လါဒံၣ်စဲဘၢၣ် ၃သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်ပယီၤလၢကဟဲမၤစၢၤခၠိနဲၣ်ဒုးယၤသုးကလၢၤ,ဂံၢ်ဘါ(၁၅၀)ဘျဲၣ်လၢအဟဲထီၣ်သ့ၣ်တဖၣ်အံၤ,ကညီတၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်တဖၣ်ခိးခးအဝဲသ့ၣ်လၢကျဲတၢ်ဘၢၣ်စၢၤအဃိ,တၢ်သံဘၣ်ဒိဘၣ်ထံးအိၣ်အါဝဲအဂ့ၢ်,သုးဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
ပယီၤသုး(စ့ၣ်ကူၣ်)သ့ၣ်တဖၣ်အံၤဒ်သိးကမၤအါထီၣ်ဝဲအသုးဂံၢ်ဘါဒီးကဆီတလဲက့ၤဝဲအဒုးယၤခိၣ်အဂီၢ်,ဖဲအပူၤကွံၥ်လါဒံၣ်စဲဘၢၣ်လၢၥ်အပူၤ,အသုးကျိၤခံကျိၤဟဲထီၣ်ဝဲဆူနိၣ်ခၠိနဲၣ်လၢခိကျဲတကပၤဒီး,ခီဖျိတၢ်ပၢၢ်ဆၢသုးပၥ်ဖှိၣ်တကပၤခိးခးတြီတံၥ်ဃၥ်အဝဲသ့ၣ်အဃိ,တကီၢ်ခါခဲအံၤအတၢ်ဘၣ်ဒိဘၣ်ထံးအိၣ်အါဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်န့ၣ်လီၤ.
ခီဖျိတၢ်ပၢၢ်ဆၢသုးပၥ်ဖှိၣ်တကပၤခိးခးအဝဲသ့ၣ်တဖၣ်အဃိ,ပယီၤသုး(စ့ၣ်ကူၣ်)လၢဟဲထီၣ်သ့ၣ်တဖၣ်အံၤ,ဘၣ်ဒိဘၣ်ထံးကအိၣ်ဝဲလၢအဂၤ(၅၀)(၆၀)ခိၣ်ဃၢၤဒီးသံ,စံၣ်ပြံပြါဝဲကအိၣ်လၢအဂၤ(၃၀)ဃၣ်ဃၣ်အဃိ,တုၤလီၤက့ၤလၢအသုးကလၢၤအပူၤအိၣ်က့ၤဝဲဒၣ်ထဲအဂၤ(၃၀)ဃၣ်ဃၣ်လီၤအဂ့ၢ်,(KNLA)ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ.
“ပယီၤသုးတဖၣ်န့ၣ်ဟဲထီၣ်ကအိၣ်အဂၤ(၁၅၅)န့ၣ်လီၤ.ဟဲထီၣ်လၢခိကျဲလီၤ.ပှၤအိၣ်ခိးခးအဝဲသ့ၣ်လၢတၢ်ဘၢၣ်စၢၤအဃိန့ၣ်,အသံဒီးလီၢ်မၢ်န့ၣ်ကအိၣ်လၢအဂၤ(၃၀)န့ၣ်လီၤ.မ့မ့ၢ်လၢအဘၣ်ဒိဘၣ်ထံးန့ၣ်ကအိၣ်လၢ(၅၀)ဘျဲၣ်(၆၀)ညါ,အဃိန့ၣ်အပှၤလၢအတုၤဆူသုးကလၢၤပူၤအိၣ်က့ၤထဲအဂၤ(၃၀)န့ၣ်လီၤ”အဂ့ၢ်စံးဝဲဒၣ်န့လီၤ.
လၢန့ၣ်အမဲၥ်ညါ,သုးကီၣ်ကးအပှၤလၢတုၤဆူအသုးကလၢၤပူၤအဂၤ(၃၀)အကျါပၣ်ဃုၥ်ဝဲဒီးအဒုးယၤခိၣ်သီ(မ့ခဲၣ်)လၢကဟဲဆီတလဲအသးဒီး(ဝနၣ်လဲၤ)တဂၤအသိး,အသုးရ့ၣ်ခိၣ်(၂)ဂၤပၣ်ပိၥ်ဝဲအခံအဂ့ၢ်,အဂ့ၢ်အဝဲစံးအါထီၣ်ဝဲဒၣ်န့ၣ်လီၤ.
တကတီၢ်ဃီ,ပယီၤသုးအဒုးယၤခိၣ်သီ(မ့ခဲၣ်)ဒီးအပှၤလၢဟဲထီၣ်ဆီတလဲလီၢ်သ့ၣ်တဖၣ်အံၤမ့ၢ်ဝဲ(တမ)(၄၄)အစုတီၤဖီလၥ်သ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ.
သုးကီၣ်ကးလၢဟဲထီၣ်တဖၣ်အံၤတၢ်ဘၣ်ဒိဘၣ်ထံးအိၣ်အါဝဲအမဲၥ်ညါ,တၢ်ပၢၢ်ဆၢသုးပၥ်ဖှိၣ်မၤန့ၢ်စ့ၢ်ကီးဝဲစုကဝဲၤတၢ်ပီးတၢ်လီလၢအဝဲသ့ၣ်တဖၣ်အအိၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
နိၣ်ခၠိနဲၣ်ပယီၤဒုးယၤသုးကလၢၤအံၤအိၣ်ဝဲဖဲဃိၣ်သၢဖျၢၣ်,သရိၥ်ဝါကျဲမုၢ်အဖီခိၣ်တၢ်လီၢ်အပူၤဒီးမ့ၢ်ဝဲသုးကလၢၤအရ့ဒိၣ်ဖးဒိၣ်တဖျၢၣ်လၢပယီၤသုးတဖၣ်အဂီၢ်အဃိဒ်သိးသုးကလၢၤအံၤသုတလီၤကွံၥ်တဂ့ၤအဂီၢ်,သုးကီၣ်ကးအံၤသူကဘီယူၤဆှၢထီၣ်ဝဲတၢ်အီၣ်တၢ်အီ,တၢ်ပီးတၢ်လီအိၣ်ဝဲအသိး,ဟီၣ်ခိၣ်မဲၥ်ဖံးခိၣ်တကပၤဂုၢ်ကျဲးစၢးဆှၢထီၣ်ဝဲအ(စ့ၣ်ကူၣ်)တပယုၥ်ဃီအိၣ်ဝဲအဂ့ၢ်,သ့ၣ်ညါဘၣ်ဒ်ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
ဒ်န့ၣ်အသိး,ဒ်သိးနိၣ်ခၠိနဲၣ်သုးကလၢၤအပူၤသုးကီၣ်ကးတကပၤမၤအါထီၣ်အဂံၢ်ဘါဒီးနုၥ်လီၤဟူးဂဲၤသုတန့ၢ်တဂ့ၤအဂီၢ်,စးထီၣ်လၢ(၂၀၂၄)နံၣ်လါမးရှးအပူၤလံၤလံၤတၢ်ပၢၢ်ဆၢသုးပၥ်ဖှိၣ်တကပၤခိးကးတံၥ်,တြီဃၥ်ဝဲသုးကီၣ်ကးတဖၣ်အိၣ်ဝဲတပယူၥ်ဃီဒီးဆၢကတီၢ်ယံၤထီၣ်ဝဲအဖီခိၣ်,အပူၤကွံၥ်(လါအီးကထိဘၢၣ်)အပူၤတနီၤဟးထီၣ်ကွံၥ်ဝဲဆူအသုးကလၢၤအပူၤအိၣ်ဝဲဘၣ်ဆၣ်,တုၤလၢခဲအံၤတတူၢ်ဃၣ်ကွံၥ်ဝဲအသးဒံးဘၣ်အဂ့ၢ်,သ့ၣ်ညါဘၣ်ဒ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
