လါနိၣ်ဝ့ဘၢၣ် ၂၉သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ကီးတရံးကီၢ်ဆၣ်ရၤမတံကလံၤထံးဂီၤလ့ၤဟီၣ်ကဝီၤအပူၤ,မဟါလါနိၣ်ဝ့ဘၢၣ်(၂၈)သီအနံၤအပူၤ(KTLA)ကီၢ်သူလ့ၤသုးမုၢ်ဒိၣ်ဖီၣ်မူဒံးဝဲသုးကီၣ်ကးအပှၤ(၁၄)ဂၤအကျါပၣ်ဃုၥ်ဒီးအသုးဒ့ခိၣ်(၁)အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
သုးကီၣ်ကးအပှၤတဖၣ်အံၤဒ်သိးကဒိးန့ၢ်ဘၣ်တၢ်ဘံၣ်တၢ်ဘၢလၢဟီၣ်ကဝီၤပူၤအဂီၢ်အဲၣ်ဒိးဖီၣ်လိၥ်စုမၤသကိးတၢ်ဒီးတၢ်ပၢၢ်ဆၢသုးပၥ်ဖှိၣ်ကရူၢ်တဖၣ်အိၣ်ဝဲဒၣ်ဘၣ်ဆၣ်,မ့မ့ၢ်လၢကတူၢ်ဃၣ်သးပၥ်လီၤစုကဝဲၤအဂီၢ်တခီအသးတအိၣ်ဝဲဘၣ်အဃိတၢ်ဖီၣ်မူဒံးကွံၥ်အဝဲသ့ၣ်တဖၣ်အဂ့ၢ်,(KTLA)ကီၢ်သူလ့ၤသုးမုၢ်ဒိၣ်,ဟီၣ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“သုးကီၣ်ကးအသုးဒ့ခိၣ်တဂၤအံၤ,အပူၤကွံၥ်တဲဘၣ်ဝဲပှၤကိးဖုဒဲးလၢအသါကမၤသကိးတၢ်လီၤ.ဘၣ်ဆၣ်,ပခိးအသုတလါဝံၤတလါနါက့တပၢၢ်ထီၣ်ဘၣ်.ပသ့ၣ်ညါလၢအိၣ်ဒၣ်ထဲလၢကဟံတၢ်ဆဲးကျိးဒီးပှၤ,လၢအသုကဒိးန့ၢ်ဘၣ်တၢ်ဟးထီၣ်ဟးလီၤတၢ်ဘံၣ်တၢ်ဘၢလၢဟီၣ်ကဝီၤအပူၤလီၤ.အဃိန့ၣ်,ပကွၢ်အတၢ်အိၣ်သးတဘၣ်ဂီၢ်ဘၣ်အဃိပမၢ်လိၥ်အီၤဒီးဖီၣ်တံၢ်ဃၥ်အီၤတဘျီဃီလီၤ.ဝံၤဒီးပမၢကိးလီၤအပှၤကိးဝဲတန့ၢ်အဃိ,ပခိးလဲၤဖီၣ်က့ၤလၢအပှၤလဲၤဒၢၣ်ထံဖဲ(ရွှ့ၣ်အ့မၠဲၣ်)သီခါဖၠၣ်တနီၤ.ဒီးခဲအံၤပဖီၣ်န့ၢ်(၁၄)ဂၤန့ၣ်လီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ,ပယီၤသုးလၢတၢ်ဖီၣ်န့ၢ်ဝဲတဖၣ်အံၤမ့ၢ်ဝဲ(ခမရ)(၅၈၅)အပှၤလၢအိၣ်ခိးဝဲတၢ်ဘံၣ်တၢ်ဘၢဖဲအူးကရ့ၢ်ထၣ်,ဂီၤလ့ၤဒီးဆူးကလံကျဲတြၢ်ပူၤဒီးပှၤသ့ၣ်တဖၣ်အံၤအတၢ်အိၣ်ခိးလီၢ်အပူၤ,နီၢ်ဂံၢ်ခဲလၢၥ်အိၣ်ဝဲ(၂၄)ဂၤဘၣ်ဆၣ်,ခီဖျိတၢ်ဖီၣ်ကွံၥ်ဝဲ(၁၄)ဂၤဒီးတနီၤက့ၤဃ့ၢ်လီၤစှၤကွံၥ်ဝဲဆူအိးကရ့ၣ်ထၣ်သုးကလၢၤအပူၤအဃိ,တကီၢ်ခါခဲအံၤအိၣ်တ့ၢ်က့ၤထဲ(၇)ဂၤအဂ့ၢ်,အဝဲစံးဝဲဒၣ်န့ၣ်လီၤ.
တကးဒံးဘၣ်,ပယီၤသုးလၢတၢ်ဖီၣ်န့ၢ်ဝဲတဖၣ်အံၤတကီၢ်ခါခဲအံၤတၢ်ဆှၢထီၣ်ကွံၥ်အဝဲသ့ၣ်တဖၣ်ဆူ(KTLA)လီၢ်ခၢၣ်သးဝဲၤလီၢ်ခိၣ်သ့ၣ်ပှၤဘၣ်မူဘၣ်ဒါတဖၣ်အစုပူၤလံဒီးမဟါတၢ်ဖီၣ်န့ၢ်ဝဲပယီၤသုးပှၤအိၣ်ခိးတၢ်ဘံၣ်တၢ်ဘၢတဖၣ်အံၤဝံၤအလီၢ်ခံ,သုးကီၣ်ကးတကပၤအဝီၢ်လ့ၤဒုးယၤသုးကလၢၤခးလီၤစိဝဲကျိဖိကျိဖးဒိၣ်အိၣ်ဝဲအသိး,ကဘီယူၤဟဲခးလီၤစ့ၢ်ကီးတၢ်အိၣ်ဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
တကတီၢ်ဃီ,ဂီၤလ့ဟီၣ်ကဝီၤအပူၤပယီၤသုးတဖၣ်အံၤတကီၢ်ခါခဲအံၤအတၢ်လီၢ်ဒ်အမ့ၢ်,ဘျၢၣ်ဒိၣ်,သ့ၣ်ဘီဘိ,လ့ဂီၤ,အူးကရ့ၣ်ထၣ်,ကနဲလ့,ထံကပျၢၤ,မီခံ,ဘယ့ၣ်နီၤကိတဖၣ်အိၣ်ဒံးဝဲဒၣ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒီးဂီၤလ့ဒုးယၤသုးကလၢၤအပူၤအံၤခမရ(၅၈၅)(၅၅၉)ဒီး(၅၅၅)တဖၣ်ပၥ်ဖှိၣ်သးအိၣ်ဆိးဝဲဒီအပှၤနီၢ်ဂံၢ်အိၣ်ဝဲ(၂၀၀)ဂၤအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒ်န့ၣ်အသိး,သုးကီၣ်ကးဂီၤလ့ၤဒုးယၤသုးကလၢၤအံၤဒ်အမ့ၢ်ဝဲဒုးယၤသုးကလၢၤဖးဒိၣ်တဖျၢၣ်အသိး,ဒ်သိးကဆှၢဝဲတၢ်အီၣ်တၢ်အီဆူအသုးကလၢၤ,အတၢ်လီၢ်တတီၤဘၣ်တတီၤအဂီၢ်,အပူၤကွံၥ်လဲၤလီၤပှ့ၤဝဲတၢ်ဆူဂီၤလ့ၤဝ့ၢ်ပူၤအိၣ်ဝဲထီဘိဒီးဖဲလါအီးကထိဘၢၣ်အပူၤတၢ်ပၢၢ်ဆၢသုးပၥ်ဖှိၣ်ခိးခးအဝဲသ့ၣ်လၢကျဲၤတီၤအိၣ်ဝဲအဃိ,အပှၤသုးဖိ(၂)ဂၤသံကွံၥ်ဝဲအသိး,ခမရ(၅၈၅)အသုးရ့ၣ်ခိၣ်ဒီး အမတ(၃၁၆)အသုးရ့ၣ်ခိၣ်ခံသ့ၣ်တဖၣ်ဘၣ်ဒိဒံးဘၣ်ထံးကဲထီၣ်သးအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
