လါဒံၣ်စဲဘၢၣ် ၁၂ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ ဖဲအပူၤကွံၥ်လါအီးကထိဘၢၣ်ဒီးလါစဲးပထ့ ဘၢၣ် လၢခံလါအတီၢ်ပူၤ ခီဖျိပယီၤသုးအကျိဖးဒိၣ်အံၤအဃိ ကမျၢၢ်ဘၣ်သံ(၃)ဂၤ, ဘၣ်ဒိ(၂၁)ဂၤအဂ့ၢ်န့ၣ် ခ့ၣ်အဲၣ်ယူၣ်-လၢၢ်ဒိၣ် ကီၢ်ဆၣ် ကညီဂ့ၢ်ဝီအူတၢ်တိစၢၤမၤစၢၤကမံးတံၥ် ထုးထီၣ်ပၥ်ဖျါဝဲဖဲမဟါလါဒံၣ်စဲဘၢၣ်(၁၁)သီအနံၤန့ၣ်လီၤ.
ဒ်လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် လၢခံလါအတီၢ်ပူၤပယီၤသုးခးလီၤကျိဖးဒိၣ်(၂၂၄)ဖျၢၣ်ဒီး အမဲၥ်ညါကဘီယူၤဟဲတ့ၢ်လီၤ မ့ၣ်ပိၢ်(၂)ဖျၢၣ်, ခးလီၤအီၤလံကၢးကျိ(၄)ဘျီတကးဒံးဘၣ် ဟဲတ့ၢ်လီၤဝဲဒြိမ့ၣ်ပိၢ်တစှၤန့ၢ်(၃၇)ဘျီအဃိ လီၢ်က၀ီၤကမျၢၢ်သံ,ဘၣ်ဒိဘၣ်ထံးကဲထီၣ်ဝဲဒၣ်ဒ်အံၤလီၤအဂ့ၢ်န့ၣ်စံး၀ဲန့ၣ်လီၤ.
ဒ်န့ၣ်အသိးခီဖျိလၢကျိဖးဒိၣ်အံၤအဃိ ကမျၢၢ်ဟံၣ်တၢ်သူၣ်ထီၣ်(၁၆)ဖျၢၣ်, သီခါဖၠၣ်(၄)ဖျၢၣ်, တၢ်ဘါယွၤသရိၥ်(၅) ဖျၢၣ်, ဒီး ကသံၣ်ဒၢး(၂)ဖျၢၣ်ဟးဂီၤဝဲဒၣ်အသိး သ၀ီပူၤဆၣ်ဖိကီၣ်ဖိသ့ၣ်တဖၣ်သံဘၣ်ဒိဘၣ်ထံးအိၣ်ဝဲအဂ့ၢ်န့ၣ်သ့ၣ်ညါဘၣ်န့ၣ်လီၤ.
တကတီၢ်ဃီလၢပယီၤသုးကီၣ်ကးအတၢ်မၤအၢမၤသီ,သူဝဲတၢ်စုဆူၣ်ခီၣ်တကးအံၤအဃိကမျၢၢ်ထံဖိကီၢ်ဖိသ့ၣ်တဖၣ် ဘၣ်ကွၢ်ဆၢၣ်မဲၥ်ဘၣ်ဝဲသးသမူတၢ်လီၢ်ဘၣ်ယိၣ်,တၢ်သံတၢ်ပှၢ်,တၢ်ဘၣ်ဒိဘၣ်ထံးဒီလၢသုးကီၣ်ကးအတၢ်ဖံးတၢ်မၤသ့ၣ်တဖၣ်အံၤအဖီခိၣ်န့ၣ် လၢၢ်ဒိၣ်ကီၢ်ဆၣ်ကညီဂ့ၢ်ဝီအူတၢ်တိစၢၤမၤစၢၤကမံးတံၥ်ထီဒါဝဲတဲၥ်တဲၥ်ဖျုဖျုအဂ့ၢ်န့ၣ် လံၥ်တၢ်ပၥ်ဖျါအပူၤ စံးဝဲန့ၣ် လီၤ.
လၢန့ၣ်အမဲၥ်ညါကမျၢၢ်ပှၤဃ့ၢ်မှံဟးဖျိးဖိတဖၣ်လၢအဝဲသ့ၣ်တၢ်ဘံၣ်တၢ်ဘၢ,တၢ်အီၣ်တၢ်အီ, တၢ်အိၣ်ဆူၣ်အိၣ်ချ့, တၢ်ကူၣ်ဘၣ်ကူၣ်သ့ဒီးတၢ်လိၣ်ဘၣ်သ့ၣ်တဖၣ်အဂီၢ်ဒ်သိးကဒိးန့ၢ်ဘၣ်ဝဲပှၤဟီၣ်ခိၣ်ဖိတၢ်ဒိသူၣ်ဒိသးတၢ်ဆီၣ်ထွဲမၤစၢၤအဂီၢ် ထံဂုၤကီၢ်ဂၤကဆီၣ်ထွဲမၤစၢၤဘၣ်ဝဲအဂ့ၢ်န့ၣ် လၢၢ်ဒိၣ်ကညီဂ့ၢ်ဝီအူတၢ်တိစၢၤမၤစၢၤကမံးတံၥ်ပၥ်ဖျါဃ့ထီၣ်စ့ၢ်ကီး၀ဲန့ၣ်လီၤ.
တကးဒံးဘၣ်ဒ်သိးတၢ်စုဆူၣ်ခီၣ်တကးလၢသုးကီၣ်ကးသူဝဲလၢကမျၢၢ်ထံဖိကီၢ်ဖိအဖီခိၣ်အံၤတဖၣ်ပကတုၥ်ကွံၥ်ဝဲအဂီၢ် ထံဂုၤကီၢ်ဂၤပဒိၣ်ပပှၢ်, ပှၤဂ့ၢ်ဝီခွဲးယၥ်တၢ်ကရၢကရိဘၣ်ထွဲတဖၣ် ကဟံးထီၣ်ဖီၣ်ထီၣ်ဝဲဂ့ၢ်ဝီတုၤလီၤတီၤလီၤအဂ့ၢ်န့ၣ် ဃ့ထီၣ်၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢဟီၣ်ကဝီၤအပူၤ တနံၣ်အံၤ(၂၀၂၄)နံၣ်အတီၢ်ပူၤအံၤန့ၣ် ပယီၤသုးကီၣ်ကး မၤကမၣ်ထီဒါဝဲ ပှၤဟီၣ်ခိၣ်ဖိခွဲးယၥ်ခဲလၢၥ်အိၣ်ဝဲ(၂,၈၃၅)ခါအဂ့ၢ် ခ့ၣ်အဲၣ်ယူၣ်-ပှၤဂ့ၢ်ဝီခွဲးယၥ်ကမံးတံၥ်(KHRC)ထုးထီၣ် ပၥ်ဖျါဃၥ်ဝဲလံၥ်တၢ်ပၥ်ဖျါအံၤဖဲလါဒံၣ်စဲဘၢၣ်(၁၀)သီအနံၤန့ၣ်လီၤ.
တကတီၢ်ဃီ ဖဲတလါအံၤလါဒံၣ်စဲဘၢၣ်အတီၢ်ပူၤအံၤန့ၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤအပူၤ ခီဖျိပယီၤသုးကျိၤဟဲနုၥ်လီၤလၢဆီထံးကီၢ်ဆၣ်ပူၤအဃိ ခၠိအ့သဝီ,ကွ့ကိသဝီ, ကီၢ်မဲသူသဝီ, ဒီး ယ့ဖၠူကၢၤသဝီ ကမျၢၢ် ပှၤနီၣ်ဂံၢ်(၂,၅၆၀)ဂၤ ဘၣ်ဃ့ၢ်ထီၣ်ဝဲအဂ့ၢ် ခ့ၣ်အဲၣ်ယူၣ်ပၥ်ဖျါတ့ၢ်ဃၥ်ဝဲစ့ၢ်ကီးန့ၣ်လီၤ.
