KTLA မၤသံ KNLA သုးဒ့ခိၣ်၂ တဂၤအဂ့ၢ် KNLAစံးဝဲ

လါဒံၣ်စဲဘၢၣ် ၁၀သီ, ၂၀၂၄ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄), ဘျံးဒဝဲၢ်ကီၢ်ရ့ၣ်ဟီၣ်ကဝီၤ ကီၢ်သူလ့ၤသုးမုၢ်ဒိၣ် KTLA မၤသံဝဲဒၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLAသုးရ့ၣ် ၁၂, သုးဒ့(၄), အသုးဒ့ခိၣ်(၂)အဂ့ၢ် သ့ၣ်ညါဘၣ်လၢ KNLAသုးရ့ၣ်(၁၂)အပှၤဘၣ်မူဘၣ်ဒါအအိၣ်န့ၣ်လီၤ.

ဖဲလါဒံၣ်စဲဘၢၣ်(၈)သီအနံၤန့ၣ် သုးရ့ၣ်(၁၂),သုးဒ့(၄),အသုးရ့ၣ်ခိၣ်(၂) စီၤဖါကၠိအံၤ လဲၤဆှၢဝဲဒၣ် ကစၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါဆူ လၢၢ်ဒိၣ်စိကီၢ်ဆၣ်,သုးရ့ၣ်(၁၀)ဟီၣ်ကဝီၤဒီး(ဆဲးကၢး)ဒ်သိးကလဲၤတၢ်ကူၣ်လိၥ်တၢၣ်ပီၣ်အဂီၢ်ဒီး ဖဲအဝဲဟဲက့ၤလၢကျဲအခါဘၣ်တၢ်ခိးခးသံအီၤလၢ KTLA အဂ့ၢ် သုးရ့ၣ်(၁၂)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤဒါဒါစံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.

အဝဲစံးဝဲလၢ“သုးဒ့(၄),သုးဒ့ခိၣ်(၂) ကၠီဖါကၠိအံၤဟဲဆှၢဝဲဒၣ် ကီၢ်ဆၣ်ပှၤဘၣ်မူဘၣ်ဒါလၢကဘၣ်ဟဲထီၣ်ဝဲ တၢ်အိၣ်ဖှိၣ်လၢသုးရ့ၣ်(၁၀)ဟီၣ်ကဝီၤအဂီၢ်န့ၣ်လီၤ. အပူၤကွံၥ်န့ၣ်အဝဲသ့ၣ်ဆဲးကျၢဆဲးကျိးလိၥ်သးလီၤ.ဆိမိၣ်ဝဲလၢကဘၣ်ဂ့ၢ်ဘၣ်ဝီဒီးအဟဲဝဲန့ၣ်တဟဲကိးအသကိးစ့ၢ်ကီးဘၣ်.အဟဲဆှၢဝဲဝံၤက့ၤလၢကျဲဒီး ဒါဃ့ၢ်သ့ၣ်ခိးခးအီၤန့ၣ်လီၤ. ကတဲဝဲလၢ က ကမူၤကမၣ်ဧါန့ၣ်ပတသ့ၣ်ညါဒ်ဘၣ်.လၢအဝဲသ့ၣ်တကပၤတထံၣ်တၢ်ကစီၣ်ထီၣ်နီတမံၤဒံးဘၣ်.တၢ်ကဲထီၣ်သးန့ၣ်ပှၤကမျၢၢ်လဲၤထံၣ်ချုးန့ၣ်လီၤ.ဒီးဖဲန့ၣ်ပှၤဟ့ၣ်ပှၤတၢ်ကစီၣ်အိၣ်ဒီဒူၣ်န့ၣ်လီၤ.တၢ်လီၢ်ဖဲန့ၣ်ပယီၤတအိၣ်ဘၣ်.အဝဲသ့ၣ်ကိးပတုၥ်ဝဲဖဲ(စိၤဖၠါသဝီ)ဝံၤခးဝဲအခီၣ် ၂ထံၣ်,ဝံၤက့ၤတွံၢ်ဝဲဒီးက့ၤမၤသံဝဲလၢ (အိယ့ၤကၠံ)တိၤဖီလၥ်ဝံၤဝၥ်ဘၢဝဲလၢမဲးဒီးဖဲ လါဒံၣ်စဲဘၢၣ်(၉)ဟါခီန့ၣ် သုးဒ့ခိၣ်လဲၤထံၣ်က့ၤအစိၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.

လၢန့ၣ်အမဲၥ်ညါ KTLA လၢအခးသံဝဲ KNLA သုးရ့ၣ်(၁၂)အပှၤဘျီဝဲအံၤန့ၣ် မ့ၢ်ဝဲ ကီၤလၤဖိ(ကိး)သုးခိၣ်အဲၣ်ခွံအပှၤ လၢဘၣ်တၢ်တီခိၣ်ရိၣ်မဲအီၤလၢ ဒါဃ့ၢ်(ဒါဂ့ၤ)ဒီး လၢကဘှါရှဲတၢ်ကဲထီၣ်သးဘျီဝဲအံၤအဂီၢ် ဒါဃ့ၢ်ဒီးအပှၤသ့ၣ်တဖၣ်အံၤဃ့ၢ်ပဒ့ၣ်သးဒီးတူၢ်ထံၣ်သးလၢကတဲပၠးတၢ်ကဲထီၣ်သးအဂ့ၢ်အကျိၤဘၣ်အဂ့ၢ် သုးခိၣ်ဒိၣ်ဂီၢ်ဂ့ၢ်စီၤဒါဒါတဲအါထီၣ်တဲဒၣ်စ့ၢ်ကီးန့ၣ်လီၤ.

သုးက့(၄)ဟီၣ်ကဝီၤပူၤ ခီဖျိ KTLA ခိးခး KNLA ဒီး KNU အပှၤဘၣ်မူဘၣ်ဒါသ့ၣ်တဖၣ်အဃိ သုးက့(၄)ပှၤဘၣ်မူဘၣ်ဒါ သံ(၃)ဂၤအကျါပၣ်ဃုၥ် သုးက့(၄)သုးဂ့ၢ်ဝီခိၣ် သုးခိၣ်ဒိၣ်ဖိစီၤဖိဆံးအသိး ဘၣ်ဒိတစှၤန့ၢ်(၅)ဂၤအကျါပၣ်ဃုၥ်ဒီးကီၢ်ဆၣ်ပှၤဘၣ်မူဘၣ်ဒါသ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ.

ဘၣ်ဃးဒီးတၢ်ဂ့ၢ်ဝဲအံၤအဖီခိၣ်န့ၣ်ဒ်သိးပကသ့ၣ်ညါအါထီၣ်ဘၣ်(KTLA)တကပၤတၢ်ပၥ်သးအဂီၢ်ကညီကွဲၤလ့လိၤဆဲးကျိးသံကွၢ်ဒီးသုးက့(၄)(KTLA)အပှၤဘၣ်မူဘၣ်ဒါဘၣ်ဆၣ်ဆဲးကျိးတန့ၢ်ဒံးဘၣ်အဂ့ၢ်ဒုးသ့ၣ်ညါဘၣ်ပှၤဒိကနၣ်တၢ်ဖိကိးဂၤဒဲးန့ၣ်လီၤ.