လါယနူၤအါရံၤ ၂၇ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် ဟးတရဲၥ်ကရူၢ်အပူၤကွံၥ်စှၤသီအခါ ခီဖျိကဘီယူၤလဲၤကွံၥ်လီၤမ့ၣ်ပိၢ်အဃိ လီၢ်က၀ီၤကမျၢၢ်လၢအစံၣ်ထီၣ်ဟးပလဲၥ်သးတဖၣ်ခဲအံၤတနီၤန့ၣ် က့ၤအိၣ်လၢသ၀ီပူၤ လံဘၣ်ဆၣ် ဘၣ်အိၣ်ဒံး၀ဲဒၣ်လၢတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
အပူၤကွံၥ်လါယနူၤအါရံၤ ၂၁ သီဒီး ၂၂ သီအနံၤ တၢ်ဒုးကဲထီၣ်တအိၣ်ပယီၤသုးကဘီယူၤပညိၣ်လဲၤတ့ၢ်လီၤမ့ၣ်ပိၢ်ပိၢ်လၢ ဟးတရဲးကရူၢ် ကြူကၠံဒူသ၀ီတၢ်လီၢ်အဃိ သ၀ီခံဖျၢၣ်အံၤကမျၢၢ်အမဲၥ်ညါကမျၢၢ်လၢအိၣ်ဘူးဖဲန့ၣ်တဖၣ်ပျံၤတၢ်ဃ့ၢ်ထီၣ်၀ဲန့ၣ်လီၤ. ဘၣ်ဆၣ်တကီၢ်ခါခဲအံၤပှၤကမျၢၢ်လၢအဃ့ၢ်ထီၣ်တဖၣ်တနီၤန့ၣ်က့ၤအိၣ်လၢ သ၀ီပူၤအိၣ်တနီၤလံဘၣ်ဆၣ် ဘၣ်အိၣ်ဒံး၀ဲလၢ တၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါဒီးကမျၢၢ်တဖၣ်အအိၣ်န့ၣ်လီၤ.
ဘၣ်ဃးတၢ်ဂ့ၢ်အံၤဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ “လီၢ်ခံကတၢၢ်တၢ်အိၣ်သးဒုခီဖျိ ကဘီယူၤ တဟဲကွံၥ်လီၤတၢ်ဘၣ်ဘျီအ၀ဲသ့ၣ်က့ၤအိၣ်လၢသ၀ီပူၤအိၣ်တနီၤ.ကဘီယူၤမ့ဟဲဒီးစံၣ်,ပှၤလၢအသူၣ်က့သးပှၢ်ညါန့ၣ်မံလၢတၢ်ပူၤ.အ၀ဲသ့ၣ်န့ၣ်အိၣ်လၢတၢ်ပလီၢ်ဒီးတၢ်ပျံၤတၢ်ဖုးအပူၤလီၤ.ပှၤလၢအအိၣ်ဒီးအတီၤအဒဲတဖၣ်ညါန့ၣ်အိၣ်၀ဲလၢအတီၤအဒဲန့ၣ်.ပှၤလၢအတီၤအဒဲတအိၣ်ဘၣ်ညါန့ၣ် ဟးစံၣ်အိၣ်၀ံၤဟဲက့ၤအိၣ်ကနၣ်ထံ၀ဲဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
တကးဒံးဘၣ်လၢန့ၣ်အမဲၥ်ညါ စးထီၣ်ဖဲကဘီယူၤလဲၤခးလီၤတၢ်၀ံၤလီၢ်ခံန့ၣ် လီၢ်က၀ီၤဖဲန့ၣ်အပူၤကၠိစ့ၢ်ကီးတၢ်အိးထီၣ်၀ဲ တဘူၣ်လၢၤဘၣ်တုၤလၢခဲအံၤခီဖျိလီၢ်က၀ီၤကမျၢၢ်ဒီးပှၤဘၣ်မူဘၣ်ဒါဘၣ်ယိၣ်၀ဲလၢကဘီယူၤကဟဲခးလီၤကဒီးတၢ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ လၢတအဲၣ်ဒိးပၥ်ဖျါအမံၤတဂၤ စံးစ့ၢ်ကီး၀ဲန့ၣ်လီၤ.
အ၀ဲစံး၀ဲလၢ“ဒ်သိးပသ့ၣ်ညါဖဲကဘီယူၤဟဲကွံၥ်လီၤတၢ်၀ံၤလီၢ်ခံန့ၣ်စးထီၣ်လၢမဲၢ်သဲခံသ၀ီဟဲလီၤတုၤလၢြကူကၠံကၠိ,ဖှၣ်ဂီၤကၠိန့ၣ် ပှၤပံးဃၥ်ကိးဖျၢၣ်ဒဲးလီၤ.တၢ်လီၢ်ဖဲအံၤတဖၣ်န့ၣ်ပှၤဘၣ်ပျံၤတၢ်ခဲလၢၥ်လီၤ.ပယီၤသုးန့ၣ်လၢအကဟဲထီၣ်လၢအခီၣ်န့ၣ်တအိၣ်ဘၣ်. ဘၣ်ဆၣ်နဘၣ်ပျံၤဒိၣ်လၢကဘီယူၤတခါန့ၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးလၢကမျၢၢ်တၢ်ဖံးအီၣ်မၤအီၣ်တကပၤစ့ၢ်ကီး စးထီၣ်ဖဲကဘီယူၤဟဲခးလီၤတၢ်လီၤတဲၥ်ပိၢ်ဖးထီၣ်လၢရီဘၢၣ်ကျီးပူၤ ကဲထီၣ်၀ံၤလီၢ်ခံန့ၣ် ပှၤကမျၢၢ်လၢအရီဘၢၣ်ကျီးအိၣ်ဘူးဖဲတၢ်ကဲထီၣ်သးအခိၣ်အဃၢၤန့ၣ်တဖၣ် ဆၢကတီၢ်လၢဘၣ်ကွးရီဘၢၣ် လံဘၣ်ဆၣ်အ၀ဲသ့ၣ်လဲၤကွးက့ၤရီဘၢၣ်တဘူၣ်၀ဲလၢၤဘၣ်ဒီး တနီၤန့ၣ်လဲၤထီၣ်က့ၤလီၤ,လဲၤဖံးမၤတၢ်လၢတၢ်ပလီၢ်အပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဟးတရဲၥ်ကရူၢ်အပူၤ အပူၤကွံၥ်လါယနူၤအါရံၤ ၂၁ သီ မုၢ်ဃ့ၢ်လီၤ ၃း၀၀ နၣ်ရံၣ်ဃၣ်ဃၣ်အဆၢကတီၢ် သုးကီၣ်ကး(Jet fighter) ကဘီယူၤ လဲၤတ့ၢ်လီၤမ့ၣ်ပိၢ်(၂)ဖျၢၣ် လီၤတဲၥ်ပိၢ်ဖးထီၣ်၀ဲလၢ ကြူကၠံဒီးဖှၣ်ဂီၤသ၀ီဘၢၣ်စၢၤ ရီဘၢၣ်ကျီးပူၤ၀ံၤ မုၢ်ဆ့ၣ်ထီၣ် ၂၂ သီ ဟါခီ ၈ နၣ်ရံၣ်ဘျဲၣ်အဆၢကတီၢ် ကဘီယူၤလဲၤတ့ၢ်လီၤကဒီး၀ဲမ့ၣ်ပိၢ်ခံဖျၢၣ်လီၤတဲၥ်ပိၢ်ဖးထီၣ်၀ဲလၢကြူကၠံသ၀ီဃၢၤကျဲပူၤအဃိ ဖဲန့ၣ်ကမျၢၢ်တၢ်သူၣ်ထီၣ်,ဆဲးကၢးတခိၣ်ဃုၥ်ဒီးရီဘၢၣ်ထူၣ်ကၢ်လီၤဘၣ်ဒိဘၣ်ထံး၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
