လါဒံၣ်စ့ဘၢၣ် ၁၀ သီ, ၂၀၂၄ နံၣ်, ခ့ၣ်အဲးစံၣ်
ထံဂုၤကီၢ်ဂၤတၢ်ကရၢကရိ,ပဒိၣ်ပပှၢ်ဒီးဟီၣ်ခိၣ်ဒီဘ့ၣ်ပှၤဘၣ်မူဘၣ်ဒါတဖၣ် ကဟးဆှဲးတၢ်ဖံးတၢ်မၤလၢအကဲထီၣ်တၢ်ဆီၣ်ထွဲ မၤစၢၤလၢသုးမီၤစိရိၤအတၢ်မၤပယွဲထံဖိကီၢ်ဖိခွဲးယၥ်ပူၤအဂ့ၢ်န့ၣ် ကညီဂ့ၢ်၀ီခွဲးယၥ်ကရူၢ်(KHRG)ဟ့ၣ်သဆၣ်ထီၣ်၀ဲဖဲတနံၤအံၤ လါဒံၣ်စ့ဘၢၣ် ၁၀ သီ လၢအလီၤဘၣ်၀ဲဟီၣ်ခိၣ်ဒီဘ့ၣ်ပှၤဟီၣ်ခိၣ်ဖိခွဲးယၥ်မုၢ်နံၤအံၤန့ၣ်လီၤ.
လၢဒုးယၤဂ့ၢ်၀ီမ့ၢ်ဂ့ၤ,မုၢ်ကျိၤ၀ဲၤကွၥ်မ့ၢ်ဂ့ၤဒီးတၢ်မၤသကိးအဂုၤအဂၤတမံၤဂ့ၤတမံၤဂ့ၤအဆီၣ်ထွဲမၤစၢၤ၀ဲသုးမီၤစိရိၤအတၢ်မၤပယွဲ ထံဖိကီၢ်ဖိကမျၢၢ်ခွဲးယၥ်သ့ၣ်တဖၣ်အံၤန့ၣ် ထံဂုၤကီၢ်ဂၤတၢ်ကရၢကရိ,ဟီၣ်ခိၣ်ဒီဘ့ၣ်ပှၤဘၣ်မူဘၣ်ဒါဒီး ထံဂုၤကီၢ်ဂၤပဒိၣ်ပပှၢ် တဖၣ် ကဟးဆှဲးတၢ်မၤသကိးတၢ်ဒီးသုးမီၤစိရိၤအဂ့ၢ်န့ၣ် (KHRG)လံၥ်တၢ်ဘိးဘၣ်ရၤလီၤအပူၤစံး၀ဲန့ၣ်လီၤ.
တကတီၢ်ဃီသုးမီၤစိရိၤအံၤလုၢ်သ့ၣ်ခါပတၥ်မၤကမၣ်၀ဲပှၤဟီၣ်ခိၣ်ဖိခွဲးယၥ်တၢ်ဘျၢအမဲၥ်ညါ မၤကမၣ်စ့ၢ်ကီး၀ဲဟီၣ်ခိၣ်ဒီဘ့ၣ် ပှၤဂ့ၢ်၀ီတၢ်လိၣ်ဘၣ်တၢ်ဆီၣ်ထွဲမၤစၢၤသဲစးတၢ်ဘျၢအသိး သူစ့ၢ်ကီး၀ဲကဘီယူၤခးလီၤတၢ်,ခးလီၤကျိဖးဒိၣ်,သူ၀ဲဟီၣ်လၥ် မ့ၣ်ပိၢ်အါအါဂီၢ်ဂီၢ်လၢတၢ်ထီၣ်ဒုးဒူသ၀ီသ့ၣ်တဖၣ်အပူၤအဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါ (၂၀၂၁)သုးဟံန့ၢ်တၢ်စိတၢ်ကမီၤ၀ံၤလီၢ်ခံ လၢကီၢ်ပယီၤမုၢ်ထီၣ်ကလံၤထံးဟီၣ်က၀ီၤအပူၤန့ၣ် သုးမီၤစိရိၤသူ၀ဲတၢ်စုဆူၣ်ခီၣ်တကး,မၤဆါမၤပယွဲမၤကမၣ်၀ဲပှၤဟီၣ်ခိၣ်ဖိခွဲးယၥ်ဟဲနးဒိၣ်ထီၣ်၀ဲဘၣ်ဆၣ် တၢ်ဟံထီၣ်ဖီၣ်ထီၣ်အရ့ တအိၣ်နီတမံၤဘၣ်အဃိ တၢ်ဂ့ၢ်လၢအကဲထီၣ်သးအံၤတဖၣ်ထံဂုၤကီၢ်ဂၤကပၥ်သူၣ်ပၥ်သးအါထီၣ်အဂ့ၢ်န့ၣ် (KHRG)ဟ့ၣ်သဆၣ်ထီၣ်၀ဲန့ၣ်လီၤ.
ဒ်န့ၣ်အသိးလၢသုးမီၤစိရိၤအတၢ်ဖံးတၢ်မၤအံၤအဃိ ထဲဒၣ်ကညီကီၢ်စဲၣ်တဘ့ၣ်အပူၤန့ၣ် တၢ်တယးကွၢ်၀ဲလၢကမျၢၢ်ပှၤဃ့ၢ်မှံဟးဖျိး အနီၣ်ဂံၢ်အါန့ၢ်ဒံး(တကကွဲၢ်)လံဒီး ကမျၢၢ်ထံဖိကီၢ်ဖိလၢအဘၣ်ဃ့ၢ်မှံဟးဖျိးတဖၣ်အံၤ ဘၣ်ကွၢ်ဆၢၣ်မဲၥ်၀ဲတၢ်လုၢ်အီၣ်နီၢ်ခိ သးသမူ တၢ်ဂ့ၢ်ကီတကးဒံးဘၣ်ဘၣ်ကွၢ်ဆၣ်မဲၥ်၀ဲပှၤဂ့ၢ်၀ီတၢ်လိၣ်ဘၣ်တၢ်ဆီၣ်ထွဲမၤစၢၤခီဖျိသုးမီၤစိရိၤမၤဃံးထီၣ်၀ဲတၢ်လဲၤထီၣ်က့ၤလီၤဒီးဟံန့ၢ်ဆူၣ်၀ဲပှၤကမျၢၢ်အဖိတၢ်လံၤတၢ်ပီးတၢ်လီလၢကျဲအဘိဘိအိၣ်၀ဲဘၣ်ဆၣ် တၢ်ဟံထီၣ်ဖီၣ်ထီၣ်ဂ့ၢ်၀ီတအိၣ်နီမံၤ ဘၣ်အဂ့ၢ်န့ၣ် (KHRG)စံး၀ဲန့ၣ်လီၤ.
အဃိမ့ဘၣ်ကွၢ်လၢတၢ်ဖံးတၢ်မၤသ့ၣ်တဖၣ်အံၤ ဟီၣ်ခိၣ်ဒီဘ့ၣ်ပှၤတ၀ၢအတၢ်လီၤတူၥ်လီၤကၥ်အိၣ်လၢကဟံးထီၣ်ဖီၣ်ထီၣ် မၤ၀ဲတၢ်ဟူးတၢ်ဂဲၤထီဒါသုးမီၤစိရိၤအံၤဒီးမ့မ့ၢ်တခီဟ့ၣ်၀ဲအခွဲးလၢကဆဲးမၤကမၣ်အါထီၣ်ပှၤဟီၣ်ခိၣ်ဖိခွဲးယၥ်လၢထံဖိကီၢ်ဖိကမျၢၢ် တဖၣ်အဖီခိၣ်အဂ့ၢ်န့ၣ် စံး၀ဲန့ၣ်လီၤ.
လၢသုးမီၤစိရိၤအတၢ်မၤကမၣ်ပှၤဟီၣ်ခိၣ်ဖိခွဲးယၥ်လၢအအၢအသီဒ်အံၤအဖီခိၣ်န့ၣ် (KHRG)ကိးသတြီထီၣ်၀ဲဆူ ဟီၣ်ခိၣ်ဒီဘ့ၣ်ပှၤတ၀ၢအအိၣ်တဖၣ်လၢ ကဟံထီၣ်ဖီၣ်ထီၣ်ဟူးဂဲၤတဲၥ်တဲၥ်ဖျုဖျု လၢတၢ်ကမၤကတၢၢ်ကွံၥ် သုးမီၤစိရိၤ အတၢ်မၤဘၣ်ဒိမၤပယွဲထံဖိကီၢ်ဖိကမျၢၢ်ခွဲးယၥ်အၢအၢသီသီဒီး လၢတၢ်ကဒီသဒၢ၀ဲထံဖိကီၢ်ဖိ ကမျၢၢ်လၢကီၢ်ပယီၤပူၤသ့ၣ်တဖၣ် အခွဲးအယၥ်ဒီးတၢ်အိၣ်မူခါဆူမဲၥ်ညါဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢဟီၣ်ခိၣ်ဒီဘ့ၣ်ပှၤဟီၣ်ခိၣ်ဖိခွဲးယၥ်မုၢ်နံၤဆၢက့ၤအဖီခိၣ်အံၤန့ၣ် (KHRG)ပှၤကတိၤတၢ်ပၢ စီၤနၢၤဒၣ်ဆူ စံးလီၤ၀ဲလၢ (KHRG facebook page)ပူၤဒ်အံၤ န့ၣ်လီၤ.
အ၀ဲစံး၀ဲလၢ“ပအဲၣ်ဒိးဟ့ၣ်သဆၣ်ထီၣ်ဒီးကိးသတြီထီၣ်လၢလီၢ်က၀ီၤပတီၢ်မ့ၢ်ဂ့ၤ,ဟီၣ်ခိၣ်ဒီဘ့ၣ်ပတီၢ်မ့ၢ်ဂ့ၤ,ထံဂုၤကီၢ်ဂၤပဒိၣ်ဒီးပှၤဘၣ်မူဘၣ်ဒါသ့ၣ်တဖၣ်ဃုၥ်ဒီးဘီမုၢ်စၢဖှိၣ်ကရၢဒ်သိးကဟံထီၣ်ဖီၣ်ထီၣ်၀ဲဒၣ်မူဒါဂ့ၢ်၀ီတုၤလီၤတီၤလီၤဒ်သိးကဟဲစိၥ်န့ၢ်၀ဲဒၣ်တၢ်တီတၢ်တြၢ်လၢပှၤလၢအတူၢ်ဘၣ်တၢ်လီၤဆီဒၣ်တၢ်ပှၤလၢအလဲၤခီဖျိဘၣ်တၢ်မၤဘၣ်ဒိပှၤဟီၣ်ခိၣ်ဖိခွဲးယၥ်သ့ၣ်တဖၣ်,ဒီးပှၤလၢအမၤကမၣ်တၢ်သ့ၣ်တဖၣ်ကအိၣ်ဒီးတၢ်အုၣ်ကီၤန့ၣ်လီၤ.တကတီၢ်ဃီအဲၣ်ဒိးဟ့ၣ်သဆၣ်ထီၣ်ပှၤကိးဂၤဒဲးမ်ပှၤကိးဂၤဒဲးပကဂဲၤလိၥ်သကိးဆၢထၢၣ်ဒီသဒၢသကိးပှၤဟီၣ်ခိၣ်ဖိခွဲးယၥ်ဒ်သိးပတၢ်အိၣ်မူခါဆူညါကဂ့ၤအဂီၢ်န့ၣ်လီၤ” အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးလၢဟီၣ်ခိၣ်ဒီဘ့ၣ်ပှၤဟီၣ်ခိၣ်ဖိခွဲးယၥ်မုၢ်နံၤဆၢက့ၤအဖီခိၣ်အံၤန့ၣ် KHRG ဃ့ထီၣ်တၢ်ဂ့ၢ်ခိၣ်သ့ၣ်(၇)ထံၣ်ဆူ ထံဂုၤကီၢ်ဂၤတၢ်ကရၢကရိ,ဟီၣ်ခိၣ်ဒီဘ့ၣ်ပှၤဘၣ်မူဘၣ်ဒါဒီးထံဂုၤကီၢ်ဂၤပဒိၣ်ပပှၢ်သ့ၣ်တဖၣ်လၢ ကဟ့ၣ်အါထီၣ်တၢ်သ့ၣ်ညါ နၢ်ပၢၢ်ဘၣ်ထွဲပှၤဟီၣ်ခိၣ်ဖိခွဲးယၥ်ဒီးပှၤဂ့ၢ်၀ီတၢ်လိၣ်ဘၣ်တၢ်ဆီၣ်ထွဲမၤစၢၤ,အၢၣ်လီၤတူၢ်လိၥ်သုးမီၤစိရိၤအံၤမ့ၢ်ပှၤအခိၣ်သ့ၣ်လၢ အဒုးအိၣ်ထီၣ်၀ဲပှၤဟီၣ်ခိၣ်ဖိခွဲးယၥ်ဒီးပှၤဂ့ၢ်၀ီတၢ်လိၣ်ဘၣ်တၢ်ဆီၣ်ထွဲမၤစၢၤတၢ်ဂ့ၢ်ကီ,ဟးဆှဲးမၤသကိးတၢ်ဒီးသုးမီၤစိရိၤ, နုၥ်လီၤပၣ်ဃုၥ်ပၣ်ဂီၢ်ဒီးဆီၣ်ထွဲမၤစၢၤတကီၢ်ခါတၢ်ဃိထံသ့ၣ်ညါဒီးကွီၢ်ဘျီၣ်အတၢ်ဟူးတၢ်ဂဲၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ထံဂုၤကီၢ်ဂၤပှၤဘၣ်မူဘၣ်ဒါတဖၣ်ကဆီၣ်ထွဲမၤစၢၤဂံၢ်ခီၣ်ထံးပှၤတ၀ၢတၢ်ကရၢကရိ/လီၢ်က၀ီၤကမျၢၢ်တၢ်ကရၢကရိဒီးပှၤလၢအဟူးဂဲၤဒီသဒၢပှၤဟီၣ်ခိၣ်ဖိခွဲးယၥ်တဖၣ်,မၤဆူၣ်ထီၣ်တၢ်ဆီၣ်ထွဲမၤစၢၤအကျိၤအကျဲလၢအဒိးသန့ၤထီၣ်သးလၢဂံၢ်ခီၣ်ထံးပှၤတ၀ၢတၢ်ကရၢကရိဒီးကလုၥ်ဒူၣ်တၢ်ကရၢကရိသ့ၣ်တဖၣ်လၢအအိၣ်ဒီးအကံၢ်အစီ,မၤသကိးတၢ်ဒီးဂံၢ်ခီၣ်ထံးပှၤတ၀ၢတၢ်ကရၢကရိတဖၣ်ဒ်သိးတၢ်ကဒုးအိၣ်ထီ၀ဲ တၢ်ဆီၣ်ထွဲမၤစၢၤအကျိၤအကျဲမူၤမူၤနီၢ်နီၢ်လၢပှၤလၢအတူၢ်ဘၣ်တၢ်မၤဘၣ်ဒိပှၤဟီၣ်ခိၣ်ဖိ ခွဲးယၥ် လၢထံလီၢ်ကီၢ်ပူၤသ့ၣ်တဖၣ်အဂီၢ် အဂ့ၢ်န့ၣ် (KHRG)ဃ့ထီၣ်၀ဲန့ၣ်လီၤ.
