လါနိၣ်ဝဘ့ၢၣ် ၂၆ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲတနံၤအံၤဂီၤခီအဆၢကတီၢ်န့ၣ်ပယီၤသုးကီၣ် ကးအဒြိဟဲတ့ၢ်လီၤမ့ၣ်ပိၢ်အဃိဘၣ်ဟးဂီၤကွံၥ်ဝဲကမျၢၢ်တၢ်ဆါဟံၣ်တဖျၢၣ်ဒီးမ့မ့ၢ်လၢပှၤအိၣ်တၢ်ဆါဟံၣ်အပူၤသ့ၣ်တဖၣ်န့ၣ်တၢ်ဘၣ်ဒိဘၣ်ထံးတအိၣ်ဘၣ်အဂ့ၢ်လီၢ်ကဝီၤပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလါနိၣ်ဝ့ဘၢၣ်(၂၆)သီအနံၤ န့ၣ်လီၤ.
ပယီၤသုးကီၣ်ကးအံၤဖဲတနံၤအံၤဂီၤခီ(၈း၀၀)နၣ်ရံၣ်အဆၢကတီၢ်န့ၣ်မ့ၢ်လၢဟဲတ့ၢ်လီၤဝဲဒြိမ့ၣ်ပိၢ်ဖဲလၢၢ်ဒိၣ်ကီၢ်ဆၣ်(သူကဘံ)သဝီဃၢၤအဃိဘၣ်ဟးဂီၤဝဲတၢ်ဆါဟံၣ်တၢ်သူၣ်ထီၣ်တနီၤအသိးဖဲဆၢကတီၢ်အခါဖဲန့ၣ်န့ၣ်ဘၣ်ဖဲပှၤကမျၢၢ်သ့ၣ်တဖၣ်ဟဲပၠးအသးဒီးပှၤဆါစ့ၢ်ကီးအိၣ်ဝဲဖဲတၢ်ဆါဟံၣ်အပူၤန့ၣ်လီၤ.
ဘၣ်ဆၣ်သနါက့ကမျၢၢ်ဒီးပှၤဆါသ့ၣ်တဖၣ်တၢ်ဘၣ်ဒိဘၣ်ထံးတအိၣ်ဘၣ်အဂ့ၢ်လၢၢ် ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဝဲဒ်အံၤန့ၣ်လီၤ.
“မ့မ့ၢ်လၢတၢ်ကဲထီၣ်သးအဖီခိၣ်န့ၣ်ဒုၣ်ဒါဟဲခးလီၤဒြိမ့ၣ်ပိၢ်ဖဲဂီၤခီ(၈)နၣ်ရံၣ်အဆၢကတီၢ်ဖဲန့ၣ်ဒီးဘၣ်ဟးဂီၤဝဲဒၣ်တၢ်ဆါဟံၣ်လီၤ. ဒီး ဖဲန့ၣ်န့ၣ်ကမျၢၢ်ဟဲပၠးအသးဒီးအိၣ်စ့ၢ်ကီးဒီးပှၤဆူးပှၤဆါလီၤ. ဘၣ်ဆၣ်သနါက့ပှၤဆူးပှၤဆါသ့ၣ်တဖၣ်တၢ်ဘၣ်ဒိဘၣ်ထံးခီန့ၣ်တ အိၣ်ဘၣ်. ဒ်န့ၣ်အသိးမ့မ့ၢ်တၢ်ဆါဟံၣ်ဒုဘၣ်ဟးဂီၤကွံၥ်ဝဲဒၣ်တနီၤမီၤနီၤ. ဖဲဟါခီလီၤတကပၤန့ၣ်ပယီၤသုးလၢအိၣ်(နၣ်သၤကွ့)ခးစိ ဝဲကျိဖးဒိၣ်(၁၂၀မမ)တဖျၢၣ်ဒီးဘၣ်ဟးဂီၤကွံၥ်ဝဲဘုလီၢ်န့ၣ်လီၤ.” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ(သူကဘံ)သဝီတၢ်မၤလိကၠိစ့ၢ်ကီးအပူၤကွံၥ်ပယီၤသုးကီၣ်ကးခးလီၤဝဲကျိဖးဒိၣ်ကဲထီၣ်တ့ၢ်သးအိၣ်ဝဲအဃိတၢ်ဘၣ်ပတုၥ်ဃၥ်ကွံၥ်ဝဲတၢ်မၤလိကၠိအံၤတုၤတကီၢ်ခါခဲဒီးကၠိဖိ,ကၠိသရၣ်သ့ၣ်တဖၣ်လၢကဆဲးသိၣ်လိ,မၤလိတၢ်အဂီၢ်ကဲထီၣ်ဝဲတၢ်ကီတၢ်ခဲအဂ့ၢ်န့ၣ်သ့ၣ်ညါအါထီၣ်ဘၣ်စ့ၢ်ကီးန့ၣ်လီၤ.
အပူၤကွံၥ်လါအီကူး(၁၃)သီအနံၤန့ၣ်လၢၢ်ဒိၣ်ကီၢ်ဆၣ်ဟီၣ်ကဝီၤအပူၤခီဖျိသုးကီၣ်ကးခီၣ်သုးရ့ၣ်(ခလရ-၂၆၄)အပှၤသ့ၣ်တဖၣ်ဟဲ တ့ၢ်လီၤဒြိမ့ၣ်ပိၢ်ဖဲ(ထံပူၤလူၢ်)သဝီပူၤအဃိဘၣ်ဟးဂီၤကွံၥ်ဝဲတၢ်ဆါဟံၣ်တဖျၢၣ်စ့ၢ်ကီးအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
