရ့ၣ် ၃ သုးပၥ်ဖှိၣ်အဘၢၣ်စၢၤ ကအိၣ်လၢကိးမုၢ်နံၤဒဲးအဃၣ်ဃၣ်အဃိ ကရူၢ်(၃)ဘ့ၣ်ပူၤ သ၀ီ(၁၇)ဖျၢၣ် ကမျၢၢ်တဖၣ်ဘၣ်ဃ့ၢ်ထီၣ်၀ဲ ခဲလၢၥ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဆၣ်ဖဲမဟါလါနိၣ်၀့ဘၢၣ် ၄ သီအနံၤန့ၣ် ပယီၤလၢအနုၥ်လီၤဟူးဂဲၤတဖၣ်အံၤတၢ်ခိးခးအ၀ဲသ့ၣ်ကိးမုၢ်နံၤဒဲးတၢ်သံတၢ်ဘၣ်ဒိ ဘၣ်ထံးအိၣ်အဖီခိၣ် အ၀ဲသ့ၣ်က့ၤလီၤကဒါဆူ(သ့ၤစယၣ်)တကပၤလံအဃိ ဒူသ၀ီကရူၢ်(၃)ဘ့ၣ်အံၤကမျၢၢ်တဖၣ်က့ၤဆူ အဟံၣ်အဃီလံအဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်- ကညီတၢ်ကစီၣ်ဒ်အံၤန့ၣ်လီၤ.
“ပှၤကမျၢၢ်ဃ့ၢ်ထီၣ်ခဲအံၤန့ၣ် မ့မ့ၢ်၀ီၢ်လၢကျီၢ်ကရူၢ်န့ၣ်သ၀ီ(၄)ဖျၢၣ်, ဖွ့ဖူကၢ်ကရူၢ်န့ၣ်သ၀ီ(၄)ဖျၢၣ်, မ့မ့ၢ်လၢဆီသုးခံကရူၢ်န့ၣ် သ၀ီ(၉) ဖျၢၣ်. မ့မ့ၢ်လၢဆီသုးခံကရူၢ်ခီန့ၣ်ပှၤစံၣ်အါတစဲး. ဖဲလါထီၣ်(၄)သီအနံၤန့ၣ် ပယီၤသုးန့ၣ်က့ၤလီၤတုၤလၢ(သ့ၣ်စယး)လံ. ပယီၤက့ၤလီၤလၢၤဘျီပှၤကမျၢၢ်က့ၤလၢအစံၣ်ထီၣ်တဖၣ်န့ၣ်က့ၤလီၤအိၣ်လၢအသ၀ီလၢၤလံ”အဂ့ၢ်န့ၣ် စံး၀ဲန့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် ကရူၢ်(၃)ဘ့ၣ်ပူၤ ဒူသ၀ီလၢအဃ့ၢ်ထီၣ်သ့ၣ်တဖၣ်န့ၣ်မ့ၢ်၀ဲ ဖွ့ဖူကၢ်,ပနွဲၢ်လူၢ်, ကဆီပူၤ, ကူၤကူ,ကၠီၣ်တါလ့, မဲယိလ့,အ့ကဘိၤ, မဲးရူၢ်ခံ,လၢၢ်ပူၣ်,၀ီၢ်ကျီၢ်သ၀ီ ဃုၥ်ဒီးဒူသ၀ီလၢအဂၤပၥ်ဖှိၣ်ခဲလၢၥ်သ၀ီ(၁၇)ဖျၢၣ် ပှၤနီၣ်ဂံၢ်(၅၄၀၀)ဘျဲၣ်ဘၣ်ဃ့ၢ်ထီၣ်ဟးပလဲၥ်သးကဲထီၣ်ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤကရူၢ်(၃)ဘ့ၣ်ပူၤကမျၢၢ်တဖၣ်က့ၤကဒါလၢအဟံၣ်အဃီအဒူသ၀ီလံဘၣ်ဆၣ် မ့မ့ၢ်လၢဖွ့ဖူကၢ်ကရူၢ်ပူၤကမျၢၢ်ခီန့ၣ် ဘၣ်ယိၣ်လၢတၢ်ဒုးကကဲထီၣ်ကဒါအဃိအ၀ဲသ့ၣ်အိၣ်၀ဲတဘူၣ်ဒံးဘၣ်အဂ့ၢ်န့ၣ် ကမျၢၢ်လၢအိၣ်ဘူးဖဲန့ၣ်တဂၤစံး၀ဲန့ၣ်လီၤ.
“ခဲအံၤပှၤကမျၢၢ်ဟဲက့ၤတနီၤဒံးလီၤ,လၢထးခီညါဟဲက့ၤလီၤလၢၥ်လံ.ဆီသုးခံကရူၢ်ဒီးလၢၢ်ပူၣ်န့ၣ်ဟဲက့ၤလီၤလၢၥ်လံ..မ့မ့ၢ်လၢဖွ့ဖူကၢ်ကရူၢ်ခီန့ၣ်ပှၤသ၀ီဖိဟဲက့ၤလၢအဟံၣ်တခဲလၢၥ်ဒံးဘၣ်.အိၣ်ဒၣ်က့ၤကွၢ်ဟံၣ်လၢပိၥ်ခွါစှၤကိၥ်ဂၤလီၤ.အ၀ဲသ့ၣ်က့ၤကွၢ်ဟံၣ်၀ံၤဟဲက့ၤစံၣ်ထီၣ်ကဒါဘၣ်ယိၣ်၀ဲလၢတၢ်ဒုးကကဲထီၣ်ကဒါအဃိဟဲက့ၤအိၣ်၀ဲတဘူၣ်ဒံးဘၣ်ဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ကၠဲးထိၣ်ကီၢ်ဆၣ်ပူၤ စးထီၣ်ဖဲလါအီးကထိဘၢၣ် ၃၀ သီ ဂီၤခီအဆၢကတီၢ်န့ၣ် ခီၣ်သုးရ့ၣ်(ခလရ-၉၆)သုးရ့ၣ် သုးဂံၢ်ဘါကအိၣ်လၢ (၁၀၀)ဘျဲၣ်အံၤ စးထီၣ်နုၥ်လီၤ၀ဲလၢ၀ီၢ်ကျီၢ်ကရူၢ်ပူၤ တၢ်ဒုးကဲထီၣ်တကးဒံးဘၣ်ဒွဲၣ်အူကွံၥ်ဟံၣ်တၢ်သူၣ်ထီၣ်တဖျၢၣ်အသိး ဖဲလါနိၣ်၀့ဘၢၣ် ၂ သီအနံၤစ့ၢ်ကီး တၢ်ဒုးဆဲးကဲထီၣ်လၢပနွဲၢ်လူၢ်သ၀ီဃၢၤဒီးပယီၤသုးခးလီၤကျိဖးဒိၣ်အဃိ သ၀ီဖိအဟံၣ်ဟးဂီၤ၀ဲ တဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
