လါဒံၣ်စဲဘၢၣ် ၂သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ကီးတရံးကီၢ်ဆၣ်ရၤမတံကလံၤထံးဂီၤလ့ၤဟီၣ်ကဝီၤအပူၤ သုးကီၣ်ကးအပှၤလၢအိၣ်(ရွှ့ၣ်အ့မၠဲၣ်)ဃိၣ်တၢ်လူၢ်ခိၣ်တဖၣ်ခးလီၤဝဲတၢ်အဃိ,ကမျၢၢ်လီၢ်ကဝီၤဖိတဖၣ်လဲၤဖံးလဲၤမၤက့ၤတၢ်တဘူၣ်လၢၤဘၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
အပူၤကွံၥ်လါနိၣ်ဝ့ဘၢၣ်(၂၈)သီအနံၤ(KTLA)ကီၢ်သူလ့ၤသုးမုၢ်ဒိၣ်ဖီၣ်န့ၢ်ဝဲသုးကီၣ်ကးခလရ(၅၈၅)အသုးဒ့ခိၣ်(အၣ်ကၣ်ကၠီၣ်)ဒီးအပှၤ(၁၆)ဂၤ,လၢခိးတၢ်ဘံၣ်တၢ်ဘၢဖဲရွှ့ၣ်အ့မၠဲၣ်ဃိၣ်တၢ်လူၢ်ခိၣ်တဖၣ်ဝံၤအလီၢ်ခံ,သုးကီၣ်ကးအံၤက့ၤမၤအါထီၣ်ကဒီးဝဲအပှၤလၢကခိးတၢ်ဘံၣ်တၢ်ဘၢဖဲ(ရွှ့ၣ်အ့မၠဲၣ်)ဃိၣ်တၢ်လူၢ်ခိၣ်တဖၣ်တဘျီဃီအိၣ်ဝဲအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒီးသုးကီၣ်ကးအပှၤလၢအဟဲထီၣ်အိၣ်ခိးတၢ်ဘံၣ်တၢ်ဘၢဖဲတၢ်လူၢ်ခိၣ်အသီတဒူၣ်အံၤ,ခီဖျိခးလီၤဝဲတၢ်ဆူကမျၢၢ်လီၢ်ကဝီၤဖိတဖၣ်တၢ်သူၣ်အီၣ်ဖျးအီၣ်အလီၢ်အဃိ,လီၢ်ကဝီၤဖိတဖၣ်လဲၤဖံးအီၣ်မၤအီၣ်က့ၤတၢ်တဘူၣ်ဝဲလၢၤဘၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ရွှ့ၣ်အ့မၠဲၣ်တၢ်လူၢ်ခိၣ်တဒူၣ်န့ၣ်ပှၤလဲၤမၤအီၤဝံၤတဘျီ,အဝဲသ့ၣ်ဟဲထီၣ်အိၣ်ကဒီးဝဲလၢအသီတဒူၣ်လံ,နါက့မ့ၢ်အဟဲထီၣ်အိၣ်ကဒီးဆံးအါလဲၣ်တဒုတသ့ၣ်ညါဘၣ်ဒံးဘၣ်.ပှၤဟဲထီၣ်အိၣ်ခဲအံၤတဒူၣ်န့ၣ်,မဟါတဟါအနံၤဖဲပှၤသဝီဖိလဲၤဖံးအီၣ်မၤအီၣ်တၢ်အခါ,ကွၢ်စိဝဲဒီးခးစိလီၤဝဲဒီးမီထးဖိ,ကျိစဲးလးသ့ၣ်တဖၣ်အိၣ်ဝဲန့ၣ်လီၤ.ဘၣ်ဆၣ်သဝီဖိတဖၣ်ပတနၢ်ဟူဘၣ်ဒိဘၣ်ထံးဒံးဘၣ်.နါက့,ခီဖျိအဝဲသ့ၣ်ခးလီၤစိတၢ်ဖဲ,ပှၤသဝီဖိလဲၤကူးပဲ,လဲၤဘိးဘုခ့အဆၢကတီၢ်အဃိပှၤသဝီဖိတဖၣ်ဟးထီၣ်ဟးလီၤ,လဲၤဖံးအီၣ်မၤအီၣ်က့ၤတၢ်တဘူၣ်လၢၤဘၣ်”အဂ့ၢ်စံးဝဲဒၣ်န့ၣ်လီၤ.
လၢအန့ၣ်အမဲၥ်ညါ,,ရွှ့ၣ်အ့မၠဲၣ်သဝီအံၤခီဖျိအိၣ်ဘူးဝဲဒၣ်ဒီးအူးကရ့ၣ်ထၣ်ပယီၤသုးကလၢၤအဃိသုးကီၣ်ကးအံၤဆီလီၤသးအိၣ်ဆိးခိးဝဲဒၣ်တၢ်ဘံၣ်တၢ်ဘၢလၢ,(ရွှ့ၣ်အ့မၠဲၣ်)သဝီခီခါဖၠၣ်အတၢ်လူၢ်ခိၣ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
အပူၤကွံၥ်လါနိၣ်ဝ့ဘၢၣ်(၂၈)သီအနံၤအပူၤတၢ်ဖီၣ်န့ၢ်ဝဲသုးကီၣ်ကးအပှၤ(၁၆)ဂၤအံၤ,တၢ်ဖီၣ်န့ၢ်ဃုၥ်ဝဲဒီးစုကဝဲၤတဖၣ်အသိး,တကတီၢ်ဃီ,သုးကီၣ်ကးအပှၤတဖၣ်အံၤတကီၢ်ခါခဲအံၤတၢ်ကတီၤပၥ်အဝဲသ့ၣ်တဖၣ်လၢ(KTLA)လီၢ်ခၢၣ်သးဝဲၤလီၢ်ခိၣ်သ့ၣ်တၢ်လီၢ်အပူၤအဖၢမုၢ်အဂ့ၢ်,(KTLA)လီၢ်ခၢၣ်သးပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဂီၤလ့ၤဟီၣ်ကဝီၤအပူၤအံၤသုးကီၣ်ကးအတၢ်လီၢ်တၢ်ကျဲဒ်အမ့ၢ်,ဘျၢၣ်ဒိၣ်,လ့ဂီၤ,အူးကရ့ၣ်ထၣ်,ကနဲလ့,ထံကပျၢၤ,မီခံ,ဘယ့ၣ်နီၤကိသုးကလၢၤတဖၣ်အိၣ်ဒံးဝဲဒၣ်ဒီး,ဒ်န့ၣ်အသိးအဒုးယၤသုးကလၢၤဒ်အမ့ၢ်ဂီၤလ့ၤ(စက-၁၃)ဒီးသ့ၣ်ဘီဘိ(တမ-၄၄)ဒုးယၤသုးကလၢၤသ့ၣ်တဖၣ်စ့ၢ်ကီးအိၣ်ဒံးဝဲဒၣ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
