လါဒံၣ်စ့ဘၢၣ် ၁၂ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ်အပူၤ ဖဲအပူၤကွံၥ်နွံအခါ ပယီၤသုးကလၢၤလၢအိၣ်ဆီလီၤသးဖဲကမၤမိၢ်၀့ၢ်ပူၤအံၤ တၢ်ဒုးကဲထိၣ်တအိၣ် ခးလီၤ၀ဲဒၣ်ကျိဖးဒိၣ်ဆူဖါပီၣ်သ၀ီပူၤအဃိ ဘၣ်သံ၀ဲဖိသၣ်ပိၥ်ခွါဖိတဂၤအဂ့ၢ်န့ၣ် ဒူသထူၣ်ကီၢ်ရ့ၣ်ထုးထီၣ် ပၥ်ဖျါ၀ဲဖဲမဟါ လါဒံၣ်စ့ဘၢၣ် ၁၁ သီအနံၤန့ၣ်လီၤ.
ဖဲလါဒံၣ်စ့ဘၢၣ် ၄ သီ ဟါခီ(၃)နၣ်ရံၣ်ဘျဲၣ်အဆၢကတီၢ်န့ၣ် လၢသုးက့(၅)ဟီၣ်က၀ီၤပူၤအံၤတဆီ ကမၤမိၢ်ပယီၤသုးကလၢၤ အံၤ ခးလီၤ၀ဲ(၁၂၀ မမ)ကျိဖးဒိၣ် ၅ ဖျၢၣ် ဆူ ဖၣ်အၣ်ကီၢ်ဆၣ် ၀ဲပၠၣ်ကရူၢ် ဖါပီၢ်သ၀ီပူၤအဃိ ဘၣ်သံ၀ဲစီၤတၢ်ဘိ(၈)နံၣ်အံၤတဘျီဃီဒီး ကျီၢ်သံတဒုအမဲၥ်ညါဟံၣ်တၢ်သူၣ်ထီၣ်စ့ၢ်ကီး ဟးဂီၤ၀ဲဒၣ်အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
(သုးက့ ၅)ကမၤမိၢ်ပယီၤသုးကလၢၤအံၤတမ့ၢ်ခဲအံၤဘၣ်မ့မ့ၢ်တခီအပူၤကွံၥ်တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ခးလီၤ၀ဲကျိဖးဒိၣ်အဃိ ပှၤကမျၢၢ်သံဘၣ်ဒိဘၣ်ထံးအမဲၥ်ညါတၢ်သူၣ်ထီၣ်ဟးဂီၤကဲထီၣ်တ့ၢ်သးအိၣ်၀ဲအဂ့ၢ်န့ၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အ၀ဲစံး၀ဲလၢ“ပယီၤကမၤမိၢ်သ့ၣ်,သၣ်ဂီၤကျ့ၤသ့ၣ်လၢညါခါန့ၣ်အခးလီၤကျိဖးဒိၣ်လၢပကီၢ်ရ့ၣ်ပူၤမၢ်မၢ်လီၤ.လီၤဆီဒၣ်တၢ်တၢ်မ့သီၣ်မ့သဲမတမ့ၢ်ဘၣ်ပှၤမ့လဲၤခးအီၤန့ၣ်အါလၢအခးလီၤကျိဖးဒိၣ်လၢပဟီၣ်က၀ီၤပူၤလီၤ.ပှၤတလဲၤခးအီၤဘၣ်နါက့အမ့မိၣ်သးခးလီၤ၀ဲန့ၣ်ခးလီၤ၀ဲလီၤ.ဖဲ(၄)သီအခးလီၤတၢ်ဖဲဖါပီၢ်သ၀ီန့ၣ်လၢအ၀ဲသ့ၣ်ဂီၢ်ဒုတမ့ၢ်တၢ်ကီတၢ်ခဲလၢၤဘၣ်.မ့အဲၣ်ဒိးခး၀ဲန့ၣ်ခး၀ဲလီၤ.တရ့၀ဲဒၣ်ပှၤသ၀ီဖိဒီးဒုၣ်ဒါအဆၢဘၣ်.အ၀ဲသ့ၣ်န့ၣ်အတၢ်ပညိၣ်အိၣ်လိၤလိၤလၢပှၤကမျၢၢ်ထံဖိကီၢ်ဖိဒီးမ့အဲၣ်ဒိးခး၀ဲန့ၣ်ခး၀ဲလီၤ”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါကမၤမိၢ်ပယီၤသုးကလၢၤခးလီၤကျိဖးဒိၣ်ဆူ၀ဲပၠၣ်ကရူၢ်ပူၤကဲထီၣ်၀ံၤလီၢ်ခံဖဲလါဒံၣ်စ့ဘၢၣ် ၆ သီ အနံၤန့ၣ်စ့ၢ်ကီး ပယီၤသုးတဒူၣ်ဃီ၀ဲအံၤခးလီၤကဒီး(၁၂၀ မမ)ကျိဖးဒိၣ် ၂ ဖျၢၣ်ဆူဒူသ၀ီပူၤဒီး ဘၣ်ဆၣ်တၢ်သံတၢ်ဘၣ်ဒိၣ်ဘၣ်ထံး ကဲထီၣ် တအိၣ်နီမံၤဘၣ်အဂ့ၢ်န့ၣ် ဒူသထူၣ်ကီၢ်ရ့ၣ်လံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ.
