လါနိၣ်ဝ့ဘၢၣ် ၂၂ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဒူပျၥ်ယၥ်ကီၢ်ရ့ၣ်,ကီးတရံးကီၢ်ဆၣ်ဟီၣ်ကဝီၤအပူၤပှၤလီၢ်အိၣ်ကမှံဖိလၢအိၣ်ဆိးကစၢၢ်က လိပှၢ်လၢ်ကျါသ့ၣ်တဖၣ်မ့ၢ်လၢတၢ်ဆီၣ်ထွဲမၤစၢၤလီၤစှၤကွံၥ်ဝဲအဃိလၢတၢ်လုၢ်အီၣ်နီၢ်ခိၣ်သးသမူအဂီၢ်အဝဲသ့ၣ်ဘၣ်ကုၢ်ဆါအီၣ်ဝဲသွဲၣ်လးအဂ့ၢ်ကမျၢၢ်ပှၤလီၢ်အိၣ်ကမှံဖိသ့ၣ်တဖၣ်စံးဝဲဒၣ်န့ၣ်လီၤ.
ကမျၢၢ်ပှၤကလီၢ်အိၣ်ကမှံဖိသ့ၣ်တဖၣ်အံၤမ့ၢ်လၢအိၣ်ဆိးတၢ်ဆၢကတီၢ်ဟဲယံၤထီၣ်ဝဲအဖီခိၣ်လၢတၢ်လုၢ်အီၣ်သးသမူတကပၤကီခဲထီၣ်ဝဲအဃိဘၣ်ကုၢ်မၤအီၣ်ဝဲသွဲၣ်လးန့ၣ်လီၤ. တကီၢ်ခါခဲအံၤန့ၣ်သွဲၣ်လးတထၢၣ်န့ၣ်အပှ့ၤအိၣ်ဝဲ(၈,၀၀၀)ကၠးတုၤ(၁၀,၀၀၀)ကၠးအ ဘၢၣ်စၢၤဒီးအပှ့ၤဂ့ၤဝဲအဂ့ၢ်န့ၣ်ကမျၢၢ်ပှၤလီၢ်အိၣ်ကမှံဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ “မ့ၢ်ယံၤထီၣ်န့ၣ်ကအီၣ်ကအီအဂီၢ်တၢ်ကီတၢ်ခဲအိၣ်ဝဲလီၤ. တနီၤနီၤန့ၣ်မၤတၢ်မၤဆါတၢ်မ့ၢ်ဂ့ၤ,ဃုအီၣ်တၢ်ဒိး တၢ်လၣ်မ့ၢ်ဂ့ၤဆါအီၣ်ဝဲဒီးဘှါၡဲဝဲဒ်န့ၣ်လီၤ. အခဲအံၤန့ၣ်သွဲၣ်လးအပှ့ၤဂ့ၤဘျီတၢ်ကုၢ်ဆါဝဲမီၤနီၤ.” အဂ့ၢ်န့ၣ်ပှၤလီၢ်အိၣ်ကမှံပိၥ်မုၣ်တ ဂၤစံးဝဲန့ၣ်လီၤ.
တနံၣ်အံၤ(၂၀၂၄)နံၣ်အတီၢ်ပူၤအံၤကမျၢၢ်ပှၤလီၢ်အိၣ်ကမှံဖိသ့ၣ်တဖၣ်ဒိးန့ၢ်ဘၣ်ဝဲတၢ်ဆီၣ်ထွဲမၤစၢၤတအိၣ်အါအါလၢၤဘၣ်ဒီးလီၤစှၤကွံၥ်ဝဲအဃိပှၤလီၢ်အိၣ်ကမှံဖိလၢအဖံးအမၤတၢ်တကဲဘၣ်သ့ၣ်တဖၣ်အဂီၢ်ဘၣ်ဘှါၡဲဝဲအတၢ်လုၢ်အီၣ်နီၢ်ခိၣ်သးသမူကီကီခဲခဲအဂ့ၢ်န့ၣ်ပှၤလီၢ်အိၣ်ကမှံဖိလၢအဂၤတဂၤစံးဝဲဒ်အံၤစ့ၢ်ကီးန့ၣ်လီၤ.
အဝဲစံးဝဲလၢ “တၢ်တနံၣ်ညါအံၤန့ၣ်တၢ်မၤစၢၤတဟဲအါအါလၢၤဘၣ်. ပှၤသးပှၢ်သ့ၣ်တဖၣ်ကမၤတၢ်ကရၢၢ်တအိၣ်,ကျိၣ်စ့စ့ၢ်ကီးတ အိၣ်သ့ၣ်တဖၣ်ဒုဘၣ်ထဲးဂံၢ်ထဲးဘါကီကီခဲခဲလီၤ. ဘၣ်အီၣ်ဘၣ်အီဖှီၣ်ဖှီၣ်ယၥ်ယၥ်လီၤ.” အဂ့ၢ်န့ၣ်စံးဝဲဒၣ်န့ၣ်လီၤ.
ကီးတရံးကီၢ်ဆၣ်ဟီၣ်ကဝီၤအပူၤခီဖျိလၢတၢ်ဒုးတၢ်ယၤအဃိကမျၢၢ်ပှၤလီၢ်ကဝီၤဖိသ့ၣ်တဖၣ်ဘၣ်ဃ့ၢ်အိၣ်ကဒုအသးလၢကစၢၢ်ကလိ,ပှၢ်လၢ်ကျါအပူၤဒီးတုၤတကီၢ်ခါခဲအံၤန့ၣ်တက့ၤဘၣ်ဒံးဘၣ်အမဲၥ်ညါတၢ်ဆီၣ်ထွဲမၤစၢၤစ့ၢ်ကီးလီၤစှၤကွံၥ်ဝဲအဃိဘၣ်ထဲးဂံၢ်ထဲးဘါကုၢ်ဆါအီၣ်ဝဲသွဲၣ်လး,တၢ်ဒိးတၢ်လၣ်လၢဟးထီၣ်ပှၢ်ပူၤသ့ၣ်တဖၣ်အကလုၥ်ကလုၥ်အသိးပှၤသးပှၢ်,ပှၤလၢတၢ်အိၣ်ဆူၣ်အိၣ်ချ့တဂ့ၤသ့ၣ်တဖၣ်အဂီၢ်ခီန့ၣ်ကဲထီၣ်ဝဲတၢ်ကီတၢ်ခဲဖးဒိၣ်အဂ့ၢ်ပှၤလီၢ်အိၣ်ကမှံဖိသ့ၣ်တဖၣ်စံးဝဲန့ၣ်လီၤ.
