လါဒံၣ်စဲဘၢၣ် ၁၈သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲးယူၣ်ကညီဒီကလုၥ်စၢဖှိၣ်ကရၢ,သုးက့(၇)မၤနၢၤပျီဟီၣ်ကဝီၤအပူၤသုးကီၣ်ကးပွဲၣ်(၉၁၃)သုးကလၢၤအံၤတၢ်ထီၣ်မၤန့ၢ်ကွံၥ်ဝဲဖဲအပူၤကွံၥ်လါဒံၣ်စဲဘၢၣ်(၁၆)သီအနံၤအပူၤဒီးတၢ်ထီၣ်မၤန့ၢ်ပယီၤသုးကလၢၤအံၤအပူၤ,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဖီၣ်မူဒံးန့ၢ်ဝဲသုးကီၣ်ကးအပှၤ(၆)ဂၤအကျါပၣ်ဃုၥ်ဝဲဒီးပယီၤအသုးရ့ၣ်ခိၣ်ဒီးအသုးစကီၤပတီၢ်ခံဂၤအဂ့ၢ်,ဟီၣ်ခိၣ်မဲၥ်ဖံးခိၣ်ပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုၥ်ဂၢၤသးကရၢ(KNDO)ပၥ်ဖှိၣ်သးထီၣ်မၤန့ၢ်ကွံၥ်ဝဲပွဲၣ်(၉၁၃)သုးကီၣ်ကးအသုးကလၢၤအံၤ,ပယီၤသုးအနီၢ်ဂံၢ်နီၢ်ဒွးအိၣ်ဝဲ(၃၀)ဂၤဒီး,တၢ်ဖီၣ်မူဒံးဝဲသုးကီၣ်ကးအပှၤ(၆)ဂၤအကျါပၣ်ဃုၥ်ဝဲ,အခိၣ်ခံဂၤလၢအမ့ၢ်,(၉၁၃)သုးကလၢၤ(၇တမ-၃၃၈)အသုးရ့ၣ်ခိၣ်(ဖၠိသံၣ်ဟၣ်)ဒီးသုးစကီၤပတီၢ်အပှၤတဂၤအဂ့ၢ်,ကညီဒီကလုၥ်ဂၢၤသးကရၢ,( KNDO)သုးရိၢ်မဲခိၣ်ကျၢၢ်,သုးခိၣ်ကျၢၢ်ဖိစီၤရှံလ့ၣ်စံးဝဲဒ်အံၤန့ၣ်လီၤ.
အဝဲစံးဝဲလၢ“သုးကီၣ်ကးအံၤအိၣ်ဖဲအသုးကလၢၤ(၉၁၃)အပူၤဒီးဒ်သိးကလဲၤမၤအါထီၣ်အပှၤလၢအီၣ်စ့ၣ်ယၣ်သုးကျိၤအဂီၢ်အကဘီယူၤလဲၤကိးအဝဲသ့ၣ်အိၣ်ဝဲ(၂)ဘျီလံအဃိအိၣ်တ့ၢ်ထဲအဂၤ(၃၀)လီၤ.ပထီၣ်ခးအဝဲသ့ၣ်အဆၢကတီၢ်စံၣ်ကွံၥ်အဃိ,ပဖီၣ်န့ၢ်မူဒံး(၆)ဂၤ.လၢ(၆)ဂၤအကျါပၣ်ဝဲအသုးရ့ၣ်ခိၣ်ဒီးသုးစကီၤစ့ၢ်ကီးန့ၣ်လီၤ.ခဲအံၤမ့ၢ်တၢ်ဆှၢအဝဲသ့ၣ်ဆူလဲၣ်တခီန့ၣ်,ပတသ့ၣ်ညါဒံးဘၣ်”အဂ့ၢ်စံးဝဲဒၣ်န့ၣ်လီၤ.
ဒ်သိးတၢ်ထီၣ်ဒုးမၤန့ၢ်က့ၤဝဲသုးကီၣ်ကးပွဲၣ်(၉၁၃)သုးကလၢၤတၢ်လီၢ်အံၤအဂီၢ်,(KNLA)တၢ်ပၢၢ်ဆၢသုးပၥ်ဖှိၣ်တဖၣ်ဘၣ်ဟ့ၣ်လီၤဝဲတၢ်ဆၢကတီၢ်ယံၥ်တ့ၢ်ဝဲ(၃)လါဃၣ်ဃၣ်အိၣ်ဝဲဒီး,ကးတံၥ်ကွံၥ်ဝဲဟီၣ်ခိၣ်အမဲၥ်ဖံးခိၣ်တၢ်ဆှၢထီၣ်တၢ်အီၣ်တၢ်အီအကျဲအမဲၥ်ညါ,သူဒြိခးထီၣ်ဒုးဝဲဒီး,ခးစိဝဲဒီးစနဲၣ်ဖၢၣ်အိၣ်ဝဲဒၣ်အဂ့ၢ်,ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,တၢ်ထီၣ်မၤန့ၢ်ဝဲသုးကီၣ်ကးသုးကလၢၤဘျီဝဲအံၤအပူၤ,သုးကီၣ်ကးတကပၤဘၣ်ဒိဘၣ်ထံးသံအိၣ်ဝဲအဂၤ(၂၀)ဃၣ်ဃၣ်ဒီးတၢ်ပၢၢ်ဆၢသုးပၥ်ဖှိၣ်တကပၤမၤန့ၢ်ဝဲဒုၣ်ဒါစုကဝဲၤဒ်အမ့ၢ်,(၁၂၀)မမတခိၣ်,(၈၁)မမတခိၣ်,ပွဲၣ်(၅)တခိၣ်,(MA)(၂၉)ခိၣ်အသိး,တၢ်ပၢၢ်ဆၢသုးပၥ်ဖှိၣ်တကပၤဘၣ်ဟ့ၣ်လီၤကွံၥ်ဝဲအသး(၁)ဂၤအိၣ်ဝဲအဂ့ၢ်သ့ၣ်ညါဘၣ်ဒ်ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
တကတီၢ်ဃီ,မၤနၢၤပျီဟီၣ်ကဝီၤအပူၤသုးကီၣ်ကးတဖၣ်အတၢ်လီၢ်တၢ်ကျဲပျီရှဲကွံၥ်ဝဲလံအဖီခိၣ်,ကညီဒီကလုၥ်ဂၢၤသးကရၢ,( KNDO)သုးရိၢ်မဲခိၣ်ကျၢၢ်,သုးခိၣ်ကျၢၢ်ဖိစီၤရှံလ့ၣ်စံးအါထီၣ်စ့ၢ်ကီးဝဲဒ်အံၤန့ၣ်လီၤ.
အဝဲစံးဝဲလၢ“ပမၤနၢၤပျီဟီၣ်ကဝီၤအပူၤတကီၢ်ခါခဲအံၤသုးကီၣ်ကးအတၢ်လီၢ်တၢ်ကျဲတဖၣ်ပျီရှဲဝဲလံ,လၢတၢ်န့ၣ်အဃိန့ၣ်ဃိၣ်လိၥ်ကျိဒီးသူမွဲကျိကျဲဒီတဘိအပူၤကမျၢၢ်တဖၣ်ဟးထီၣ်က့ၤလီၤသဘျ့န့ၣ်ဝဲလံ,ဒ်န့ၣ်အသိး,တမ့ၢ်ထဲဟးထီၣ်ဟးလီၤဘၣ်,ပကမျၢၢ်လီၢ်ကဝီၤဖိတဖၣ်သနါက့မၤအီၣ်မၤအီက့ၤဒ်သိးလၢညါန့ၣ်ဝဲလံ,အဃိန့ၣ်,ပအဲၣ်ဒိးတဲနၢ်ဟူက့ၤပှၤကိးဂၤဒဲးလၢကဟဲက့ၤဖံးမၤအီၣ်အီက့ၤန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
မၤနၢၤပျီဟီၣ်ကဝီၤတၢ်လီၢ်အံၤ,မ့ၢ်တ့ၢ်ဝဲ(KNU)လီၢ်ခၢၣ်သးဝဲၤလီၢ်ခိၣ်သ့ၣ်တၢ်လီၢ်တတီၤဘၣ်ဆၣ်ဖဲအပူၤကွံၥ်(၁၉၉၅)န့ၣ်လါယနူၤအါရံၤအပူၤန့ၣ်သုးကီၣ်ကးတဖၣ်စးထီၣ်နုၥ်လီၤအိၣ်ဆိးဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
ဒီးတကတီၢ်ဃီ,တကီၢ်ခါခဲအံၤ,ခီဖျိတၢ်ဒုးဖျိးကွံၥ်ဝဲသုးကီၣ်ကးပွဲၣ်(၉၁၃)သုးကလၢၤဒီးအတၢ်လီၢ်တၢ်ကျဲလၢအိၣ်ဆီလီၤသးတဖၣ်ခဲလၢၥ်လံအဃိ,မ့ၢ်ဝဲတၢ်ဂံၢ်တၢ်ဘါလၢကမျၢၢ်ထံဖိကီၢ်ဖိဒီးကညီတၢ်ပၢၢ်ဆၢဖီၣ်စုကဝဲၤဖိတဖၣ်အဂီၢ်အသိး,ဒ်သိးဟီၣ်ကဝီၤအဂၤအပူၤသုးကီၣ်ကးအတၢ်လီၢ်တၢ်ကျဲတဖၣ်ကလီၤမၢ်ကွံၥ်ဝဲအဂီၢ်,ကဆဲးမၤဝဲတၢ်ဒုးဖျိးကွံၥ်သုးကီၣ်ကးတၢ်လီၢ်တၢ်ကျဲတဖၣ်အဂ့ၢ်,ကညီတၢ်ပၢၢ်ဆၢခိၣ်နၢ်တဖၣ်စံးဝဲဒၣ်န့ၣ်လီၤ.
