လါနိၣ်ဝ့ဘၢၣ် ၂၆သီ, ၂၀၂၄နံၣ်, ခ့ၣ်အဲးစံၣ်,
ပိၥ်မုၣ်တဖၣ်ကဃုသ့ၣ်ညါမၤနၢ်ပၢၢ်အသးလၢတၢ်မၤတၢ်စုဆူၣ်ခီၣ်တကးအဂ့ၢ်အကျိၤဒီးကဂုၥ်ကျဲးစၢးမၤထူၣ်ဖျဲးထီၣ်ကွံၥ်အသးလၢတၢ်တူၢ်ဘၣ်တၢ်စုဆူၣ်ခီၣ်တကးအပူၤဂ့ၢ်,ကညီပိၥ်မုၣ်ကရၢ(KWO)ဆီၣ်တခူစံးဝဲဖဲ(၂၀၂၄)နံၣ်တၢ်မၤပတုၥ်ကွံၥ်တၢ်မၤတၢ်စုဆူၣ်ခီၣ်တကးလၢပိၥ်မုၣ်တဖၣ်အဖီခိၣ်(၁၆)သီတၢ်ဟူးတၢ်ဂဲၤအပူၤန့ၣ်လီၤ.
တၢ်ပတုၥ်တၢ်မၤတၢ်စုဆူၣ်ခီၣ်တကးလၢပိၥ်မုၣ်ဒီးဖိသၣ်အဖီခိၣ်,တၢ်ဟူးတၢ်ဂဲၤတၢ်ရဲၣ်တၢ်ကျဲၤအံၤတၢ်မၤအီၤဖဲလါနိၣ်ဝ့ဘၢၣ်(၂၅)သီတုၤလၢလါဒံၣ်စဲဘၢၣ်(၁၀)သီအနံၤလၢတၢ်လီၢ်ကိးပူၤဒဲးအဃိ,ပိၥ်မုၣ်တဖၣ်ကလဲၤမၤနၢ်ပၢၢ်အသး,တဲဖျါထီၣ်အတၢ်တူၢ်ဘၣ်ခီၣ်ဘၣ်ဒီးဂုၥ်ကျဲးစၢးမၤထူၣ်ဖျဲးထီၣ်ကွံၥ်သးလၢတၢ်စုဆူၣ်ခီၣ်တကးအပူၤအဂ့ၢ်,ကညီပိၥ်မုၣ်ကရၢ,အကရၢခိၣ် နီၢ်ကညီဖီစံးဝဲဒ်အံၤန့ၣ်လီၤ.
အဝဲစံးဝဲလၢ“(၁၆)သီတၢ်မၤတၢ်ပတုၥ်တၢ်စုဆူၣ်ခီၣ်တကးတၢ်ဟူးတၢ်ဂဲၤအံၤတၢ်မၤအီၤလၢကညီကီၢ်စဲၣ်ကီၢ်ရ့ၣ်ကိးဘ့ၣ်ဒီးဘၣ်ကီဘၣ်ခဲဒဲကဝီၤတဖၣ်အပူၤအဃိ,ယအဲၣ်ဒိးဟ့ၣ်ဂံၢ်ဟ့ၣ်ဘါဝဲဒၣ်ပိၥ်မုၣ်သ့ၣ်တဖၣ်လၢကလဲၤပၣ်ဃုၥ်ပၣ်ဂီၢ်မၤနၢ်ပၢၢ်သး,သံကွၢ်သံဒိးတၢ်န့ၣ်လီၤ.ဒီး,ဒ်သိးကမၤပူၤဖျဲးထီၣ်ကွံၥ်အသးလၢတၢ်စုဆူၣ်ခီၣ်တကးအပူၤအဂီၢ်တဲပၠးထီၣ်သုတၢ်တူၢ်ဘၣ်လၢပဝဲဒီးတသ့ဖဲအသ့ပကတိၤန့ၢ်ခဲးတၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,တၢ်ကပတုၥ်ကွံၥ်တၢ်စုဆူၣ်ခီၣ်တကးလၢပိၥ်မုၣ်ဒီးဖိသၣ်အဖီခိၣ်အဂီၢ်,ပိၥ်ခွါတဖၣ်မ့ၢ်ဝဲပှၤလၢအရ့ဒိၣ်သ့ၣ်တဖၣ်အဃိ,ကွဲမုၥ်ဝဲပိၥ်ခွါတဖၣ်လၢကပၣ်ဃုၥ်ပၥ်ဂီၢ်လၢ,တၢ်မၤတၢ်အၢၣ်လီၤသးလၢကပတုၥ်ကွံၥ်တၢ်မၤတၢ်စုဆူၣ်ခီၣ်တကးလၢပိၥ်မုၣ်အဖီခိၣ်တၢ်ဟူးတၢ်ဂဲၤပူၤအသိး,ဒီးဆီၣ်တခူဃ့ထီၣ်ဝဲပိၥ်ခွါတဖၣ်လၢ,အသုတမၤတၢ်စုဆူၣ်ခီၣ်တကးလၢပိၥ်မုၣ်တဖၣ်အဖီခိၣ်တဂ့ၤအဂ့ၢ်,စံးအါထီၣ်ဝဲဒၣ်န့ၣ်လီၤ.
ကညီပိၥ်မုၣ်ကရၢမၤဝဲ(၁၆)သီတၢ်ဟူးတၢ်ဂဲၤလၢတၢ်ပတုၥ်တၢ်စုဆူၣ်ခီၣ်တကးလၢပိၥ်မုၣ်ဒီးဖိသၣ်ဖီခိၣ်တနံၣ်အံၤအတၢ်ကိးတြီမ့ၢ်ဝဲ“ကသူၣ်ထီၣ်သကိးပှၤတဝၢလၢအပူၤဖျဲးဒီးသွံၣ်ထံးမုၣ်ခွါတၢ်စုဆူၣ်ခီၣ်တကးလၢပိၥ်မုၣ်ဒီးဖိသၣ်အဂီၢ်”အဂ့ၢ်,သ့ၣ်ညါဘၣ်န့ၣ်လီၤ.
ဒီးအတၢ်ကိးသတြီအံၤတၢ်ပညိၣ်မ့ၢ်ဝဲဒ်သိးပိၥ်မုၣ်ဒီးဖိသၣ်တဖၣ်ကအိၣ်မူဘၣ်လၢတၢ်သဘျ့,လၢအပူၤဖျဲးဒီးတၢ်စုဆူၣ်ခီၣ်တကးအဂီၢ်အဂ့ၢ်,ကညီပိၥ်မုၣ်ကရၢပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တကတီၢ်ဃီ,ကီၢ်သူလ့ၤတၢ်ပၢဟီၣ်ကဝီၤကညီကီၢ်စဲၣ်ဒီးဘၣ်ကီဘၣ်ခဲဒဲကဝီၤတဖၣ်အပူၤ,ပိၥ်မုၣ်ပိၥ်မၢၤဒီးဖိသၣ်တဖၣ်အံၤတူၢ်ဘၣ်ဝဲဟံၣ်ပူၤဃီပူၤတၢ်မၤတၢ်စုဆူၣ်ခီၣ်တကးကလုၥ်ကလုၥ်အါမံၤအကျါ,ပှၤလၢအတူၢ်ဘၣ်ဝဲမုၣ်ခွါသွံၣ်ထံးတၢ်မၤတရီတပါအံၤအိၣ်ဝဲဒၣ်အါမးအဂ့ၢ်,ကညီပိၥ်မုၣ်ကရၢစံးဝဲန့ၣ်လီၤ.
ဒီးပှၤလၢအမၤဝဲတၢ်စုဆူၣ်ခီၣ်တကးလၢပိၥ်မုၣ်အဖီခိၣ်တဖၣ်အံၤ,တနီၤတၢ်ဟံထီၣ်အရ့,ဟ့ၣ်တၢ်ကမၣ်တုၤလီၤတီၤလီၤအိၣ်ဝဲဘၣ်ဆၣ်ဟီၣ်ကဝီၤတနီၤအပူၤတၢ်မၤဘံၣ်မၤဘၢ,မၤလီၤမၢ်ကွံၥ်ဝဲပှၤမၤကမၣ်တၢ်ဖိအတၢ်ကမၣ်အိၣ်ဝဲဃိ,တၢ်ကဟံထီၣ်အရ့တုၤလီၤတီၤလီၤအဂီၢ်တၢ်တၤတၢ်အိၣ်ဒံးဝဲအဂ့ၢ်သ့ၣ်ညါဘၣ်ဒ်ကညီပိၥ်မုၣ်ကရၢစံးဝဲအသိးန့ၣ်လီၤ.
လၢတၢ်န့ၣ်အဃိ,ဒ်သိးပိၥ်မုၣ်ပိၥ်မၢၤဒီးဖိဒံဖိသၣ်တဖၣ်ကအိၣ်မူဘၣ်လၢတၢ်သဘျ့,ကပူၤဖျဲးဒီးတၢ်စုဆူၣ်ခီၣ်တကး,ကဒိးန့ၢ်ဘၣ်တၢ်တီတၢ်တြၢ်အဂီၢ်,အရ့ဒိၣ်ဝဲလၢပှၤကိးဂၤဒဲးကပၥ်ဖှိၣ်မၤသကိးတၢ်လၢကဟံထီၣ်ဖီၣ်ထီၣ်ပှၤမၤတၢ်စုဆူၣ်ခီၣ်တကးတဖၣ်အံၤအရ့အဂ့ၢ်,ကညီပိၥ်မုၣ်ကရၢစံးဝဲဒၣ်န့ၣ်လီၤ.
