Home တၢ်ကစီၣ် ဒုးယၤတၢ်ဘၣ်ဂံၥ်ဂုၥ်အိၣ်ထီၣ်အဃိ ၀့ၢ်ဒ၀ဲၢ်ဆူမဲၥ်သမံၢ်ခံကျဲမုၢ် ကမျၢၢ်တဘၣ်လ့ၢ်ထီၣ်လ့ၢ်လိၤဘၣ်အဂ့ၢ် KTLA ထုးထီၣ်ဟ့ၣ်ပလီၢ်၀ဲ

ဒုးယၤတၢ်ဘၣ်ဂံၥ်ဂုၥ်အိၣ်ထီၣ်အဃိ ၀့ၢ်ဒ၀ဲၢ်ဆူမဲၥ်သမံၢ်ခံကျဲမုၢ် ကမျၢၢ်တဘၣ်လ့ၢ်ထီၣ်လ့ၢ်လိၤဘၣ်အဂ့ၢ် KTLA ထုးထီၣ်ဟ့ၣ်ပလီၢ်၀ဲ

174
0

လါယနူၤအါရံၤ ၁၁ သီ, ၂၀၂၅ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ် (သုးက့ ၄) ထံမိၢ်ပှၢ်ဟီၣ်က၀ီၤအပူၤ တကီၢ်ခါခဲအံၤခီဖျိဒုးယၤတၢ်ဘၣ်ဂံၥ် ဂူၥ်အိၣ်ထီၣ်လၢ၀့ၢ်ဒ၀ဲၢ်-မဲၥ်သမံၢ်ခံကျဲမုၢ်ဖးဒိၣ်အဃိ ကမျၢၢ်ထံဖိကီၢ်ဖိဃုၥ်ဒီးသိလ့ၣ်(မီထိၣ်)တဖၣ်လ့ၤတက့ၤတဘၣ် လ့ၢ်ထီၣ်လ့ၢ် လိၤဘၣ်အဂ့ၢ်န့ၣ် တနီသရံၣ်ကီၢ်ခီ ကီၢ်သူလ့ၤကညီသုးမုၢ်ဒိၣ်(KTLA) ဆၣ်ကဆီသုးတြိၤ ထုးထီၣ်ဟ့ၣ်ပလီၢ်၀ဲ ဖဲမဟါ လါယနူၤ အါရံၤ ၁၀ သီအနံၤန့ၣ်လီၤ.

ဒ်(KTLA)လံၥ်တၢ်ဟ့ၣ်ပလီၢ်ပူၤပၥ်ဖျါ၀ဲအသိးန့ၣ် ထံမိၢ်ပှၢ်ဟီၣ်က၀ီၤဃုၥ်ဒီး၀့ၢ်ဒ၀ဲၢ်-မဲၥ်သမံၢ်ခံအ့ရှါကျဲမုၢ်န့ၣ် ခီဖျိဒုၣ်ဒါမၤအါထီၣ်အဂံၢ် အဘါဒီးတၢ်ဒုးတၢ်ယၤအိၣ်ထီၣ်အဃိ ထံဖိကီၢ်ဖိကမျၢၢ်ဃုၥ်ဒီးသိလ့ၣ်(မီထိၣ်)ဖးဒိၣ်, သိလ့ၣ်တီၣ်ပှၤလဲၤတၢ်က့ၤတၢ်ဖိတဖၣ် လ့ၤတက့ၤတဘၣ်လ့ၢ်ထီၣ်လ့ၢ်လိၤဘၣ်အဂ့ၢ်န့ၣ် စံး၀ဲန့ၣ်လီၤ.

ဒ်န့ၣ်အသိးလၢကီၢ်သူလ့ၤကညီသုးမုၢ်ဒိၣ်(KTLA)အတၢ်ဟ့ၣ်ပလီၢ်အံၤ လီၢ်က၀ီၤကမျၢၢ်ထံဖိကီၢ်ဖိတဖၣ်မ့တတူၢ်လိၥ်လူၤပိၥ်မၤထွဲ ၀ဲဘၣ်ဒီးတၢ်ဂ့ၢ်ကီမ့အိၣ်ထီၣ်,တၢ်ဘၣ်ဒိဘၣ်ထံးမ့အိၣ်ထီၣ်သပျၢၤန့ၣ် တမ့ၢ်လၢဆၣ်ကဆီသုးတြိၤ/ဆၣ်ဃံလၤသုးရ့ၣ် ခိၣ်နၢ်ပှၤဘၣ်မူ ဘၣ်ဒါလ့ၤတက့ၤတဟ့၀ဲမူဒါဘၣ်အဂ့ၢ်န့ၣ် လံၥ်တၢ်ပၥ်ဖျါပူၤစံး၀ဲန့လီၤ.

လံၥ်တၢ်ဟ့ၣ်ပလီၢ်လၢတၢ်ထုးထီၣ်ဘိးဘၣ်ရၤလီၤ၀ဲအံၤန့ၣ်မ့ၢ်၀ဲ ကီၢ်သူလ့ၤသုးမုၢ်ဒိၣ်(KTLA) ဆၣ်ကဆီသုးတြိၤ ဆၣ်ဃံလၤသုးရ့ၣ် သုးရ့ၣ်ခိၣ်-၁ သုးခိၣ်ဒိၣ်ဂီၢ်ဂ့ၢ် စီၤပါမွ့ ဒီး သုးရ့ၣ်ခိၣ်-၂ သုးခိၣ်ဒိၣ်ဖိ စီၤကလုၥ်ဒိၣ်ထူ ခံဂၤအံၤဆဲးလီၤ၀ဲမံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဖဲအပူၤကွံၥ်တလါအံၤလါယနူၤအါရံၤ ၃ သီအနံၤစ့ၢ်ကီး လၢဒ၀ဲၢ်-ထံခံကျဲန့ၣ် ကီၢ်သူလ့ၤသုးမုၢ်ဒိၣ်(KTLA) သုးခိၣ်အဲၣ်ခွံအပှၤ ခိးခး၀ဲ ကညီဒီကလုၥ်တၢ်ထူၣ် ဖျဲးမုၢ်ဒိၣ်(KNLA) သုးရ့ၣ်(၁၀) လၢကျဲပူၤအဃိ သုးဒ့ခိၣ်-၂ သုးခိၣ်စီၤလါဒိၣ်သံ၀ဲဒီး ဘၣ်ဒိ၀ဲဒၣ်တဂၤ ကဲထီၣ်န့ၢ်အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.