လါယနူၤအါရံၤ ၂၉ သီ, ၂၀၂၅ နံၣ်, ခ့ၣ်အဲးစံၣ်
မဲးပြ့ခံပယီၤသုးကလၢၤလၢအိၣ်ဆီလီၤသးဖဲခ့ၣ်အဲၣ်ယူၣ်-ဒူသထူၣ်ကီၢ်ရ့ၣ် ဘံလ့ကီၢ်ဆၣ်ပူၤအံၤ လါယနူၤအါရံၤဒီတလါ အတီၢ်ပူၤအံၤ သုးကီၣ်ကးအကဘီယူၤလဲၤကွံၥ်လီၤတၢ်ဘိၣ်လၢသုးကလၢၤပူၤဒီး တၢ်ဘိၣ်လၢတၢ်လဲၤတ့ၢ်လီၤ၀ဲတဖၣ် ကျိချံပှၥ် သၣ် အမဲၥ်ညါပၣ်ဃုၥ်၀ဲကသံၣ်မူၤဘှီးအါမးအဂ့ၢ်န့ၣ် သ့ၣ်ညါဘၣ်လၢသုးက့ပှၤဘၣ်မူဘၣ်ဒါအအိၣ်န့ၣ်လီၤ.
စးထီၣ်ဖဲလါယနူၤအါရံၤထီၣ်တုၤလၢခဲအံၤန့ၣ် ဟီၣ်က၀ီၤကညီဒီကလုၥ်ဂၢၤသးကရၢ (KNDO) သုးရ့ၣ်(၂) စးထီၣ်မၤ၀ဲ ဒုးယၤတၢ်ရဲၣ်တၢ်ကျဲၤလၢမဲးပြ့ခံသုးကလၢၤအံၤအဃိ ကျိဖးဒိၣ်အမဲၥ်ညါကဘီယူၤဟဲကွံၥ်လီၤ၀ဲသုးတၢ်ဖိတၢ်လံၤ, တၢ်အီၣ်တၢ်အီ, ကျိချံပှၥ်သၣ်အမဲၥ်ညါ ပၣ်ဃုၥ်၀ဲကသံၣ်မူၤဘှီး(ကသံၣ်ကသ့ၣ်)အဂ့ၢ်န့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ်လီၤ.
“ယသံကွၢ်လၢယပှၤအိၣ်လၢတၢ်မဲၥ်ညါန့ၣ်ကဘီယူၤဟဲကွံၥ်လီၤတၢ်န့ၣ်ပၣ်ဃုၥ်လၢကသံၣ်မူၤဘှီး,သံးနါက့ပၣ်စ့ၢ်. .အကသံၣ် တဖၣ်န့ၣ်အိၣ်အမံၤမံၤလီၤ,လၢအကမူၣ်အိၣ်,အထံနါက့အိၣ်စ့ၢ်. ပၣ်ဃုၥ်ဒီးခီၣ်ယီၢ်မ့ၣ်ပိၢ်သ့ၣ်တဖၣ်ဒီဒူၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးစးထီၣ်ဖဲဟီၣ်က၀ီၤသုးပၥ်ဖှိၣ်ကရူၢ်စးထီၣ်မၤဒုးယၤဂ့ၢ်၀ီတၢ်ရဲၣ်တၢ်ကျဲၤအခါန့ၣ် ပယီၤသုးကလၢၤအံၤခးလီၤ၀ဲကျိဖးဒိၣ် အဃိ ဒူသ၀ီလၢအိၣ်ဘူးဖဲန့ၣ်လၢအမ့ၢ်အံစူၢ်ခံ,ကစၢၢ်ဖိသ၀ီပူၤဟံၣ်တၢ်သူၣ်ထီၣ်ဟးဂီၤ၀ဲအိၣ်အမဲၥ်ညါ ကရူၢ်(၂)ဘ့ၣ် သ၀ီ(၁၂)ဖျၢၣ် ကမျၢၢ်(၂၀၀၀၀)ဘျဲၣ်ဘၣ်ဃ့ၢ်ထီၣ်၀ဲတုၤလၢခဲအံၤတက့ၤဘၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ် န့ၣ်လီၤ.
တကးဒံးဘၣ်လၢန့ၣ်အမဲၥ်ညါခီဖျိဒုးယၤတၢ်ဖ့ၣ်စၢဒီးကျိဖးဒိၣ်အံၤအဃိ ကၠိ(၉)ဖျၢၣ် ဘၣ်ဆိကတီၢ်ကွံၥ်တၢ်မၤလိ တၢ်ဆၢကတီၢ် ထီၣ်ဘးလၢတလါဃၣ်ဃၣ်လံဒီး ဒ်န့ၣ်အသိးပှၤကၠိဖိလၢအဃ့ၢ်ထီၣ်သ့ၣ်တဖၣ်အံၤတဖံးလိမၤဒိးဘၣ်တၢ်လၢၤ တုၤလၢခဲအံၤ အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် လၢမဲးပြ့ခံသုးကလၢၤအခိၣ်အဃၢၤန့ၣ် ဒုးယၤတၢ်ဖ့ၣ်စၢ ဆဲးကဲထီၣ်ဒံး၀ဲ လၢခံခီခံကပၤအဘၢၣ်စၢၤအဖၢမုၢ်တုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
