လါယနူၤအါရံၤ၂၉သီ, ၂၀၂၄နံၣ်, ခ့ၣ်အဲးစံၣ်,
တၢ်ဂ့ၢ်လၢကအုၣ်ကီၤဝဲကညီဒီတကလုၥ်အဘူၣ်အတီၢ်န့ၣ်,မ့ၢ်ဒၣ်ထဲကညီဖိတဖၣ်အတၢ်ဃူတၢ်ဖိး,တၢ်ပၥ်ဖှိၣ်လီၤအဂ့ၢ်,ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,အကရၢခိၣ်ဆီၣ်တခူစံးလၢ(၇၆)ဝီတဝီကညီတၢ်ပၢၢ်ဆၢမုၢ်နံၤအလံၥ်ဟ့ၣ်ယုၢ်အပူၤန့ၣ်လီၤ.
ကညီကလုၥ်အဘူၣ်အတီၢ်အံၤ,အိၣ်ဝဲဒၣ်လၢကညီဒီတကလုၥ်အစုပူၤလီၤအဃိ,တၢ်ဂ့ၢ်လၢကအုၣ်ကီၤဝဲကညီဒီကလုၥ်အဘူၣ်အတီၢ်န့ၣ်မ့ၢ်ဒၣ်ထဲကညီဖိတဖၣ်အတၢ်ဃူတၢ်ဖိးဒီးတၢ်ပၥ်ဖှိၣ်မၤသကိးတၢ်လီၤအဂ့ၢ်,ခ့ၣ်အဲၣ်ယူၣ်ကရၢခိၣ်,ပဒိၣ်စီၤကွဲၤထူဝ့ကတိၤပၥ်ဖျါဝဲဖဲ(၇၆)ဝီတဝီကညီတၢ်ပၢၢ်ဆၢမုၢ်နံၤအလံၥ်ဟ့ၣ်ယုၢ်အပူၤ,လၢကလီၤဘၣ်ဝဲဖဲတလါအံၤလါယနူၤအါရံၤ(၃၁)သီအနံၤအပူၤန့ၣ်လီၤ.
လၢန့ၣ်အမဲၥ်ညါ,တနံၣ်အံၤ(၇၆)ဝီတဝီပှဲၤထီၣ်ကညီတၢ်ပၢၢ်ဆၢအမုၢ်နံၤအံၤ,ဟ့ၣ်ဝဲတၢ်ယူးယီၣ်ဆူကညီဒီကလုၥ်ခိၣ်နၢ်,သိၣ်ဒူပှၤကလုၥ်ထံဖိကီၢ်ဖိကမျၢၢ်လၢဘၣ်ဟ့ၣ်လီၤသးသမူသွံၣ်ထံက့ၢ်ဂီၤ,ဂံၢ်ဘါတဖၣ်အအိၣ်ဒီး,စံးဘျူးဆၢဂ့ၤဆၢဝါဝဲခိၣ်နၢ်သိၣ်ဒူထံဖိကီၢ်ဖိကမျၢၢ်တဖၣ်လၢအတၢ်ဟ့ၣ်လီၤသးလၢတၢ်ဂဲၤလိၥ်ဒီတကတီၢ်ပူၤအဂ့ၢ်,လံၥ်ဟ့ၣ်ယုၢ်အပူၤပၥ်ဖျါဝဲဒၣ်န့ၣ်လီၤ.
ဒီးဖဲ(၇၆)ဝီတဝီပှဲၤထီၣ်ကညီတၢ်ပၢၢ်ဆၢမုၢ်နံၤအပူၤအံၤန့ၣ်,ကညီအတၢ်ပၢၢ်ဆၢအတၢ်မၤနၢၤအဂံၢ်ခိၣ်သ့ၣ်အံၤဒိးသန့ၤထီၣ်ဝဲအသးလၢကညီဒီတကလုၥ်အတၢ်ဃူတၢ်ဖိးတၢ်ပၥ်ဖှိၣ်မၤသကိးတၢ်အဃိ,ကညီတၢ်ပၢၢ်ဆၢအံၤဘၣ်ထွဲဝဲဒီးကညီဒီတကလုၥ်ဒီးမ့ၢ်ဝဲကညီဒီကလုၥ်အမူအဒါလၢကဘၣ်မၤပှဲၤထီၣ်ဝဲကညီကလုၥ်အတၢ်မိၣ်န့ၢ်သးလီအဂ့ၢ်,(၇၆)ဝီတဝီတၢ်ပၢၢ်ဆၢမုၢ်နံၤလံၥ်ဟ့ၣ်ယုၢ်အပူၤခ့ၣ်အဲၣ်ယူၣ်ကရၢခိၣ်ဆီၣ်တခူစံးစ့ၢ်ကီးဝဲဒၣ်စ့ၢ်ကီးန့ၣ်လီၤ.
တကးဒံးဘၣ်,ဒ်သိးကအိၣ်ဒီးတၢ်စံၣ်ညီၣ်ပၢလီၤက့ၤကညီအဘူၣ်အတီၢ်အဂီၢ်,ပှၤကညီကလုၥ်တဖၣ်ကဘၣ်နုၥ်လီၤဂဲၤလိၥ်သကိးဝဲဃူဃူဒီးဒူဒူလၢတၢ်ဂဲၤလိၥ်အပူၤလၢလီၢ်သနၢၣ်ဒၣ်ဝဲစုၥ်စုၥ်ဒီးကဘၣ်ပၥ်ပနီၣ်လိၥ်သးလၢအမ့ၢ်ကညီကလုၥ်တၢ်ကရၢကရၢကရိလၢအမၤတၢ်လၢပှၤကလုၥ်အဂီၢ်တဖၣ်အဂ့ၢ်,ပၥ်ဖျါစ့ၢ်ကီးဝဲဒၣ်လၢလံၥ်ဟ့ၣ်ယုၢ်အပူၤန့ၣ်လီၤ.
တကတီၢ်ဃီ,ဒ်သိးထံကီၢ်တဘ့ၣ်အံၤကအိၣ်မုၥ်အိၣ်ခုၣ်အဂီၢ်,ကမၤကတၢၢ်ကွံၥ်ဝဲသုးမီၤစိရိၤအက့ၢ်အဂီၤဒီးအတၢ်ပၢတၢ်ြပးလၢထံကီၢ်တဘ့ၣ်အံၤအပူၤအဂီၢ်,ကျဲအိၣ်ဝဲဒၣ်ထဲတဘိလၢတၢ်ကဘၣ်သူၣ်ထီၣ်ဝဲထံကီၢ်အံၤလၢ“ဖဲၣ်ဒၢၣ်ရၢၣ်ဒံၣ်မိၣ်ကရ့ၣ်စံၣ်ကီၢ်စၢဖှိၣ်”အဂ့ၢ်,ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး,ထံကီၢ်တဘ့ၣ်အံၤကအိၣ်မုၥ်အိၣ်ခုၣ်အဂီၢ်,ကဘှါရှဲထံကီၢ်တဘ့ၣ်အံၤအတၢ်ဘၣ်ဂံၥ်ဂုၥ်အဂီၢ်,ဃ့ထီၣ်ဝဲဟီၣ်ခိၣ်ဘီမုၢ်စၢဖှိၣ်ကရၢဒီးထံကီၢ်လၢအိၣ်ဘူးအိၣ်တံၢ်တဖၣ်လၢကဆီၣ်ထွဲမၤသကိးတၢ်ဒီးကလုၥ်ဒူၣ်ထံဖိကီၢ်ဖိအတၢ်ကရၢကရိ,လၢအဘၣ်ဘျိးဘၣ်ဒါဖိးမံဒီးထံကီၢ်အံၤအတၢ်အိၣ်သးနီၢ်နီၢ်အဂ့ၢ်,လံၥ်ဟ့ၣ်ယုၢ်အပူၤပၥ်ဖျါဝဲဒၣ်န့ၣ်လီၤ.
