လါယနူၤအါရံၤ ၃၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ် တနီသရံၣ်ကီၢ်ဆၣ်အပူၤ ဖဲလါယနူၤအါရံၤ(၂၉)သီအနံၤန့ၣ် ပယီၤသုးလၢ အိၣ် (လဲၤတီၤယၤ)သဝီခိၣ်ဃၢၤတဖၣ်ခးလီၤကျိဖးဒိၣ်ဆူ(လဲၤတီၤယၤ)သဝီပူၤအဃိ သ၀ီဖိပိၥ်မုၣ်ဘၣ်ဒိ(၅)ဂၤအကျါပၣ်ဃုၥ် ပိၥ်မုၣ်ဖိသၣ်(၁၃)နံၣ်တဂၤဒီးကသံၣ်သရၣ်မုၣ်တဂၤအဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါ စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲမဟါအနံၤအံၤ န့ၣ်လီၤ.
ပယီၤသုးကီၣ်ကးလၢအမ့ၢ်ခီၣ်ချ့သုးရ့ၣ်(ခမရ-၅၅၇)အံၤ တၢ်ဒုးတၢ်ယၤကဲထီၣ်တအိၣ်ဘၣ် ဘၣ်ဆၣ်ခးလီၤဝဲကျိဖးဒိၣ်ဆူ (လဲၤတီၤယၣ်)သဝီပူၤအဃိ တၢ်ဘၣ်ဒိဘၣ်ထံးဘၣ်ဟဲကဲထီၣ်ဒ်အံၤလီၤဒီး ပှၤလၢအဘၣ်ဒိသ့ၣ်တဖၣ်အံၤ ဘၣ်တၢ်ဆှၢအဝဲသ့ၣ်ဆူ တၢ်ဆါဟံၣ်အဂ့ၢ်န့ၣ် တနီသရံၣ်ကီၢ်ဆၣ် ပှၤဘၣ်မူဘၣ်ဒါ ပဒိၣ်စီၤထံဝါစံးဝဲဒ်အံၤန့ၣ်လီၤ.
အဝဲစံးဝဲလၢ “ဒုၣ်ဒါ(ခမရ-၅၅၇)အံၤအိၣ်လၢအသုးရ့ၣ်အပူၤဒီးခးလီၤကျိဖးဒိၣ်ဆူတနီသရံၣ်အဝ့ၢ်ဃၢၤ(လဲၤတီၤယၣ်)သဝီပူၤန့ၣ်တၢ် ဒုးကဲထီၣ်အသးတအိၣ်ဘၣ်ဒီးခးလီၤကျိဖးဒိၣ်အဃိဘၣ်ဒိဝဲပှၤပိၥ်မုၣ်(၅)ဂၤလၢအမ့ၢ်ဝဲ ဒီၣ်ခၠံၣ် ၄၅ နံၣ်, ဒီၣ်သါကၠံၣ် အနံၣ် ၇၀, သဲစူၣ်လဲၤ ၃၈ နံၣ် မ့ၢ်ဝဲကသံၣ်သရၣ်မုၣ်, သံသံစိ ၃၂ နံၣ်, ဒီး မၡံၣ်ခူခၠိ ၁၃ နံၣ် သ့ၣ်တဖၣ်အံၤဘၣ်ဒိဘၣ်ထံးဝဲမီၤနီၤ. အခဲအံၤတၢ် ဆှၢလီၤအဝဲသ့ၣ်ဆူဘျံးဝ့ၢ်တၢ်ဆါဟံၣ်လံ.” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ(လဲၤတီၤယၣ်)သဝီအံၤ ဟံၣ်ခိၣ်အိၣ်ဝဲခဲလၢၥ်အဖျၢၣ်(၅၀၀)ဘျဲၣ်ဒီး အ၀ဲသ့ၣ်အံၤကဃ့ၢ်ပူၤဖျဲးထီၣ်သးအဂီၢ်စ့ၢ်ကီး ဃ့ၢ်ဝဲတဘၣ်မ့ၢ်လၢပယီၤသုးကီၣ်ကးအံၤအိၣ်ဝဲဖဲ(လဲၤတီၤယၣ်)သဝီအခိၣ်ထိးဒီးသဝီခံလီၤတၢ်လီၢ်သ့ၣ်တဖၣ်အဂ့ၢ်န့ၣ် ပဒိၣ်စီၤထံဝါ စံးအါထီၣ်ဝဲဒၣ်န့ၣ်လီၤ.
ပယီၤသုးအံၤပညိၣ်ပၥ်ပနီၣ်ဝဲပှၤကမျၢၢ်လိၤလိၤဒီးခးလီၤဝဲကျိဖးဒိၣ်ဆူဒူသဝီပူၤအဃိ ကဲထီၣ်ဝဲတၢ်ပျံၤတၢ်ဖုးဖးဒိၣ်လၢ ကမျၢၢ်အဂီၢ်ဒီး ဒ်န့ၣ်အသိးတကီၢ်ခါအခဲအံၤပယီၤသုးနုၥ်လီၤဖီၣ်ကမျၢၢ်သုးလၢဒူသဝီပူၤအိၣ်ဝဲအဃိ ကမျၢၢ်သ့ၣ်တဖၣ်ဘၣ်အိၣ်ဒီး တၢ်ပလီၢ်လၢ ပယီၤသုးကနုၥ်လီၤဖီၣ်အဝဲသ့ၣ်,ကခးလီၤဝဲကျိဖးဒိၣ်,ကဒွဲၣ်အူအဝဲသ့ၣ်ဟံၣ်ဃီအခါဖဲလဲၣ်န့ၣ် ဘၣ်ယိၣ်ဝဲထီဘိအဂ့ၢ်န့ၣ် လီၢ်ကဝီၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးတနီသရံၣ်ကီၢ်ဆၣ် ပဝၣ်ကိသဝီအပူၤ ဖဲလါယနူၤအါရံၤ(၂၃)သီအနံၤန့ၣ်စ့ၢ်ကီး ပယီၤသုးအမျိၥ်သုးရ့ၣ်(အမတ-၃၀၆) လၢအအိၣ်ဆီလီၤအသးဖဲ(မီၣ်တိ)သဝီအမုၢ်ထီၣ်သ့ၣ်တဖၣ် တၢ်ဒုးတၢ်ယၤကဲထီၣ်တအိၣ်ဘၣ်ဆၣ် မ့ၢ်လၢခးလီၤကျိဖးဒိၣ်အဃိ ပဝၣ်ကိ သဝီဖိ(၇)ဂၤဘၣ်ဒိကဲထီၣ်တ့ၢ်အသးဒံးအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးတ့ၢ်ဘၣ်ဝဲခ့ၣ်အဲးစံၣ်-ကညီတၢ်ကစီၣ်အိၣ်ဝဲ န့ၣ်လီၤ.
