လါဒံၣ်စဲဘၢၣ် ၁၂ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့(၅) ဒွဲၣ်လိကီၢ်ဆၣ်ဟီၣ်ကဝီၤအပူၤ ဖဲမဟါလါဒံၣ်စဲဘၢၣ်(၁၁)သီ အနံၤန့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့(၅)သုးပၥ်ဖှိၣ်ထီၣ်မၤန့ၢ်ကွံၥ်ဝဲ (တီၤသိလိ)ကစၢၢ်သၢဖျၢၣ် ပယီၤသုးကလၢၤ အံၤဒီး ဖဲန့ၣ် တၢ်မၤန့ၢ်ဃုၥ်ဝဲကျိဖးဒိၣ်တၢ်စုကဝဲၤ,ကျိချံပှၥ်သၣ်အါအါဂီၢ်ဂီၢ် အဂ့ၢ်န့ၣ် (KNLA)အပှၤဘၣ်မူဘၣ်ဒါ စံးဝဲဒၣ်န့ၣ်လီၤ
(တီၤသိလိ)ပယီၤသုးကလၢၤအံၤလၢတၢ်ကထီၣ်န့ၢ်၀ဲအဂီၢ် (KNLA)ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးပၥ်ဖှိၣ် ထီၣ်ခး၀ဲတၢ်ဆၢ ကတီၢ်တံၥ်တၥ်၀ဲလၢ (၇)သီအတီၢ်ပူၤဒီး ဖဲလါဒံၣ်စဲဘၢၣ်(၁၁)သီ ဂီၤခီ(၅)နၣ်ရံၣ်အဆၢကတီၢ်န့ၣ် တၢ်ထီၣ်မၤန့ၢ်ကွံၥ်ဝဲဒၣ်အဂ့ၢ်န့ၣ် (KNLA)သုးခိၣ်တဂၤစံးဝဲအံၤဒ်အံၤန့ၣ်လီၤ.
အဝဲစံးဝဲလၢ “ဖဲမဟါဘၣ်ဖဲဂီၤခီ(၅)နၣ်ရံၣ်အဆၢကတီၢ်န့ၣ်တၢ်နုၥ်လီၤမၤဆှဲလဲကွံၥ်ဝဲန့ၢ်လံမီၤနီၤ. ပယီၤသုး(တီၤသိလိ)သုးကလၢၤ ဒီး(ထံကဆီမဲ)သုးကလၢၤအပူၤန့ၣ်ဒုၣ်ဒါအပှၤနီၣ်ဂံၢ်အိၣ်ဝဲအဂၤ(၂၀၀)ဃၣ်ဃၣ်လီၤ. တၢ်ထီၣ်ဝဲဒၣ်သုးကလၢၤလူၢ်တဖျၢၣ်န့ၣ်တံၥ် တၥ်ဝဲ(၇)သီ, ယံၤဝဲတနွံအတီၢ်ပူၤမီၤနီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလီၤ.
ဒ်န့ၣ်အသိးဖဲတၢ်ထီၣ်ဆှဲလဲကွံၥ်သုးကလၢၤပူၤအခါန့ၣ် တၢ်မၤန့ၢ်ဃုၥ်ဝဲဒၣ် ကျိဖးဒိၣ်-၁၂၀မမ (၁)ခိၣ်, ၈၁မမ (၃)ခိၣ်, ၆၀မမ (၂)ခိၣ်, ကျိစဲးလး . ၅ (၂)ခိၣ်, ကျိစဲးလးညၣ်မဲၢ် (၂)ခိၣ်, ကၠၢမနံၣ်စဲးဖီကဟၣ်ဖးဒိၣ် (၂)စိၣ် ဒီး စဲးဖီကဟၣ်လီမ့ၣ်အူ(၃)ဖျၢၣ် ဒီးစဲးဖီကဟၣ်လီမ့ၣ်အူအဆံး(၁)ဖျၢၣ်သ့ၣ်တဖၣ်အဂ့ၢ်န့ၣ်(KNLA)သုးခိၣ်တဂၤဃီ၀ဲန့ၣ်စံးအါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါတၢ်ဒုးဘျီ၀ဲအံၤအပူၤ ပယီၤသုးတကပၤသံ(၁၆)ဂၤ,အသုးရ့ၣ်ခိၣ်(၂)တဂၤဘၣ်ဒိဝဲအဂ့ၢ်န့ၣ်သ့ၣ်ညါဘၣ်အသိး မ့မ့ၢ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်တကပၤန့ၣ် ဘၣ်ဒိ၀ဲဒၣ်(၄)ဂၤတၢ်ဘၣ်ယိၣ်တအိၣ်ဘၣ် အဂ့ၢ်သ့ၣ်ညါဘၣ်န့ၣ်လီၤ.
လၢတၢ်ထီၣ်ခးသုးကလၢၤဘျီဝဲအံၤန့ၣ်မ့ၢ်ဝဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကမျၢၢ်တၢ်ဒီသဒၢသုးကရူၢ်(PDF), (BPLA), ဒီး (Force for Federal Democracy-FFD)သုးကရူၢ်သ့ၣ်တဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤ.
ဒ်န့ၣ်အသိး(ထံကဆီမဲ)ပယီၤသုးကလၢၤလၢအအိၣ်ဘူးလိၥ်အသးဒီး(တီၤသိလိ)သုးကလၢၤအံၤစ့ၢ်ကီးဖဲအပူၤစှၤသီခါစ့ၢ်ကီး (KNLA)ထီၣ်မၤန့ၢ်ကွံၥ်ဝဲဒၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်စံးဝဲဒၣ်အိၣ်ဒီးဘၣ်ဆၣ်ဘၣ်ဃးတၢ်ထီၣ်မၤန့ၢ်ဝဲ(ထံကဆီမဲ) သုးကလၢၤတၢ်ဂ့ၢ်အံၤလၢကပၥ်ဂၢၢ်ပၥ်ကျၢၤအီၤလီၤတံၢ်လီၤစဲးကန့ၢ်အဂီၢ် ပခ့ၣ်အဲးစံၣ်-ကညီတၢ်ကစီၣ် ဆဲးကျိးမုၢ်ြတီၢ်ကီၢ်ရ့ၣ် ပှၤဘၣ်မူဘၣ်ဒါဘၣ်ဆၣ်ဆဲးကျိးတန့ၢ်ဒံး၀ဲဘၣ်အဂ့ၢ်န့ၣ်ဒုသ့ၣ်ညါဘၣ်ပှၤဒိကနၣ်တၢ်ဖိကိးဂဲၤဒဲးန့ၣ်လီၤ
