လါဒံၣ်စဲဘၢၣ် ၁၃ သီ, ၂၀၂၄ နံၣ်, ခ့ၣ်အဲးစံၣ်
ကညီကီၢ်စဲၣ်,ဖၣ်အၣ်ကီၢ်ရ့ၣ်,လူၢ်ပျဲၢ်ကီၢ်ဆၣ်ဟီၣ်ကဝီၤအပူၤ သုးကီၣ်ကးအံၤ ကိးထံၣ်အိၣ်ဖှိၣ်ဝဲလူၢ်ပျဲၢ်ဝ့ၢ်ပူၤ ကဝီၤဒ့ခိၣ် တဖၣ်ဒီး ဒူသဝီသးပှၢ်သ့ၣ်တဖၣ်လၢကထၢဝဲကမျၢၢ်သုးဒီး တၢ်ကဘၣ်ဆှၢထီၣ်န့ၢ်အဝဲသ့ၣ်စဲးခံကတၢၢ်ဖဲလါဒံၣ်စဲဘၢၣ်(၁၂)သီအနံၤ အဂ့ၢ်န့ၣ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဝဲဖဲအပူၤကွံၥ်လါဒံၣ်စဲဘၢၣ်(၁၁)သီအနံၤန့ၣ်လီၤ.
ဒ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် တၢ်မ့ၢ်တဆှၢထီၣ်ပှၤသးစၢ်လၢကဘၣ်ကဲသုးတဖၣ်ဘၣ်န့ၣ်, နီၢ်တဂၤကဘၣ် ဟ့ၣ်ဝဲစ့အကလီၢ်(၃၀)ကၠးဒီး တၢ်မ့ၢ်တလူၤပိၥ်မၤထွဲဝဲတၢ်ကလုၢ်ဘၣ်န့ၣ်အဝဲသ့ၣ်တဲပျံၤဝဲလၢ ကပၥ်လီၤအါထီၣ်ဝဲတၢ်သမံ သမိးတြဲၤဖဲဝ့ၢ်တၢ်နုၥ်လီၤဟးထီၣ်အလီၢ်ဒီးကဖီၣ်ဝဲကမျၢၢ်ပီၣ်တၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိ လူၢ်ပျဲၢ်ကီၢ်ဆၣ်ဒူသဝီတဖၣ်အပူၤ ဖဲသုးကီၣ်ကးကိးထံၣ်ဝဲလူၢ်ပျဲၢ်ဝ့ၢ်ကဝီၤဒ့ခိၣ်ဒီးဒူသဝီသးပှၢ်သ့ၣ်တဖၣ် လၢကထၢဝဲကမျၢၢ်သုးတၢ်ဂ့ၢ်အံၤဝံၤအလီၢ်ခံ ခီဖျိတၢ်တဆှၢထီၣ်န့ၢ်အဝဲသ့ၣ်ပှၤကညီဘၣ်အဃိ သဝီပူၤကမျၢၢ်သူၣ်ဘီၣ်သးစၢ် , သူၣ်က့သးပှၢ်တဖၣ်ဘၣ်ယိၣ်ဘၣ်ဘှီအိၣ်ထီၣ်ဝဲဒၣ်လၢခါဆူမဲၥ်ညါပယီၤသုးအတၢ်ဟူးတၢ်ဂဲၤသ့ၣ်တဖၣ်အဖီခိၣ်အဂ့ၢ်န့ၣ် လူၢ်ပျဲၢ်ကီၢ်ဆၣ်ခိၣ်ပဒိၣ်(စီၤထိနံၤ)စံးဝဲဒၣ်ဒ်အံၤန့ၣ်လီၤ.
“ဖဲမဟါလါဒံၣ်စဲဘၢၣ်(၁၂)သီအနံၤန့ၣ်ဘၣ်လဲၤဟ့ၣ်ဝဲကျိၣ်စ့မီၤနီၤ. မ့ၢ်လၢတၢ်တလဲၤဟ့ၣ်ဘၣ်အဃိဆူမဲၥ်ညါန့ၣ်ပယီၤသုးအံၤမ့ၢ် ကမၤဆူၣ်ထီၣ်ဝဲတၢ်ဟူးတၢ်ဂဲၤဒ်လဲၣ်ခီန့ၣ်အိၣ်ခိးကနၣ်ဒံးဝဲလီၤ,တၢ်လီၤဆီတအိၣ်နီမံၤဒံးဘၣ်. ကရူၢ်တဘ့ၣ်ဃ့ဝဲပှၤကမျၢၢ်န့ၣ်တ ဂၤမီၤနီၤ. မ့ၢ်လၢပှၤလဲၤဟ့ၣ်အီၤတန့ၢ်ဘၣ်ဒီးတအိၣ်ဘၣ်အဃိဃ့ဝဲလၢစ့န့ၣ်အကလီၢ်(၃၀)ကၠးလီၤ. ဃ့ဝဲကျိၣ်စ့ဒီးကမျၢၢ်န့ၣ်တၢ်တ လဲၤဟ့ၣ်ဘၣ်အဖီခိၣ်သူၣ်ဘီၣ်သးစၢ်, သူၣ်က့သးပှၢ်တဖၣ်အိၣ်ဒီးတၢ်ဘၣ်ယိၣ်ဘၣ်ဘှီမီၤနီၤ. ဘၣ်ယိၣ်ဝဲလၢသုးကီၣ်ကးကမၤကီ မၤခဲတၢ်လၢကမျၢၢ်ဒူသဝီပူၤအဃိန့ၣ်ပှၤဘၣ်ယိၣ်တၢ်လီၤ.” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢကထၢသုးအဂီၢ်သုးကီၣ်ကးကိးထံၣ်ဝဲ လူၢ်ပျဲၢ်ဝ့ၢ်ကဝီၤဒ့(က,ဃ)ခိၣ်ဒီး(ထီစွဲသဝီ, အ့နိၣ်, သ့ၣ်ပၢၤ, ကမီၣ်လဲ, တခွဲၣ်ဖိ, နိၣ်ကီ, ကွိမီၤ, မၠၣ်လ့, သၤယၤကိ, ကၠိခၠီ, အူဒီ, တဝိၤဖၢၤယၣ်သဝီ, ကၠိၣ်ပကိၥ်, တခ့ၤလိ)သဝီသးပှၢ်သ့ၣ်တဖၣ်အံၤအဂ့ၢ်န့ၣ် ခ့ၣ်အဲၣ်ယူၣ်-လီၢ်ခၢၣ်သးလံၥ်တၢ်ပၥ်ဖျါအပူၤစံး၀ဲန့ၣ်လီၤ.
လၢန့ၣ်အမဲၥ်ညါဖဲတၢ်ထုးထီၣ်ဝဲတၢ်ကလုၢ်ဝံၤလီၢ်ခံန့ၣ်ပှၤသူၣ်ဘီၣ်သးစၢ်သ့ၣ်တဖၣ်တနီၤန့ၣ်လဲၤဃုဖံးဃုမၤတၢ်လၢတၢ်လီၢ်အယံၤ အိၣ်ထီၣ်ဝဲအသိး သုးကီၣ်ကးထုးထီၣ်တၢ်ကလုၢ်ဝံၤလီၢ်ခံခီဖျိတၢ်တဆှၢထီၣ်န့ၢ်အဝဲသ့ၣ်ပှၤကညီဘၣ်အဃိ ပယီၤသုးအံၤခါဆူညါ အတၢ်ဟူးတၢ်ဂဲၤကအိၣ်ဒ်လဲၣ်န့ၣ်ဘၣ်အိၣ်ခိးကနၢ်ကွၢ်ဒံးအဂ့ၢ် လူၢ်ပျဲၢ်ကီၢ်ဆၣ်ခိၣ်စံးအါထီၣ်ဝဲဒၣ်န့ၣ်လီၤ.
ဒ်န့ၣ်အသိးပယီၤသုးကီၣ်ကးတကပၤ မ့ၢ်ဟူးဂဲၤမၤဆူၣ်ထီၣ်အတၢ်ဟူးတၢ်ဂဲၤ န့ၣ်ဘၣ်သ့ၣ်သ့ၣ်တၢ်ဘၣ်ယိၣ်ကဲထီၣ်ဝဲဒီး ဟီၣ်က၀ီၤတၢ်ပၢၢ်ဆၢသုးကရူၢ်သ့ဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံး၀ဲန့ၣ်လီၤ.
