လါယနူၤအါရံၤ ၂၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ စှၤသီအတီၢ်ပူၤအံၤ ပယီၤသုးသူ၀ဲဒၣ်ဒြိ ဟးတ့ၢ်လီၤမ့ၣ်ပိၢ်ဟဲအါထီၣ်လၢကမျၢၢ်အိၣ်ဆိးလီၢ်ကျဲဒီး ပှၤကမျၢၢ်တၢ်သူၣ်ထီၣ်ဟးဂီၤကဲထီၣ်သးအိၣ်၀ဲတလီၢ်လီၢ် အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
စးထီၣ်ဖဲတလါအံၤလါယနူၤအါရံၤ ၁၆ သီအနံၤန့ၣ် သုးကီၣ်ကးအံၤလၢပကိကီၢ်ခီဒိၣ်(သုးက့ ၃)ဟီၣ်က၀ီၤအံၤတဆီ ဆှၢထီၣ်၀ဲ ဒြိ(၂၀)ဘ့ၣ်ဆူကၠဲးထိၣ်ကီၢ်ဆၣ်ပူၤ အသုးကလၢၤတၢ်လီၢ်သ့ၣ်တဖၣ်ဒီး ဖဲန့ၣ်၀ံၤလီၢ်ခံပယီၤသုးအံၤသူ၀ဲဒၣ်ဒြိ ဟးကွံၥ်လီၤ မ့ၣ်ပိၢ်ဆူလီၢ်က၀ီၤကမျၢၢ်အိၣ်ဆိးလီၢ်ကျဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤ စံး၀ဲ န့ၣ်လီၤ.
အစံး၀ဲလၢ“သုးကီၣ်ကးန့ၣ်အဆှၢထီၣ်ဒြိလၢသုးတြိၤ(၄၄)န့ၣ်(၅)ဘ့ၣ်ဒီးလၢ(၂၀၇)သုးရ့ၣ်န့ၣ်ဆှၢထီၣ်၀ဲ(၅)ဘ့ၣ်,ဖဲမိၣ်ပလ့ၤန့ၣ်(၅)ဘ့ၣ်,လၢလဲၣ်ပၤပ့ၤန့ၣ်(၅)ဘ့ၣ်.စးထီၣ်ဖဲ(၁၆)သီန့ၣ်ပယီၤသုးအံၤသူအါ၀ဲဒၣ်လၢဒြိ၀ံၤဟးတ့ၢ်လီၤမ့ၣ်ပိၢ်မၢ်မၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ပယီၤသုးဆှၢထီၣ်ဒြိ၀ံၤလီၢ်ခံ ဖဲအပူၤကွံၥ်လါယနူၤအါရံၤ ၁၈ သီဒီး ၁၉ သီအနံၤ ခီဖျိ(၃၁၀)အမျိၥ်သုးဒီး(၄၄)အမျိၥ်သုး ခးလီၤကျိဖးဒိၣ်,ကွံၥ်လီၤဒြိမ့ၣ်ပိၢ်လီၤတဲၥ်ပိၢ်ဖးထီၣ်၀ဲလၢခရၢၢ်ကရူၢ်, အံလူၢ်ကရူၢ် ဒူသ၀ီပူၤအဃိ ပှၤကမျၢၢ်ဘၣ်ဒိ(၁)ဂၤအမဲၥ်ညါ မ့ၣ်အူတၢၣ်,ဟံၣ်တၢ်သူၣ်ထီၣ်တစှၤန့ၢ်(၃)ဖျၢၣ်ဟးဂီၤ၀ဲအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
ဘၣ်ဃးတၢ်ဂ့ၢ်အံၤဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤဃီ၀ဲန့ၣ်စံး၀ဲလၢ“ကျိဖးဒိၣ်ဒီးဒြိန့ၣ်ကွံၥ်၀ဲကိးမုၢ်နံၤဒဲးလီၤ.ဖဲမဟါန့ၣ်ကွံၥ်၀ဲဒီးဒြိန့ၣ်(၃)ဖျၢၣ်ဒံး.ကျိဖးဒိၣ်နါက့ခး၀ဲဒၣ်လၢခရၢၢ်တကပၤန့ၣ်သီၣ်မၢ်မၢ်လီၤ.မ့ၢ်အလီၤဖဲလဲၣ်တကပၤဒုတသ့ၣ်ညါဒံးဘၣ်.အဒြိလၢအဟဲကွံၥ်လီၤ၀ဲတဖၣ်လီၤတဲၥ်အါဒၣ်တက့ၢ်လၢကျဲမုၢ်ဖးဒိၣ်အကပိၤကပၤန့ၣ်လီၤ.လၢအစီၤစုၤဒီးကါကျဲကပၤန့ၣ်တလီၤတဲၥ်နါစိၤဘၣ်” အဂ့ၢ်န့ၣ် စံး၀ဲန့ၣ်လီၤ.
ကၠဲးထိၣ်ကီၢ်ဆၣ်ဟီၣ်က၀ီၤအပူၤ အပူၤကွံၥ်ပယီၤသုးအံၤသူ၀ဲဒြိတအိၣ်ဘၣ်ဘၣ်ဆၣ် စးထီၣ်ဖဲအပူၤကွံၥ်စှၤသီအခါ ဆှၢထီၣ်ဒြိ၀ံၤလီၢ် ခံန့ၣ် အ၀ဲသ့ၣ်သူ၀ဲဒြိဟးတ့ၢ်လီၤမ့ၣ်ပိၢ်ဟဲအါထီၣ်အါန့ၢ်အပူၤကွံၥ်လၢညါ အဂ့ၢ်န့ၣ် လီၢ်က၀ီၤပှၤဘၣ် မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲအပူၤကွံၥ်လါယနူၤအါရံၤ ၁၆ သီ ဟါခီ ၆ နၣ်ရံၣ်ဘျဲၣ်ဒီး ၁၇ သီ ၇ နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး လၢဘံလ့ကီၢ်ဆၣ်အပူၤ ပယီၤသုးခီၣ်ချ့သုးရ့ၣ်(ခမရ-၄၀၅) လၢအိၣ်မဲးပြ့ခံသုးကလၢၤအံၤတဖၣ် ခးလီၤကျိဖးဒိၣ်လီၤတဲၥ်ပိၢ်ဖးထီၣ် ၀ဲလၢအံစူၣ်ခံသ၀ီပူၤ(၁)ဖျၢၣ်ဒီးသ၀ီချၢ(၁)ဖျၢၣ်အဃိ ကမျၢၢ်ဟံၣ်တၢ်သူၣ်ထီၣ်(၁)ဖျၢၣ်,ထံကမျၢၢ်(၁)ဖျၢၣ်ဒီးနးစ့ၣ်ဟးဂီၤ၀ဲဒၣ် အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်အပူၤန့ၣ်လီၤ.
တကတီၢ်ဃီတနံၤဃီဖဲလါယနူၤအါရံၤ ၁၇ သီ ဟါခီ ၅း၀၀ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး သုးကီၣ်ကးအကဘီယူၤ (Jet Fighter) လဲၤတ့ၢ်လီၤ၀ဲမ့ၣ်ပိၢ်(၂)ဖျၢၣ်လီၤတဲၥ်ပိၢ်ဖးထီၣ်၀ဲလၢမဲးပြ့ခံကရူၢ် ကစၢၢ်ဖိသ၀ီဃၢၤအဃိ ဟံၣ်ဟးဂီၤ၀ဲတဖျၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
