လါနိၣ်၀့ဘၢၣ် ၂၂ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ်အပူၤ ဖဲအပူၤကွံၥ်စှၤသီအခါ ကညီဆူၣ်ချ့မၤစၢၤ၀ဲၤကျိၤတီခိၣ်ရိၣ်မဲ ဒုးအိၣ်ဖျဲၣ်ထီၣ်ကဒီး၀ဲ ၄ ၀ီတ၀ီ ဂံၢ်ခီၣ်ထံးကသံၣ်တၢ်မၤလိဖိ ၄၈ ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢသထူၣ်ကီၢ်ဆၣ်တၢ်လီၢ်တတီၤအပူၤ ကညီဆူၣ်ချ့မၤစၢၤ၀ဲၤကျိၤ(KDHW)တီခိၣ်ရိၣ်မဲအိးထီၣ်၀ဲဒၣ် ဂံၢ်ခီၣ်ထံးကသံၣ် တၢ်မၤလိလၢ တၢ်ဆၢကတီၢ်ယံၤ၀ဲ(၆)လါအံၤ ဖဲလါနိၣ်၀့ဘၢၣ် ၁၈ သီ ဂီၤခီအဆၢကတီၢ် လၢတၢ်လီၢ်တတီၤအပူၤ တၢ်မၤက့ၤ၀ဲ တၢ်ပျၢၢ်က့ၤ ဂံၢ်ခီၣ်ထံးကသံၣ်တၢ်မၤလိမူး,တၢ်ဟ့ၣ်လီၤက့ၤ၀ဲလံၥ်အုၣ်သးတၢ်ရဲၣ်တၢ်ကျဲၤအံၤန့ၣ်လီၤ.
ဂံၢ်ခီၣ်ထံးကသံၣ်တၢ်မၤလိဘျီ၀ဲအံၤဒူသထူၣ်ကီၢ်ရ့ၣ် ကီၢ်ဆၣ်(၅)ဘ့ၣ်လၢအမ့ၢ် ဘံလ့,သထူၣ်,ဖၣ်အၣ်,ကၠဲးထိၣ်,မီၤစကိၤကီၢ်ဆၣ် ခၢၣ်စးသးစၢ်တဖၣ်ဟဲထီၣ်၀ဲဒီး တၢ်မၤလိဘျီ၀ဲအံၤ ကၠိဖိပိၥ်မုၣ်ဖျိထီၣ်၀ဲ(၃၇)ဂၤ,ပိၥ်ခွါ(၁၁)ဂၤ ခဲလၢၥ်ပၥ်ဖှိၣ်(၄၈)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ပှၤလၢအဖျိထီၣ်ဂံၢ်ခီၣ်ထံးကသံၣ်တၢ်မၤလိခဲအံၤသ့ၣ်တဖၣ်ဒ်မူဒါလီၤဘၣ်အသိးကဘၣ်က့ၤဟံးထီၣ်ဖီၣ်ထီၣ်က့ၤမူဒါ တဂၤလၢ ကီၢ်ဆၣ်ဒၣ်၀ဲစုၥ်စုၥ်ဒီး ဒ်န့ၣ်အသိးတနီၤန့ၣ်ကဆဲးထီၣ်ဒံး၀ဲတၢ်မၤလိစ့ၢ်ကီးအိၣ်၀ဲအဂ့ၢ်န့ၣ် သထူၣ်ကီၢ်ဆၣ် ကညီဆူၣ်ချ့မၤစၢၤ ၀ဲၤကျိၤခိၣ် စီၤအဲၣ်ကီၢ်ဆၢ လၢအတိခိၣ်ရိၣ်မဲဂံၢ်ခီၣ်ထံးကသံၣ်တၢ်မၤလိအံၤ စံး၀ဲဒ်အံၤန့ၣ်လီၤ.
“ပှၤကၠိဖိလၢအဖျိထီၣ်(၄၈)အံၤန့ၣ်ဟဲ၀ဲလၢကီၢ်ဆၣ်ကိးဘ့ၣ်တၢ်လီၢ်အါတီၤလီၤ.အ၀ဲသ့ၣ်တဂၤလၢသနၢၣ်ဒၣ်၀ဲကက့ၤဟံ၀ဲဒၣ်မူဒါကွၢ်ပှၤဆါလၢလီၢ်က၀ီၤပူၤဒီးတနီၤန့ၣ်ကဆဲးထီၣ်တၢ်မၤလိဒံး.အ၀ဲသ့ၣ်မၤလိတၢ်၀ံၤဒုအါဒၣ်တက့ၢ်ကဘၣ်မၤ၀ဲဒၣ်ကသံၣ်တၢ်ဖံးတၢ်မၤ,ကဘၣ်အံးထွဲကွၢ်ထွဲကမျၢၢ်လီၤ.ဒ်သိးတၢ်ဆူးတၢ်ဆါကလီၤစှၤအဂီၢ်န့ၣ်မ့ၢ်၀ဲဒၣ်ကသံၣ်သရၣ်ဖိလၢဖျိထီၣ်၀ဲဒၣ်တဂီၤအံၤအမူဒါလီၤ.ပှၤဖိသၣ်တဖၣ်အံၤပက့ၤကွၢ်န့ၣ်ဖျါ၀ဲဒၣ်လၢအါတက့ၢ်န့ၣ်အသးအိၣ်၀ဲတၢ်မၤလိအံၤနီၢ်နီၢ်လီၤ.အဃိယမုၢ်လၢ်အ၀ဲသ့ၣ်တခါလၢတၢ်မၤလိလၢပတီၢ်ထီမ့အိၣ်ထီၣ်န့ၣ်ပှၤဖိသၣ်တဖၣ်အံၤတၢ်မုၢ်လၢ်အိၣ်န့ၣ်ပကွၢ်ဃၥ်ဖျါ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
ကသံၣ်တၢ်မၤလိလၢတၢ်ဟ့ၣ်၀ဲဘျီ၀ဲအံၤန့ၣ် ကဲထီၣ်တၢ်တိစၢၤမၤစၢၤလၢကဆဲးထီၣ်တၢ်မၤလိဆူညါဂီၢ်အသိး ခါဆူညါတၢ်တိၥ်ပၥ် အိၣ်လၢအဲၣ်ဒိးဆဲးထီၣ်ဒံးပတီၢ်ထီတၢ်မၤလိဒီး တကီၢ်ခါခဲအံၤလၢလီၢ်က၀ီၤတၢ်လီၢ်အါတီၤအပူၤ ခီဖျိကသံၣ် သရၣ်ပှၤမၤတၢ်ဖိ အိၣ်စှၤဒံးအဃိအဲၣ်ဒိးကွဲမုၥ်ဘၣ်သူၣ်ဘီၣ်သးစၢ်တဖၣ်ကဟဲထီၣ်ဘၣ်ကသံၣ်တၢ်မၤလိအါန့ၢ်၀ဲအံၤအဂ့ၢ်န့ၣ် နီၢ်ဟဲမုၢ်လၢ်စိ လၢအဖျိထီၣ်၀ဲဂံၢ်ခီၣ်ထံးကသံၣ်တၢ်မၤလိအံၤစံး၀ဲဒ်အံၤန့ၣ်လီၤ.
“ခါဆူညါန့ၣ်ယကနုၥ်လီၤမၤစၢၤတၢ်လၢတၢ်ကရၢကရိပူၤတခါခါမီၤနီၤ.မ့သ့မ့ဘၣ်န့ၣ်အဲၣ်ဒိးမၤလၢကစၢ်ဂံၢ်လီၤဘၣ်ဆၣ်တဲလီၤတံၢ်တသ့ဘၣ်တၢ်မၢၤဖဲမၤသ့န့ၣ်ပကဂုၥ်ကျဲးစၢးမၤလီၤ.ခါဆူညါအဂီၢ်ဒုမုၢ်လၢ်ဃၥ်ဖးထီညါထီၣ်တၢ်မၤလိ၀ံၤဒုယတပၥ်တ့ၢ်ဖဲအံၤအဲၣ်ဒိးလဲၤထီၣ်ဒံးဆူညါဒံးမီၤနီၤ.ခဲအံၤပထံလီၢ်ကီၢ်ပူၤစ့ၢ်ကီးတၢ်တမုၥ်တခုၣ်ဘၣ်.ခဲအံၤစ့ၢ်ကီးပှၤကညီကၠိအိၣ်ဒီဒူၣ်ညါ.ကသံၣ်သရၣ်မုၣ်စ့ၢ်ကီးအိၣ်စှၤအဃိပအဲၣ်ဒိးကွဲမုၥ်သူၣ်ဘီၣ်သးစၢ်တဖၣ်လၢကဟဲမၤသကိးတၢ်လၢဆူၣ်ချ့တကပၤမီၤနီၤ.”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါဖဲတၢ်မၤလိအကတီၢ်ပူၤ ခီဖျိပယီၤသုးကဘီယူၤဟဲခးလီၤကျိဖးဒိၣ်အဃိ ပှၤကၠိဖိသ့ၣ်တဖၣ် ဘၣ်သုးလီၢ်သုးကျဲမၤလိက့ၤတၢ်လၢပှၢ်ပူၤတၢ်ဘံၣ်တၢ်ဘၢအလီၢ်ဒီးဒ်န့ၣ်အသိးဖဲတၢ်စူၤခါအကတီၢ် ခီဖျိတၢ်စူၤအါအဃိတၢ်ကီတၢ်ခဲ အိၣ်၀ဲလၢတၢ်လဲၤတၢ်က့ၤဒီးစိၥ်ထီၣ်စိၥ်လီၤတၢ်အီၣ်တၢ်အီအဂ့ၢ်န့ၣ် သရၣ်စီၤအဲၣ်ကီၢ်ဆၢ စံးအါထီၣ်၀ဲန့ၣ်လီၤ.
“ဖဲတၢ်မၤလိအတီၢ်ပူၤန့ၣ်ခီဖျိဒုၣ်ဒါတၢ်ဆီၣ်သနံးအဃိပဘၣ်သုးထီၣ်က့ၤပတၢ်မၤလိလီၢ်ဆူပှၢ်ပူၤ.ဖဲတၢ်စူၤအါအကတီၢ်န့ၣ်ပဘၣ်ဂုၥ်ကျဲးစၢးတ့ထီၣ်၀ဲဒၣ်တၢ်သူၣ်ထီၣ်လၢအသီ.ပတၢ်သူၣ်ထီၣ်လီၢ်လံၤန့ၣ်အိၣ်လီၤဘၣ်ဆၣ်ပမၤလိတၢ်တဘူၣ်ဘၣ်.မ့၀ံၤတၢ်ကီတၢ်ခဲအဂၤတထံၣ်န့ၣ်တၢ်စူၤခါန့ၣ်ပဘၣ်စိၥ်ခီ၀ဲတၢ်အီၣ်မိၢ်ပှၢ်ဘုသးခီတဲၥ်ထံကျိအဃိကဲထီၣ်တၢ်ကီတၢ်ခဲမီၤနီၤ.တကးဒံးဘၣ်ဖဲပလဲၤမၤလိတၢ်လၢပှၢ်ပူၤန့ၣ်ပဘၣ်စံၣ်ဒံးတဘျီဒံးခီဖျိကဘီယူၤဟဲကွံၥ်လီၤတဘျီ.အဃိကဲထီၣ်၀ဲတၢ်ကီတၢ်ခဲစ့ၢ်,လၢနီၣ်သးတကပၤစ့ၢ်ကီး ဘၣ်ဒိ၀ဲဒၣ်တၢ်သိလိသရၣ်အနီၣ်သးဒီးပှၤမၤလိတၢ်ဖိအနီၢ်သးစ့ၢ်မီၤနီၤ.ဘၣ်ဆၣ်ပဂုၥ်ကျဲးစၢးအဃိတုၤလၢမုၢ်တဂီၤညါအံၤပတၢ်မၤလိန့ၣ်ဖျိထီၣ်၀ဲဒၣ်ဂ့ၤဂ့ၤ၀ါ၀ါတုၤလၢပမၤနၢၤတၢ်မီၤနီၤ”အဂ့ၢ်န့ၣ် သရၣ်စီၤအဲၣ်ကီၢ်ဆၢ စံးအါထီၣ်၀ဲန့ၣ်လီၤ.
လၢန့ၣ်အမဲၥ်ညါတကီၢ်ခါခဲအံၤလၢဒူသထူၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤ ခီဖျိဆူၣ်ချ့ကသံၣ်ပှၤမၤတၢ်ဖိအဂံၢ်စၢ်ဒံး အဃိ ဒ်သိးပှၤမၤတၢ်ဖိအနီၣ်ဂံၢ်ကဟဲအိၣ်အါထီၣ်အဂီၢ် ခါဆူညါတၢ်ရဲၣ်တၢ်ကျဲၤအိၣ်လၢကဆဲးအိးထီၣ်ကဒီးတၢ်မၤလိ အဂ့ၢ်န့ၣ် ဆူၣ်ချ့ပှၤဘၣ်မူဘၣ်ဒါစံး၀ဲန့ၣ်လီၤ.
လၢတၢ်မၤတၢ်ပျၢ်က့ၤဂံၢ်ခီၣ်ထံးကသံၣ်တၢ်မၤလိတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် ကီၢ်ဆၣ်ဘၣ်ထွဲပှၤဘၣ်မူဘၣ်ဒါ, ၀ဲၤကျိၤ၀ဲၤဒ့ ပှၤဘၣ်မူဘၣ်ဒါ,ပှၤစံၣ်လီၤဂံၢ်ခီၣ်ထံးကသံၣ်တၢ်မၤလိဖိဃုၥ်ဒီးကမျၢၢ်ပၥ်ဖှိၣ်ဟဲထီၣ်၀ဲ(၃၀၀)ဘျဲၣ်န့ၣ်လီၤ.
