လါနိၣ်၀့ဘၢၣ် ၂ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဘုသိၣ်ကီၢ်ဆၣ်အပူၤ ခီပူးပယီၤသုးကလၢၤလၢအိၣ်ဆီလီၤသး န့ၢ်(၃၀)ဘျဲၣ်အံၤ ဖဲအပူၤကွံၥ်စှၤသီအခါ(KNLA)သုးပၥ်ဖှိၣ်ထီၣ်မၤန့ၢ်ကွံၥ်၀ဲဒီး တၢ်ဒုးဘျီ၀ဲအံၤအပူၤတၢ်မၤန့ၢ်၀ဲကျိချံပှၥ်သၣ် အါအါ ဂီၢ်ဂီၢ် အဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပၥ်ဖျါ၀ဲဖဲမဟါလါနိၣ်၀့ဘၢၣ် ၁ သီအနံၤန့ၣ်လီၤ.
ခီပူးပယီၤသုးကလၢၤလၢအိၣ်ဆီလီၤသးဖဲဘုသိၣ်ကီၣ်ဆၣ်ပူၤအံၤ ဖဲလါအီးကထိဘၢၣ် ၃၀ သီအနံၤန့ၣ် ဟီၣ်က၀ီၤကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ထီၣ်မၤန့ၢ်ကွံၥ်၀ဲဒီး ဖဲန့ၣ်တၢ်မၤန့ၢ်ကျိဖးဒိၣ်,ကျိဖိ,ကျိချံပှၥ်သၣ်အါအါဂီၢ်ဂီၢ်အမဲၥ်ညါဒုၣ်ဒါ တကပၤစ့ၢ်ကီးသံဘၣ်ဒိဘၣ်ထံး အိၣ်၀ဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်မုၢ်တြီၢ်တၢ်ကစီၣ်လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် ခီပူးတၢ်ဒုးအပူၤကျိချံပှၥ်သၣ်လၢတၢ်ပၢၢ်ဆၢသုးပၥ်ဖှိၣ်မၤန့ၢ်၀ဲသ့ၣ်တဖၣ် န့ၣ်မ့ၢ်၀ဲ (၆၀ မမ) ၁၁ ခိၣ်, (၆၀ မမ)အချံ ၁၃ ဖျၢၣ်, RPG7 (၃)ခိၣ်, RPG7အချံ(၅)ဖျၢၣ်, (၈၁ မမ) ၁ ခိၣ်, K3 (၉)ခိၣ်, ချံးမ့ၣ်ပိၢ်(၁)ဘ့ၣ်, တိၤပံၤတိၤ(၁၉)ဘိၣ်, ၁၆ မ့ၣ်ပိၢ်(၁၆)ဖျၢၣ်, ၁၄ မ့ၣ်ပိၢ်(၁၀)ဖျၢၣ်, ၁၄ တဲးဘိ(၉)ဖျၢၣ်, စဲးကတိၤတၢ်(၂)ဖျၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးတၢ်ဒုးဘျီ၀ဲအံၤအပူၤ ပယီၤသုးတကပၤသံဘၣ်ဒိဘၣ်ထံး၀ဲဒၣ်အါမးဒီး တနီၤန့ၣ်စံၣ်ဖျိးထီၣ်ကွံၥ်လၢသုးကလၢၤ ပူၤအိၣ်အဃိဘၣ်ဃးတၢ်သံတၢ်ဘၣ်ဒိဘၣ်ထံးအနီၣ်ဂံၢ်စရီန့ၣ်တၢ်မၤလီၤတံၢ်အီၤတန့ၢ်ဒံး၀ဲဘၣ်အဂ့ၢ်လံၥ်တၢ်ပၥ်ဖျါပူၤစံး၀ဲအသိး သုးကလၢၤအံၤသုးဂံၢ်ဘါကအိၣ်(၁၀၀)ဃၣ်ဃၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲန့ၣ်လီၤ.
တကးဒံးဘၣ်လၢတၢ်ကထီၣ်န့ၢ်၀ဲသုးကလၢၤအံၤအဂီၢ် (သုးက့ ၅)အပှၤသုးပၥ်ဖှိၣ်ထီၣ်က၀ီၤခးဒီၣ်တဲၥ်ကွံၥ်၀ဲကျဲဒီး တၢ်အီၣ်တၢ်အီအကျိၤ ကအိၣ်လၢ(၄)လါဃၣ်ဃၣ်လံအသိး လၢသုးကလၢၤအံၤအဃိကဲထီၣ်တၢ်ကီတၢ်ခဲလၢလီၢ်က၀ီၤကမျၢၢ် အဂီၢ်ဖဲ အ၀ဲသ့ၣ်လဲၤက့ၤဖံးမၤတၢ်အခါအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
ခီပူးသုးကလၢၤအံၤစးထီၣ်ဟဲအိၣ်ဆီလီၤသးလၢ(သုးက့ ၅)ဟီၣ်က၀ီၤပူၤဖဲ(၁၉၉၂)နံၣ် န့ၢ်၀ဲဒၣ်(၃၂)နံၣ်ဃၣ်ဃၣ်လံဒီး မ့ၢ်စ့ၢ်ကီးသုးကလၢၤတဖျၢၣ်လၢအရ့ဒိၣ်၀ဲသုးကီၣ်ကးအဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်ဟီၣ်က၀ီၤအပူၤ ပယီၤသုးကလၢၤဟဲအိၣ်ဆီလီၤသး ပၥ်ဖှိၣ် ခဲလၢၥ်အိၣ်၀ဲ(၇၂)ဖျၢၣ်ဒီး သုးဟံန့ၢ်တၢ်စိတၢ်ကမီၤ၀ံၤလီၢ်ခံ ပယီၤသုးကလၢၤလီၤမ့ၢ်ကွံၥ်ခီဖျိလၢတၢ်ပၢၢ်ဆၢ သုးပၥ်ဖှိၣ်ထီၣ်မၤန့ၢ်၀ဲ မ့ၢ်ဂ့ၤ,အ၀ဲသ့ၣ်ကၢတီၢ်ကွံၥ်၀ဲမ့ၢ်ဂ့ၤ သုးကလၢၤလီၤမၢ်ကွံၥ်၀ဲ(၆၀)ဖျၢၣ်ဒီး ခဲအံၤတၢ်ထီၣ်န့ၢ်ကဒီး၀ဲခီပူးသုးကလၢၤတဖျၢၣ် လံအဃိ ဟီၣ်က၀ီၤပူၤ သုးကလၢၤအိၣ်တ့ၢ်က့ၤထဲ(၁၁)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
