လါယနူၤအါရံၤ ၁၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် (သုးက့ ၁)ဟီၣ်က၀ီၤ ဘံလ့ကီၢ်ဆၣ်အပူၤ စးထီၣ်ဖဲအပူၤကွံၥ်လါဒံၣ်စ့ဘၢၣ်လၢၥ်အံၤန့ၣ် ဟီၣ်က၀ီၤ(KNDO)သုးရ့ၣ် ၂ လဲၤခးစဲးပြဲး၀ဲမဲးပြ့ခံပယီၤသုးကလၢၤအံၤဒီး ပယီၤသုးက့ၤခးလီၤကဒါကျိဖးဒိၣ်တပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
မဲးပြ့ခံပယီၤသုးကလၢၤလၢအိၣ်ဆီလီၤသးဖဲဘံလ့ကီၢ်ဆၣ်ပူၤလၢအဘူးလိၥ်သးဒီး(သုးက့ ၅)ဟီၣ်က၀ီၤအံၤ စးထီၣ်ဖဲလါဒံၣ်စ့ဘၢၣ် ၃၁ သီ အနံၤန့ၣ် ဟီၣ်က၀ီၤကညီဒီကလုၥ်ဂၢၤသးကရၢ(KNDO) သုးရ့ၣ်-၂ သုးပၥ်ဖှိၣ် လဲၤစဲးပြဲး,လဲၤတ့ၢ်လီၤ၀ဲဒီးဒြိမ့ၣ်ပိၢ် တလီၢ်လီၢ် အဖီခိၣ် ပယီၤသုးတကပၤသူ၀ဲကဘီယူၤဟဲက့ၤခးလီၤကဒါတၢ်ဆူသုးကလၢၤအခိၣ်အဃၢၤအဃိ ကမျၢၢ်တဖၣ်ဃ့ၢ်ထီၣ်၀ဲ အါမးအဂ့ၢ်န့ၣ် သုးက့(၁)ပှၤဘၣ်မူဘၣ်ဒါစံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤ (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲလၢ“ပှၤစးထီၣ်လဲၤခးန့ၣ်ကဘၣ်လၢလါဒံၣ်စ့ဘၢၣ် ၃၁ သီ အနံၤန့ၣ်လံ. စးထီၣ်ဖဲလါယနူၤအါရံၤထီၣ် ၁ သီအနံၤန့ၣ် ခးလီၤတၢ်ဒီးကဘီယူၤတနံၤကအိၣ်လၢခံဘျီသၢဘျီညါ. ဟဲကွံၥ်လီၤတၢ် ဖဲမဲးပြ့ခံအကပိၤကပၤန့ၣ်.တၢ်သၢသီလွံၢ်သီအံၤလၢမဲးပြ့ခံန့ၣ်ကဘီယူၤဟဲကွံၥ်လီၤတၢ်ဖးရးညါ.ဟဲကွံၥ်လီၤတၢ်အီၣ်,ဟဲကွံၥ်လီၤမ့ၣ်ပိၢ်,ခးလီၤစ့ၢ်ကီး၀ဲကျိစဲးတဖၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ခီဖျိလၢပယီၤသုးကဘီယူၤဟဲခးလီၤတၢ်လၢမဲးပြ့ခံပယီၤသုးကလၢၤအခိၣ်အဃၢၤအဃိ ဒူသ၀ီလၢအိၣ်ဘူးဖဲန့ၣ်လၢအမ့ၢ် အံစူၢ်ခံ,မဲးပြ့ခံ,စံကိသ၀ီ,ညၣ်ဆှူၣ်ထၣ်ဃုၥ်ဒီးသ၀ီလၢအဂၤတဖၣ်န့ၣ် ဃ့ၢ်ထီၣ်လဲၤစံၣ်အိၣ်ပှၤဒူပှၤသ၀ီ,ကစၢ်ခိၣ်ကလိကျါဒီး ကူၣ်ပူၤလ့ပူၤအိၣ်၀ဲတနီၤအဂ့ၢ်န့ၣ် သုးက့ခိၣ် စံးအါထီၣ်၀ဲန့ၣ်လီၤ.
ဒ်န့ၣ်အသိးစးထီၣ်ဖဲတလါအံၤလါယနူၤအါရံၤထီၣ်အံၤန့ၣ် လၢနးကၠံတကပၤန့ၣ်စ့ၢ်ကီး ခီဖျိတၢ်ဒုးကဲထီၣ် ပယီၤသုးခးလီၤကျိဖးဒိၣ် ပှၤကမျၢၢ်သံဘၣ်ဒိဘၣ်ထံးအိၣ်ထီၣ်အဖီခိၣ် လီၢ်က၀ီၤကမျၢၢ်ပျံၤတၢ်ဃ့ၢ်ထီၣ်၀ဲဒၣ်အဃိ ပယီၤသုးအံၤကပၥ်ကဲပှၤကမျၢၢ် တဖၣ်ဒ် တၢ်ဒီသဒၢတခါအသိးအဂီၢ်န့ၣ်ပံးတံၢ်ဃၥ်၀ဲကျဲတၢ်လဲၤထီက့ၤလီၤဒ်အံၤလီၤအဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ် လီၤ.
“ပယီၤသုးပံးကျဲန့ၣ်စးထီၣ်ဖဲလါဒံစ့ဘၢၣ် ၃၁ သီအနံၤန့ၣ်လံ. ပယီၤဲသုးပံးကျဲ၀ဲဒၣ်န့ၣ်ပတပံးဘၣ်. ပယီၤသုးန့ၣ်ပှၤသ၀ီဖိစံၣ်ထီၣ် လၢတၢ်ချၢန့ၣ်တအဲၣ်၀ဲဘၣ်. မၢပှၤအိၣ်ဒီးအ၀ဲသ့ၣ်ဖဲအကသုးကလၢၤအကပိၤကပၤဒ်န့ၣ်. ပှၤကမျၢၢ်အိၣ်ဘူၣ်၀ဲလဲၣ်.တၢ်ဒုးဒုဆူၣ် ဖဲန့ၣ်တစဲး.ကဲထီၣ်အိၣ်၀ဲဒၣ်ခံသီသၢသီလွံၢ်သီလံ”အဂ့ၢ်န့ၣ် စံး၀ဲန့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် စးထီဖဲလါယနူၤအါရံၤထီၣ်တုၤလၢခဲအံၤန့ၣ် လၢနးကၠံဒီးမဲးပြ့ခံပယီၤသုးကလၢၤ တကပၤန့ၣ်တၢ်ဒုးဆူၣ်ထီၣ်၀ဲဒီး မဲးပြ့ခံပယီၤသုးကလၢၤလၢ(KNDO)သုးရ့ၣ် ၂ လဲၤခးစဲးပြဲး၀ဲအံၤ တၢ်တယးကွၢ်၀ဲသုးဂံၢ်ဘါပၥ်ဖှိၣ် ကအိၣ်၀ဲ(၁၃၀)ခိၣ်ဃၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီဖဲမဟါလါယနူၤအါရံၤ ၁၀ သီ မုၢ်ဃ့ၢ်လီၤ ၂ နၣ်ရံၣ်ဃၣ်ဃၣ်အဆၢကတီၢ်န့ၣ် လၢကၠဲးထိၣ်ကီၢ်ဆၣ် အံလူၢ်ကရူၢ် ကရၣ်၀့ဆ့ၣ်သ၀ီပူၤ ဒီး တကွံပူၤကရူၢ် တကွံပူၤသ၀ီအပူၤ ခီဖျိပယီၤသုး(၆၀၂)အမျိၥ်သုး ခးလီၤကျိဖးဒိၣ်အဃိ သ၀ီခံဖျၢၣ်အံၤ ကမျၢၢ်အဟံၣ်တၢ်သူၣ်ထီၣ်အူအီၣ်ဟးဂီၤ၀ဲ(၂)ဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤ.
