လါဒံၣ်စ့ဘၢၣ် ၁၆ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်အပူၤ လါနိၣ်၀့ဘၢၣ်တလါအတီၢ်ပူၤ တၢ်ဒုးကဲထီၣ်(၇)ဘျီဒီး ပယီၤသုးတကပၤသံဘၣ်ဒိဘၣ်ထံး(၂၁)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤ.
ကၠဲးထိၣ်ကီၢ်ဆၣ် လါနိၣ်၀့ဘၢၣ် ၁ သီတုၤ ၃၀ သီ လၢတလါအတီၢ်ပူၤ တၢ်ဒုးစဲးပြဲးကဲထီၣ်၀ဲလၢပယီၤသုးဒီး ဟီၣ်က၀ီၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၃)သုးပၥ်ဖှိၣ်အဘၢၣ်စၢၤအိၣ်၀ဲ(၅)ဘျီ, တၢ်လဲၤခးပယီၤသုးဒီးဒြိ(၁)ဘျီဒီး တၢ်ခိးထုးပယီၤသုးကဲထီၣ်(၁)ဘျီ အဃိ ပယီၤသုးတကပၤသံ(၁၁)ဂၤ,ဘၣ်ဒိ(၁၀)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီ အပူၤန့ၣ်လီၤ.
တၢ်ဒုးကဲထီၣ်လၢခံခီခံကပၤအဘၢၣ်စၢၤအတီၢ်ပူၤအံၤ ပယီၤသုးသံဘၣ်ဒိဘၣ်ထံးအမဲၥ်ညါ မ့မ့ၢ်လၢကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ကရူၢ်တကပၤန့ၣ် ဘၣ်ဟ့ၣ်လီၤကွံၥ်အသးသမူ(၁)ဂၤ, ဘၣ်ဒိ(၁) ဂၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
တကတီၢ်ဃီတလါအတီၢ်ပူၤ သုးကီၣ်ကး(၃၁၀)အမျိၥ်သုး,ခီၣ်ချ့သုးရ့ၣ်(ခမရ-၂၀၇),သ့ၣ်စ့းယၣ်ပၢၤကီၢ်၀ဲၤလီၢ်, ခးလီၤကျိဖးဒိၣ် (၉)ဘျီဆူ လီၢ်က၀ီၤကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်အဃိ ကမျၢၢ်သံ(၁)ဂၤ,ဘၣ်ဒိ(၅)ဂၤ အမဲၥ်ညါ ကျီးပူၤတၢ်ထူၣ်တၢ်ဘိ သ့ၣ်တဖၣ်စ့ၢ်ကီးဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်လီၤ.
သုးကီၣ်ကးအံၤလီၤဆီဒၣ်တၢ်တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ခးလီၤ၀ဲကျိဖးဒိၣ်တလီၢ်လီၢ်အဃိ ပှၤကမျၢၢ်သံဘၣ်ဒိၣ်ဘၣ်ထံး ကဲထီၣ်သးအိၣ်၀ဲခဲအံၤခဲအံၤအဂ့ၢ်န့ၣ် ကၠဲးထိၣ်ကီၢ်ဆၣ်ခိၣ် ပဒိၣ်စီၤထိအူ စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ် ဖဲလါနိၣ်၀့ဘၢၣ်အခါန့ၣ်လီၤ.
အ၀ဲစံး၀ဲလၢ“တၢ်ဒုးအိၣ်ဂ့ၤတအိၣ်ဂ့ၤအ၀ဲသ့ၣ်န့ၣ်ခးလီၤကျိဖးဒိၣ်မၢ်မၢ်လီၤ.ပှၤသ၀ီဖိဘၣ်ဒိဘၣ်ထံးအိၣ်,ပှၤသ၀ီဖိတဖၣ်ဖဲအ၀ဲသ့ၣ်လဲၤမၤတၢ်လၢကျီးပူၤအခါနါက့ကျိဖးဒိၣ်လီၤဘၣ်သံအိၣ်တနီၤ,ဘၣ်ဒိအိၣ်တနီၤ.ဒ်သိးကၠိနါက့ပှၤကၠိဖိကထီၣ်ကၠိမုၥ်မုၥ်ယုၢ်ယုၢ်န့ၣ် တထီၣ်ဘၣ်ဘၣ်,ဘၣ်ပျံၤကျိဖးဒိၣ်.ကျိဖးဒိၣ်မ့ထီၣ်လံဘျီန့ၣ်ပှၤဖိသၣ်ထီၣ်ကၠိတဘူၣ်လၢၤဘၣ်.ဘၣ်ပျံၤလၢကျိဖးဒိၣ်ကဟဲလီၤ တဲၥ်လၢကၠိပူၤမီၤနီၤ”အဂ့ၢ်န့ၣ် စံး၀ဲန့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် လါနိၣ်၀့ဘၢၣ်အတီၢ်ပူၤ ကၠဲးထိၣ်ကီၢ်ဆၣ်ပူၤတၢ်ဒုးကဲထီၣ်,ပယီၤသုးခးလီၤကျိဖးဒိၣ် အိၣ်ဘၣ်ဆၣ် မ့မ့ၢ်လၢသထူၣ်ကီၢ်ဆၣ်ပူၤန့ၣ် ဖဲလါနိၣ်၀့ဘၢၣ် ၂၂ သီအနံၤ ပယီၤသုးခီၣ်ချ့သုးရ့ၣ်(ခမရ-၉)ခးလီၤကျိဖးဒိၣ် အိၣ်၀ဲတဘျီဒီး မ့မ့ၢ်ဘံလ့,ဖၣ်အၣ်,မီၤစကိၤကီၢ်ဆၣ် ကီၢ်ဆၣ်(၃)ဘ့ၣ်အံၤ ဒုးယၤတၢ်သဘံၣ်သဘုၣ်ကဲထီၣ်တအိၣ်၀ဲနီတဘျီဘၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒူသထူၣ်ကီၢ်ရ့ၣ်ပူၤ လီၤဆီဒၣ်တၢ်ကၠဲးထိၣ်,ဘံလ့,သထူၣ်ကီၢ်ဆၣ်သ့ၣ်တဖၣ်အံၤ ခီဖျိအိၣ်ဘူး၀ဲလၢ၀့ၢ်နၢ်ပၤထံး,ကျဲမုၢ်ဖးဒိၣ် ကပၤအဃိ ပယီၤသုးတၢ်ဟူးတၢ်ဂဲၤအိၣ်၀ဲအါဘၣ်ဆၣ် ကနုၥ်လီၤဟူးဂဲၤတုၤလၢကီၢ်ဆၣ်တၢ်ပၥ်ပနီၣ်ဟီၣ်က၀ီၤတၢ်ကိပူၤဒု နုၥ်လီၤ၀ဲတန့ၢ်ဒံး၀ဲဘၣ်အဂ့ၢ်န့ၣ် သုးက့(၁)သုးက့ခိၣ် စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်၀ဲန့ၣ်လီၤ.
