လါယနူၤအါရံၤ ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ခီဖျိသုးကီၣ်ကးအမျိၥ်သုးခးလီၤကျိဖးဒိၣ်အဃိ ကမျၢၢ်ဟံၣ် တၢ်သူၣ်ထီၣ်အူအီၣ်အကျါ စ့ပယီၤ(၆၅)ကလီၢ်ပၣ်ဃုၥ်၀ဲလၢမ့ၣ်အူကျါအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူ ဘၣ်ဒါ အအိၣ်န့ၣ်လီၤ.
ကၠဲးထိၣ်ကီၢ်ဆၣ်ပူၤ ဖဲအပူၤကွံၥ်လါယနူၤအါရံၤ ၁၀ သီ မုၢ်ဃ့ၢ်လီၤ ၁း၂၀ မံးနံးဘျဲၣ်အဆၢကတီၢ် တၢ်ဒုးကဲထီၣ်တအိၣ် သုးကီၣ်ကး(၄၄)အမျိၥ်သုး ခးလီၤကျိဖးဒိၣ်လီၤတဲၥ်ပိၢ်ထီၣ်၀ဲလၢ တကွံပူၤကရူၢ် တကွံပူၤသ၀ီ ထံညၣ်အိတကပၤအဃိ အူအီၤစိ အဟံၣ်အူအီၣ်ကွံၥ်၀ဲဒီတဖျၢၣ်ဒီးဖဲန့ၣ်အစ့အကလီၢ်(၆၀)ဘျဲၣ်အမဲညါ မ့ၣ်အူအီၣ်ပၣ်ဃုၥ်၀ဲ အထူ(၇)ဘှဲအဂ့ၢ်န့ၣ် ကီၢ်ရ့ၣ်တၢ်မၤနီၣ် အပူၤပၥ်ဖျါ၀ဲန့ၣ်လီၤ.
ပှၤကမျၢၢ်ဟံၣ်တၢ်သူၣ်ထီၣ်ဃုၥ်ဒီးထူစ့အူအီၣ်တကးဒံးဘၣ်အမဲၥ်ညါ အူအီၤစိအံၤလၢကတ့ထီၣ်အဟံၣ်လၢအသီအဂီၢ် သ့ၣ်လၢအပှ့ၤဃၥ်ပၥ်ဃၥ်၀ဲလၢဟံၣ်ဖီလၥ်အံၤတဖၣ်စ့ၢ်ကီးအူအီၣ်ပၣ်ဃုၥ်၀ဲခဲလၢၥ်အဂ့ၢ်န့ၣ် ပှၤလၢအအိၣ်ဘူးဖဲတၢ်ကဲထီၣ်သးအံၤ အခိၣ်အဃၢၤတဂၤ စံး၀ဲဒၣ်ဒ်အံၤန့ၣ်လီၤ.
အ၀ဲစံး၀ဲလၢ“ထူလၢမ့ၣ်အီၣ်၀ဲန့ၣ်အကဲ၀ဲဒၣ်အကိၣ်လိၣ်လီၤ.အဟံၣ်န့ၣ်အလီၢ်လံၤလၢအကတ့ထီၣ်ဟံၣ်အဂီၢ်အပှ့ၤဃၥ်သ့ၣ်. ပၥ်ဃၥ်၀ဲလၢဟံၣ်ဖီလၥ်ဘျီမ့ၣ်အူအီၣ်ပၣ်ဃုၥ်၀ဲခဲလၢၥ်န့ၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကတီၢ်ဃီတၢ်တနံၤဃီ၀ဲန့ၣ် ပယီၤသုးခးလီၤကျိဖးဒိၣ်(၅)ဖျၢၣ်လီၤတဲၥ်ပိၢ်ဖးထီၣ်၀ဲလၢတကွံပူၤသ၀ီ ထံညၣ်အိ(၂)ဖျၢၣ်, လၢကရၣ်၀့ဆ့ၣ် ထးခီန့ၣ်(၂)ဖျၢၣ် ဟံၣ်ဟးဂီၤတဖျၢၣ်ဒီး လၢအအိၣ်တ့ၢ်တဖျၢၣ်န့ၣ် တပိၢ်ဖးထီၣ်ဒံး၀ဲဘၣ်အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ် န့ၣ်လီၤ.
ဒ်န့ၣ်အသိးဘံလ့ကီၢ်ဆၣ်အပူၤ ဖဲအပူၤကွံၥ်လါယနူၤအါရံၤ ၃ သီအနံၤန့ၣ် တၢ်ဒုးကဲထီၣ်တအိၣ်နးကၠံပယီၤသုးကလၢၤခးလီၤ ကျိဖးဒိၣ်အဃိ ဘၣ်သံ၀ဲနးကၠံက၀ီၤဒ့ဖိ အူသါထိ(၅၅)နံၣ်အံၤဒီးအဖိဒိၣ်မုၣ် မၣ်သဲအံၣ်စိ(၂၈)နံၣ်အမဲၥ်ညါ ဘၣ်ဒိစ့ၢ်ကီး၀ဲဒၣ်(၃)ဂၤ ကဲထီၣ်တ့ၢ် အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.