လါနိၣ်ဝ့ဘၢၣ် ၂၆ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်အပူၤဖဲအပူၤကွံၥ်လါနိၣ်ဝ့ဘၢၣ်(၁၄)သီအနံၤန့ၣ်ပယီၤသုးကီၣ်ကးခီၣ်ချ့သုးရ့ၣ် (ခမရ-၅၈၉)အပှၤတဂၤဟဲပၥ်လီၤတၢ်စုကဝဲၤဃုၥ်ဒီးစုကဝဲၤပီးလီတဖၣ်ဖဲလၢၢ်ဒိၣ်ကီၢ်ဆၣ်(သုးရ့ၣ်-၉)ဟီၣ်ကဝီၤအပူၤအဂ့ၢ်န့ၣ်ခ့ၣ် အဲၣ်ယူၣ်ထုးထီၣ်ပၥ်ဖျါဝဲဖဲမဟါလါနိၣ်ဝ့ဘၢၣ်(၂၆)သီအနံၤန့ၣ်လီၤ.
ပယီၤသုးခီၣ်ချ့သုးရ့ၣ်(ခမရ-၅၈၉)အပှၤလၢဟဲပၥ်လီၤတၢ်စုကဝဲၤအံၤန့ၣ်မ့ၢ်ဝဲ(ကၠီၤမ့အီၤ)နီၢ်ကစၢ်နီၣ်ဂံၢ်(ပစ-၁၁၀၅၉၉)ဒီး (ကၠီၤမ့အီၤ)အံၤဒ်ခ့ၣ်အဲၣ်ယူၣ်ပၥ်လီၤပၥ်ဝဲပှၤသုးဖိလၢဟဲဟ့ၣ်လီၤအသးတၢ်မၤကျဲအိၣ်ဝဲအသိးန့ၣ်တၢ်ကွၢ်ထွဲကဟုကယၥ်အီၤဂ့ၤဂ့ၤဘၣ်ဘၣ်အဂ့ၢ်န့ၣ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဝဲဒ်အံၤန့ၣ်လီၤ.
“ဘၣ်ထွဲဒီး(ခမရ-၅၈၉)အသုးဖိလၢအမ့ၢ်(ကၠီၤမ့အီၤ)န့ၣ်ဖဲလါနိၣ်ဝ့ဘၢၣ်(၁၄)သီအနံၤန့ၣ်ဟဲဟ့ၣ်လီၤအသးဃုၥ်ဒီးတၢ်စုကဝဲၤပီးလီ သ့ၣ်တဖၣ်မီၤနီၤ. ဒီးကတီၢ်ခဲအံၤန့ၣ်ဒ်ခ့ၣ်အဲၣ်ယူၣ်ထုးထီၣ်ပၥ်ဝဲဒၣ်သုးလၢဟဲဟ့ၣ်လီၤအသးတၢ်မၤကျဲအိၣ်အသိးန့ၣ်ပအံးထွဲကွၢ် ထွဲအီၤ,ပကဟုကယၥ်အီၤဂ့ၤဂ့ၤဘၣ်ဘၣ်လီၤ” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ(ကၠီၤမ့အီၤ)လၢအဟဲပၥ်လီၤတၢ်စုကဝဲၤတဂၤအံၤတၢ်စုကဝဲၤပီးလီလၢအဝဲဟဲဟ့ၣ်လီၤဝဲသ့ၣ်တဖၣ်န့ၣ်ဒ်အမ့ၢ် MA-3(၁)ခိၣ်, ကျိဆၣ်ဒၢ(၅)ဘ့ၣ်, စုမ့ၣ်ပိၢ်(၁)ဖျၢၣ်, ၅.၅၆ချံအဖျၢၣ်(၁၅၀)သ့ၣ်တဖၣ်န့ၣ်လီၤ. ဒ်န့ၣ်အသိး(ကၠီၤမ့အီၤ)လၢဟဲဟ့ၣ်လီၤပၥ် လီၤတၢ်စုကဝဲၤတဂၤအံၤ(KNLA)သုးရ့ၣ်(၉)ဃုၥ်ဒီးလၢၢ်ဒိၣ်ကီၢ်ဆၣ်ဟ့ၣ်လၤကပီၤဝဲကျိၣ်စ့အကလီၢ်(၂၀)ကၠးအဂ့ၢ်န့ၣ်ခ့ၣ်အဲၣ်ယူၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
(ကၠီၤမ့အီၤ)အံၤဘၣ်တၢ်ဖီၣ်န့ၢ်အီၤလၢသုးကီၣ်ကးတၢ်ထၢကမျၢၢ်တၢ်ဘၣ်ကဲသုးသဲးစးတၢ်ဘျၢတဆီဒီးဟဲလီၤဘၣ်မူဒါဖဲပယီၤသုး(ခမရ-၅၈၉)သုးရ့ၣ်အပူၤ,လၢအအိၣ်ဝဲဖဲကညီဒီကလုၥ်တၢ်ထူၣ်ဖျဲးသုးမုၢ်သုးရ့ၣ်(၉)တၢ်ပၢဟီၣ်ကဝီၤအပူၤအဂ့ၢ်န့ၣ်ပဒိၣ်စီၤဝါမုၢ်စံးအါ ထီၣ်ဝဲဒၣ်စ့ၢ်ကီးန့ၣ်လီၤ.
“ပကွၢ်က့ၤသုးဖိလၢအဟဲဟ့ၣ်လီၤအသးတဂၤအံၤန့ၣ်လဲၤဘၣ်ထွဲအသးဒီးသုးကီၣ်ကးထုးထီၣ်ပၥ်ဝဲကမျၢၢ်တၢ်ဘၣ်ကဲသုးသဲးစးအံၤမီၤနီၤ. အဝဲမ့ၢ်ဝဲပှၤယူအီၣ်ကဲၣ်ရံး(ပှၤနီသိလ့ၣ်)ဖိတဂၤဒီးလၢတၢ်လဲၤတၢ်က့ၤအဖီခိၣ်န့ၣ်တၢ်ဖီၣ်န့ၢ်အီၤမီၤနီၤ. လၢတၢ်ဖီၣ်န့ၢ်အီၤအဖီခိၣ်န့ၣ်တၢ်သံကွၢ်အီၤလၢနကကဲသုးဧါ,နကနုၥ်လီၤလၢဃိၥ်ပူၤဧါဒ်န့ၣ် န့ၣ်လီၤ. အဝဲဃုထၢလၢကဲသုးဒီးအဝဲနုၥ်လီၤဝဲလၢသုးပူၤအိၣ်ဝဲ(၇)လါအတီၢ်ပူၤလံန့ၣ်လီၤ. လၢဒုးယၤတၢ်ဟူးတၢ်ဂဲၤအပူၤန့ၣ်အလီၤဘၣ်ဝဲမူဒါဖဲ(ဆီထံး)ဒီး(ဘီကထၣ်)အဘၢၣ်စၢၤမီၤနီၤ.” အဂ့ၢ်န့ၣ်စံးဘခ့ၣ်အဲးစံၣ် -ကညီတၢ်ကစီၣ်န့ၣ်လီၤ.
ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲအပူၤကွံၥ်လါအီးကထိဘၢၣ်အတီၢ်ပူၤန့ၣ်ပယီၤသုးကီၣ်ကးအသုးကျိၤပှၤနီၣ်ဂံၢ်အဂၤ(၃၀၀)ဃၣ်ဃၣ်လၢဆီထံးကီၢ်ဆၣ်တဆီဂုၥ်ကျဲးဟဲက့ၤထီၣ်မၤန့ၢ်က့ၤဝဲအသုးကလၢၤ(တိၤသ့ၣ်ဖူ)အဖီခိၣ်လၢခံခီခံကပၤတၢ်ဒုးတၢ်ယၤကဲထီၣ်ဝဲဒၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်(၉)စ့ၢ်ကီးအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲဒၣ်အသိးသ့ၣ်ညါဘၣ်န့ၣ်လီၤ.
