လါယနူၤအါရံၤ ၂၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢဟီၣ်ကဝီၤအပူၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်,ကညီဒီကလုၥ်ဂၢၤသးကရၢဃုၥ်ဒီးအတၢ်တီခိၣ် ရိၣ်မဲအဖီလၥ်တၢ်ပၢၢ်ဆၢသုးပၥ်ဖှိၣ်သ့ၣ်တဖၣ်တနံၣ်အတီၢ်ပူၤတၢ်ဒုးကဲထီၣ်ဝဲဒီးပယီၤသုးကီၣ်ကးအဘၢၣ်စၢၤအိၣ်ဝဲအဘျီ(၃၀၀၀)ဘျဲၣ်ဒီးပယီၤသုးတကပၤစ့ၢ်ကီးသံအဂၤ(၃၀၀၀)ဘျဲၣ်အဂ့ၢ်ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပၥ်ဖျါဝဲဖဲမဟါလါယနူၤအါရံၤ(၂၄)သီအနံၤန့ၣ်လီၤ.
လၢခ့ၣ်အဲၣ်ယူၣ်တၢ်ပၢဟီၣ်ကဝီၤဒူသထူၣ်ကီၢ်ရ့ၣ်,တီအူကီၢ်ရ့ၣ်,ချၢၣ်လွံၢ်ထူၣ်ကီၢ်ရ့ၣ်,ဘျံးဒဝဲၢ်ကီၢ်ရ့ၣ်,မုၢ်ြတီၢ်ကီၢ်ရ့ၣ်,ဒူပျၥ်ယၥ်ကီၢ်ရ့ၣ်,ဒီးဖၣ်အၣ်ကီၢ်ရ့ၣ်သ့ၣ်တဖၣ်အပူၤ(၂၀၂၄)နံၣ်အတီၢ်ပူၤအံၤတၢ်ဒုးအဆံး,တၢ်ဒုးဖးဒိၣ်ကဲထီၣ်ဝဲခဲလၢၥ်တစှၤန့ၢ်(၃၂၂၉)ဘျီဘၣ်အမဲၥ်ညါပယီၤသုးတကပၤသံစှၤန့ၢ်(၃၁၃၆)ဂၤဒီးဘၣ်ဒိဘၣ်ထံးဝဲ(၂၂၂၅)ဂၤဃၣ်ဃၣ်အဂ့ၢ်န့ၣ်တၢ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ.
လၢန့ၣ်အမဲၥ်ညါ(၂၀၂၄)နံၣ်အတီၢ်ပူၤတၢ်ဒုးကဲထီၣ်ဝဲဒီးပယီၤသုးခိၣ်သုးနၢ်ဃုၥ်ဒီးသုးဖိသ့ၣ်တဖၣ်လၢအကထိဘျဲၣ်ဘၣ်သံဘၣ်ပှၥ်,ဘၣ်ဒိဘၣ်ထံးဝဲတကးဒံးဘၣ်တၢ်ဖီၣ်မူဒံးန့ၢ်ဝဲပယီၤသုးစးထီၣ်လၢအဒုးယၤခိၣ်ပတီၢ်ဒီးတုၤလီၤလၢအသုးဖိပတီၢ်သ့ၣ်တဖၣ်လၢအကယၤဘျဲၣ်အဂ့ၢ်သ့ၣ်ညါဘၣ်လၢတၢ်ပၥ်ဖျါအပူၤန့ၣ်လီၤ.
မ့ၢ်ဘၣ်ကွၢ်က့ၤဒ်ခ့ၣ်အဲၣ်ယူၣ်တၢ်ပၥ်ဖျါပူၤအသိးန့ၣ်ချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤအပူၤတၢ်ဒုးကဲထီၣ်ဝဲအဘျီ(၇၀၀)ဘျဲၣ်,ပယီၤသုးသံ(၉၉၁)ဂၤဒီးမ့ၢ်ကီၢ်ရ့ၣ်တဘ့ၣ်လၢပယီၤသုးသံအနီၣ်ဂံၢ်အါကတၢၢ်ကီၢ်ရ့ၣ်တဘ့ၣ်န့ၣ်လီၤ. ဒ်န့ၣ်အသိးမုၢ်တြီၢ်ကီၢ်ရ့ၣ်ဟီၣ်ကဝီၤ အပူၤစ့ၢ်ကီးတၢ်ဒုးကဲထီၣ်ဝဲခဲလၢၥ်အိၣ်(၉၄၇)ဘျီ,ပယီၤသုးသံ(၅၉၆)ဂၤဒီးမ့ၢ်ကီၢ်ရ့ၣ်ခံဘ့ၣ်တဘ့ၣ်လၢပယီၤသုးသံအါကတၢၢ်န့ၣ်လီၤ.
ဒ်န့ၣ်အသိးတၢ်ဒုးကဲထီၣ်ဝဲလၢခံခီခံကပၤဒ်အံၤအဖီခိၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်,ကညီဒီကလုၥ်ဂၢၤသးကရၢဃုၥ်ဒီးအတၢ်တီခိၣ်ရိၣ်မဲအဖီလၥ်တၢ်ပၢၢ်ဆၢသုးပၥ်ဖှိၣ်ကရူၢ်တကပၤသ့ၣ်တဖၣ်ဘၣ်သံဝဲဒၣ်အဂၤ(၁၀၀)ဃၣ်ဃၣ်ဒီးဘၣ်ဒိဘၣ်ထံးဝဲဒၣ်(၃၂၅)ဂၤဃၣ်ဃၣ်အဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပၥ်ဖျါဝဲဒၣ်စ့ၢ်ကီးန့ၣ်လီၤ.
တကတီၢ်ဃီခီဖျိလၢဒုးယၤတၢ်သဘံၣ်သဘုၣ်အဃိအတၢ်ပိၥ်ထွဲထီၣ်အသးလၢအမ့ၢ်ကမျၢၢ်သ့ၣ်တဖၣ်ဘၣ်ဃ့ၢ်အိၣ်ကဒုသးအနီၣ်ဂံၢ်ဟဲအါထီၣ်ဝဲအသိးစးထီၣ်လၢသုးမီၤစိရိၤဟံးန့ၢ်ဆူၣ်တၢ်စိတၢ်ကမီၤတုၤလီၤလၢ(၂၀၂၃)နံၣ်,နံၣ်ကတၢၢ်န့ၣ်ပှၤလီၢ်အိၣ်ကမှံဖိအနီၣ်ဂံၢ်အိၣ်ဝဲ(၇၅၀,၀၀၀)ဘျဲၣ်ဘျဲၣ်အခိၣ်အဃၢၤဒီးတုၤလီၤလၢ(၂၀၂၄)နံၣ်,လါစဲးပထ့ဘၢၣ်အတီၢ်ပူၤန့ၣ်ပှၤလီၢ်အိၣ်ကမှံဖိအနီၣ်ဂံၢ်ဟဲအိၣ်ထီၣ်တုၤလၢ(၁)ကကွဲၢ်ဘျဲၣ်လံအဃိတၢ်ဘၣ်ကွၢ်ဆၢၣ်မဲၥ်ဘၣ်ဝဲတၢ်အီၣ်တၢ်အီတၢ်လိၣ်ဘၣ်သ့ၣ်တဖၣ်အိၣ်ဒံးဝဲအဖၢမုၢ်န့ၣ်လီၤ.
