လါနိၣ်ဝ့ဘၢၣ် ၂၂သီ, ၂၀၂၄နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၅), မုၢ်တြီၢ်ကီၢ်ရ့ၣ်, ဒွဲၣ်လိကီၢ်ဆၣ် မးထီပယီၤသုးကလၢၤန့ၣ် ဖဲတနံၤအံၤ လါနိၣ်ဝ့ဘၢၣ် ၂၂သီ,ဂီၤခီ ၇နၣ်ရံၣ်ဘျဲၣ်အဆၢကတီၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့(၅)သုးပၥ်ဖှိၣ်ထီၣ်မၤန့ၢ်ကွံၥ်ဝဲဒၣ်အသိးတၢ်မၤန့ၢ်ဃုၥ်ဒီးတၢ်စုကဝဲၤတနီၤအဂ့ၢ် သ့ၣ်ညါဘၣ်လၢ ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ် အပှၤဘၣ်မူဘၣ်ဒါအအိၣ်န့ၣ်လီၤ.
မးထီသုကလၢၤလၢပၥ်ဖှိၣ်ဂံၢ်ဘါဒီးကူစ့ၣ်အံၤန့ၣ် ဖဲတနံၤအံၤဂီၤခီအဆၢတကီၢ် သုးက့(၅)ဒီးသုးပၥ်ဖှိၣ်ထီၣ်မၤန့ၢ်ကွံၥ်ဝဲဒၣ်အဂ့ၢ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ် တၢ်ကစီၣ်ဒီးတၢ်ဘိးဘၣ်ရၤလီၤအပှၤဘၣ်မူဘၣ်ဒါ ကၠူလံယၢၣ်ခုၣ် စံးဝဲဒ်အံၤန့ၣ်လီၤ.
အဝဲစံးဝဲလၢ“တၢ်သံတၢ်ဘၣ်ဒိတအိၣ်ဘၣ်.သုးကလၢၤဝဲအံၤပၥ်ဖှိၣ်ဂံၢ်ဘါဒီး ကူစ့ၣ်ပယီၤသုးသ့ၣ်တဖၣ်န့ၣ်လီၤ.ဖဲတနံၤဂီၤခီ(၇)နၣ်ရံၣ်ဘျဲၣ်အဆၢကတီၢ်န့ၣ် (KNLA)ဒီးသုးပၥ်ဖှိၣ်တဖၣ်ထီၣ်သဖှိအဝဲသ့ၣ်အဃိဟးထီၣ်ဃ့ၢ်လၢၤလံဒီးပှၤပိၥ်ထွဲအဝဲသ့ၣ်ခံအဖၢမုၢ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ မးထီသုကလၢၤဝဲအံၤန့ၣ် မ့ၢ်ဝဲ စကခ(၈)စုဒုၣ်တီၤဖီလၥ် ခီၣ်ချ့သုးရ့ၣ်(ခမရ-၄၀၇, ၄၀၈,၄၀၄)အပှၤပၥ်ဖှိၣ်သးဒီးကူစ့ၣ်အပှၤခဲလၢၥ်ပှၤနီၣ်ဂံၢ် ကအိၣ်ဂၤ(၆၀)ဘျဲၣ်ဒီးတၢ်စးထီၣ်နုၥ်လီၤခးအဝဲသ့ၣ်ဖဲ ၁၉သီအနံၤဒီး၂၂သီအနံၤန့ၣ်တၢ်ထီၣ်ရှဲကွံၥ်သုးကလၢၤန့ၢ်ခဲလၢၤအသိးတၢ်မၤဟးဂီၤန့ၢ်ဃုၥ်ဒီးပယီၤသုးတၢ်စုကဝဲၤဒၢးတၢးတဖျၢၣ်အဂ့ၢ်အဝဲတဲအါထီၣ်ဝဲဒၣ်စ့ၢ်ကီးန့ၣ်လီၤ.
တကတီၢ်ဃီ မးထီပယီၤသုးဒီးကူစ့ၣ်ပယီၤသုးလၢအဃ့ၢ်ထီၣ်ကွံၥ်လၢအသုးကလၢၤပူၤသ့ၣ်တဖၣ်အံၤ က့ၤဃ့ၢ်လီၤကဒါက့ၤဝဲဆူ ခွ့သ့ၤ,ကတၢတံးတကပၤအဂ့ၢ်သ့ညါဘၣ်အသိး တၢ်ဒိးန့ၢ်တၢ်စုကဝဲၤအကလုၥ်တဖၣ်န့ၣ်တၢ်မၤလီၤတံၢ်အီၤအဖၢမုၢ်အဂ့ၢ် ခ့ၣ်အဲယူၣ်-မုၢ်တြီၢ်ကီၢ်ရ့ၣ်စံးဝဲဒၣ်န့ၣ်လီၤ.
