လါဒံၣ်စ့ဘၢၣ် ၂ သီ, ၂၀၂၄ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ အပူၤကွံၥ်တၢ်စူၤခါခီဖျိဃိၣ်လိၥ်ကျိထံဒိၣ်ထီၣ်အဃိ စ့ၣ်ခၠီသ၀ီလၢအိၣ် ထံကျိကၢၢ်နံၤအံၤ သ၀ီဒီတဖျၢၣ်ကမျၢၢ်ခဲလၢၥ်ဘၣ်သုးလီၢ်သုးကျဲလဲၤအိၣ်လၢတၢ်လီၢ်ထီၣ်ထီအလီၢ်ဒီး တုၤလၢခဲအံၤ တက့ၤဘၣ်ဒံးလၢအဟံၣ်အဃီဘၣ်အဃိ သဂၢၢ်ဘၣ်၀ဲအိၣ်ဆိးလီၢ်ကျဲတၢ်ဂ့ၢ်ကီအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဖဲအပူၤကွံၥ်လါအီကူးတၢ်စူၤခါအဆၢကတီၢ် ခီဖျိတၢ်စူၤတပယူၥ်ဃီဒီးဃိၣ်လိၥ်ကျိထံဒိၣ်ထီၣ်တုၤလၢကျဲမုၢ်ခိၣ်အဃိ တကီၤဘိကရူၢ် ကိတါကၠံသ၀ီဃၢၤ စ့ၣ်ခၠီသ၀ီလၢအိၣ်ဖဲထံကျိကၢၢ်နံၤအံၤ ဟံၣ်လီၤထွံကဲထီၣ်သးအမဲၥ်ညါသ၀ီဒီတဖျၢၣ် ဘၣ်သုးလီၢ်သုးကျဲဆူတၢ်လီၢ်ထီၣ်ထီတုၤလၢခဲအံၤတၢ်ဆၢကတီၢ်ထီၣ်ဘးလၢ(၄)လါဃၣ်ဃၣ်လံအဂ့ၢ်န့ၣ် လီၢ်က၀ီၤပှၤဘၣ်မူ ဘၣ်ဒါ စံး၀ဲန့ၣ်လီၤ.
တကီၢ်ခါခဲအံၤတၢ်စူၤထံဒိၣ်ထီၣ်ထံက့ၤလီၤတၢ်ဆၢကတီၢ်န့ၢ်ဖးယံၤလံဘၣ်ဆၣ် တုၤလၢခဲအံၤထံကျိၤဆဲးနုၥ်လီၤ၀ဲဒၣ်လၢ စ့ၣ်ခၠီသ၀ီပူၤဒီတဖျၢၣ်အဃိ နံၣ်လၢကဟဲသ၀ီဖိတဖၣ်လ့ၤတက့ၤက့ၤအိၣ်ဆိးဆီလီၤသးဒ်အပူၤကွံၥ်အသိးတသ့လၢၤဘၣ်ဒီး သ၀ီဒီတဖျၢၣ်ကဘၣ်သုးလီၢ်သူၣ်ထီၣ်က့ၤအဟံၣ်အဃီအဒူသ၀ီလၢတၢ်လီၢ်လၢအဂၤတတီၤအဂ့ၢ်န့ၣ် ဖၣ်အၣ်ကီၢ်ဆၣ် စံၥ်ပှဲၤသူၣ်ဖျး၀ဲၤကျိၤခိၣ် စီၤသူမဲလၢအလဲၤလီၤ ဃိထံတၢ်ဂ့ၢ်အံၤ စံး၀ဲဒၣ်ဒ်အံၤန့ၣ်လီၤ.
“ဖဲတၢ်စူၤထံဒိၣ်အခါန့ၣ် ပှၤဟံၣ်လီၤထွံကအိၣ်ခံဖျၢၣ်သၢဖျၢၣ်ညါ.ဖဲတၢ်ကဲထီၣ်သးသီသီအခါန့ၣ် သ၀ီဖိတဖၣ်ဟဲအိၣ်၀ဲဒၣ် ဖဲကိတါကၠံသ၀ီဟးအိၣ်၀ဲလၢပှၤဟံၣ်လၢအံၤတနီၤလၢန့ၣ်တနီၤဒ်န့ၣ်လီၤ.ခဲအံၤတၢ်ယီၤထီၣ်လံအဃိအ၀ဲသ့ၣ်ဟဲက့ၤအိၣ်၀ဲဖဲသ၀ီပူၤလၢ သ့ၣ်ခီၣ်ထံးတနီၤ,လၢကၠိပူၤတနီၤ,ဟံၣ်တဖျၢၣ်န့ၣ်အိၣ်ဖှိၣ်၀ဲ ခံဟံၣ်သၢဟံၣ်ဒ်န့ၣ်လီၤ.မ့၀ံၤဟံၣ်လၢအဂၤတဖၣ်နါက့ထံဃိ အကျိၤဖဲအခၢၣ်သးတဘိဘျီ ခဲမဟိတနံၣ်အိၣ်တသ့လၢၤဘၣ်ကဘၣ်သုးလီၢ်သုးကျဲခဲလၢၥ်လီၤ. ခဲအံၤတၢ်လီၢ်န့ၣ်အိၣ်တ့ၢ်က့ၤ ထဲကၠိတကွဲးလီၤ.အဃိကၠိနါက့ခဲမဟိန့ၣ်ဘၣ်ယိၣ်လၢကဖျိးကွံၥ်.ပှၤကၠိဖိနါက့ခဲအံၤလဲၤထီၣ်က့ၤကၠိလၢကိတါကၠံသ၀ီလီၤ.ခဲမဟိဒုလ့ၤတက့ၤအိၣ်တသ့လၢၤဘၣ်အနီၢ်ကီၢ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤစ့ၣ်ခၠီသ၀ီဖိတဖၣ်လၢကက့ၤသူၣ်ထီၣ်က့ၤအဒူသ၀ီလၢတၢ်လီၢ်အဂၤတတီၤအဂီၢ်လိၣ်ဘၣ်၀ဲဒၣ်ဟီၣ်ခိၣ်တၢ်လီၢ် တၢ်ကျဲအသိးဘၣ်ဃးတၢ်ဂ့ၢ်ကီလၢကမျၢၢ်သဂၢၢ်ဘၣ်၀ဲခဲအံၤတဖၣ်ဒူသ၀ီဘၣ်မူဘၣ်ဒါပၥ်ဖျါတီၣ်ဖျါထီၣ်တၢ်ဂ့ၢ်တၢ်ကျိၤ တၢ်အိၣ်သးဆူကီၢ်ဆၣ်ပှၤဘၣ်မူဘၣ်ဒါအအိၣ်လံအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤ.
စ့ၣ်ခၠီသ၀ီအံၤအပူၤကွံၥ်တၢ်စူၤထံဒိၣ်ထီၣ်ကဲထီၣ်တ့ၢ်အသးအိၣ်၀ဲတလီၢ်လီၢ်ဘၣ်ဆၣ် သ၀ီဒီတဖျၢၣ်ဘၣ်သုးလီၢ်သုးကျဲ ပၢၢ်တုၤလၢက့ၤအိၣ်တသ့လၢၤဘၣ်ဒ်အံၤကဲထီၣ်တ့ၢ်အသးတအိၣ်နီတဘျီဒံးဘၣ်ဒီးတၢ်ကဲထီၣ်သးဒ်အံၤမ့ၢ်ဒၣ်အဆိကတၢၢ် တဘျီလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ.
ဒ်န့ၣ်အသိးသ၀ီဖိတဖၣ်ခီဖျိဆဲးအိၣ်လၢအဒူသ၀ီအဟံၣ်အဃီတသ့လၢၤဘၣ်ဒီးလၢကတ့ထီၣ်အဟံၣ်လၢ တၢ်လီၢ်အဂၤအဂီၢ် အ၀ဲသ့ၣ်အိၣ်ကတဲၤကတီၤထီၣ်သးရိၢ်လီၤဃၥ်အဟံၣ်အဃီလံဘၣ်ဆၣ် တၢ်ဂ့ၢ်တၢ်ကျိၤလၢတၢ်တီၣ်ထီၣ်ဃၥ်၀ဲတဖၣ် တၢ်ဖီခိၣ် ခိၣ်နၢ်တၢ်ဆၢတဲၥ်တၢ်နဲၣ်လီၤမ့အိၣ်မးသ၀ီဖိစးထီၣ်တ့ထီၣ်ဘှီထီၣ်အဟံၣ်အဃီလၢတၢ်လီၢ်လၢအသီအံၤကသ့၀ဲလီၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် စ့ၣ်ခၠီသ၀ီအံၤ ဟံၣ်ခိၣ်အိၣ်၀ဲ(၄၁)ဖျၢၣ်,ပှၤနီၣ်ဂံၢ်ပၥ်ဖှိၣ်ခဲလၢၥ်အိၣ်၀ဲ(၂၃၀)ခိၣ်ဃၢၤဒီး လၢထံဒိၣ်ဃိၣ်ယွၤတၢ်ဂ့ၢ်ပိၥ်ထွဲအံၤအဃိတုၤလၢခဲအံၤသ၀ီဖိခဲလၢၥ်က့ၤအိၣ်လၢဟံၣ်တသ့ဒံးဘၣ်န့ၣ်လီၤ.လၢန့ၣ်အမဲၥ်ညါ ဘၣ်ဃးသ၀ီဒီတဖျၢၣ်ကမျၢၢ်ခဲလၢၥ်ကဘၣ်သုးလီၢ်သုးကျဲဆီလီၤက့ၤအဟံၣ်အဃီလၢတၢ်လီၢ်လၢအဂၤတတီၤအဂီၢ်အံၤစ့ၢ်ကီး အ၀ဲသ့ၣ်လိၣ်ဘၣ်၀ဲတၢ်ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
