လါယနူၤအါရံၤ ၁၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် (သုးက့ ၁)ဘံလ့ကီၢ်ဆၣ်အပူၤ ခီဖျိဒုးယၤတၢ်ဘၣ်ဂံၥ်ဂူၥ်အိၣ်ထီၣ်အဃိ ပှၤကမျၢၢ်လၢအိၣ်မဲးပြ့ခံပယီၤသုးကလၢၤအခိၣ်အဃၢၤလၢအဃ့ၢ်ထီၣ်တဖၣ်အံၤလိၣ်ဘၣ်၀ဲတၢ်ဆီၣ်ထွဲမၤစၢၤဃုၥ်ဒီးအိၣ်ဆိးလီၢ်ကျဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါဒီးလီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
စးထီၣ်ဖဲလါယနူၤအါရံၤထီၣ်သီသီအံၤန့ၣ် ဟီၣ်က၀ီၤကညီဒီကလုၥ်ဂၢၤသးကရၢ(KNDO)သုးပၥ်ဖှိၣ် လဲၤခးစဲးပြဲး၀ဲမဲးပြ့ခံ ပယီၤသုးကလၢၤအံၤဒီး ဖဲန့ၣ်ခီဖျိပယီၤသုးကဘီယူၤဟဲက့ၤခးလီၤကဒါတၢ်လၢသုးကလၢၤအခိၣ်အဃၢၤအဃိ ဒူသ၀ီတစှၤန့ၢ် (၅)ဖျၢၣ်လၢအိဘူးဖဲန့ၣ်တဖၣ်ဘၣ်ဃ့ၢ်ထီၣ်၀ဲဒီး လၢပှၤသ့ၣ်တဖၣ်အံၤအဂီၢ်လိၣ်ဘၣ်၀ဲဒၣ်ဂံၢ်ခီၣ်ထံးတၢ်အီၣ်တၢ်အီ, တၢ်ကူတၢ်သိး ဒီးတၢ်အိၣ်တၢ်ဆိးလီၢ်ကျဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“ပှၤသ့ၣ်တဖၣ်အံၤဒိးန့ၢ်တၢ်ဆီၣ်ထွဲတအိၣ် နီမံၤဒံးဘၣ်..ဘၣ်မနုၤလဲၣ်အ၀ဲသ့ၣ်ဟးအိၣ်လၢပှၤဟံၣ်ပှၤဃီအဃိတၢ်ဆီၣ်ထွဲမၤစၢၤလိၣ်အနီၢ်ကီၢ်လီၤ.ခဲအံၤစ့ၢ်ကီးတၢ်ဂိၢ်ဆါမး, မ့၀ံၤလၢအီၣ်အီအိၣ်ဆိးသ့ၣ်မတၤလိၣ်ခဲလၢၥ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲ တနံၤအံၤန့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် မဲးပြ့ခံသုးကလၢၤခိၣ်ဃၢၤဒူသ၀ီလၢအဃ့ၢ်ထီၣ်သ့ၣ်တဖၣ်န့ၣ်မ့ၢ်၀ဲ မဲးပြ့ခံသ၀ီ, ကစၢၢ်ဖိ, အံစူၢ်ခံ,စံကိ,ညၣ်ဆှူၣ်ထၣ်,ပဒၣ်တီၢ်သ၀ီ,ဘီပီၢ်ထၣ်သ၀ီဖိကမျၢၢ်သ့ၣ်တဖၣ်ဒီးဒ်န့ၣ်အသိးကမျၢၢ်သ့ၣ်တဖၣ်အံၤဘံလ့ကီၢ်ဆၣ်ပူၤ ဒူသ၀ီအမဲၥ်ညါ တနီၤန့ၣ်လဲၤလီၤစံၣ်အိၣ်၀ဲဒၣ်လၢကၠဲးထိၣ်ကီၢ်ဆၣ်ဒီး ချၢၣ်လွံၢ်ထူၣ်ကီၢ်ရ့ၣ်(သုးက့ ၃) ဆီထံးကီၢ်ဆၣ်ပူၤ အိၣ်၀ဲဒၣ်တနီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤပှၤကမျၢၢ်လၢအလဲ၄ဃ့ၢ်အိၣ်ကၠဲးထိၣ်ကီၢ်ဆၣ်ပူၤတဖၣ်အနီၢ်ဂံၢ်ကအိၣ်၀ဲ(၂၂၀)ဘျဲၣ်ဒီး လၢပှၤသ့ၣ်တဖၣ်အံၤအဂီၢ် လိၣ်ဘၣ်၀ဲတၢ်ဆီၣ်ထွဲမၤစၢၤအသိး ခဲအံၤဘၣ်စ့ၢ်ကီးလၢတၢ်ဂိၢ်ဆါတၢ်ချံၣ်ဒိၣ်မးအဃိ လၢအ၀ဲသ့ၣ်အဂီၢ်တၢ်သ့အိၣ်အသိး ကီၢ်ဆၣ်ပှၤဘၣ်မူဘၣ်ဒါကဟ့ၣ်မၤစၢၤစိဃၥ်၀ဲတၢ်ကူတၢ်ကၤအဂ့ၢ်န့ၣ် ကၠဲးထိၣ်ကီၢ်ဆၣ် ပှၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ် လီၤ.
အ၀ဲစံး၀ဲလၢ“ပှၤလၢအဟဲစံၣ်လၢပဟီၣ်က၀ီၤပူၤတဖၣ်ဒုအိၣ်၀ဲဒၣ်လၢသီခါဖၠၣ်ပူၤတနီၤ.တနီၤန့ၣ်သ့ၣ်ညါပှၤဖဲန့ၣ်အိၣ်တနီၤလီၤ. တကးဒံးဘၣ်နးကၠံသ၀ီဒီးစွ့ၣ်လီအ့သ၀ီဖိနါက့ဟဲစံၣ်အိၣ်လၢပအိၣ်စ့ၢ်ကီးအိၣ်လီၤ.ဘၣ်ဆၣ်အိၣ်ပူၤဒံပူၤဂၤလီၤ.ပှၤဟဲစံၣ်အိၣ်ဖဲအံၤသ့ၣ်တဖၣ်အံၤခီဖျိအိၣ်ဘူးဒီပှၤအဃိခဲအံၤပကလဲၤဟ့ၣ်မၤစၢၤအ၀ဲသ့ၣ်ဆ့ကူဆ့ကၤ.ခဲအံၤတၢ်ဂိၢ်တၢ်ချံၣ်ဒိၣ်မးအ၀ဲသ့န့ၣ်ကူကၤ တပၣ်နီမံၤဘၣ်.တၢ်အီၣ်တၢ်အီစ့ၢ်ကီးတဘၣ်ဂီၢ်ဖိးဒ့ဘၣ်အဖီခိၣ် လၢတၢ်သ့အိၣ်ဒီးပှၤအသိးပကဆီၣ်တခူထီၣ်စၢၤတစဲးတမွဲးမီၤနီၤ. တနံၤညါအံၤဟဲအါထီၣ်တဘျုးဂၤဒံး” အဂ့ၢ်န့ၣ် စံး၀ဲန့ၣ်လီၤ.
ဘံလ့ကီၢ်ဆၣ်အပူၤ စးထီၣ်ဖဲတလါအံၤ လါယနူၤအါရံၤထီၣ်အံၤန့ၣ် လၢမဲးပြ့ခံပယီၤသုးကလၢၤဒီးနးကၠံပယီၤသုးကလၢၤ တကပၤန့ၣ် တၢ်ဒုးဆူၣ်ထီၣ်၀ဲအဖီခိၣ် ပယီၤသုးတကပၤသူကဘီယူၤ,ခးလီၤကျိဖးဒိၣ်,ကျိစဲးအဃိ လီၢ်က၀ီၤကမျၢၢ် ဃ့ၢ်ထီၣ်အမဲၥ်ညါ ကမျၢၢ်သံဘၣ်ဒိဘၣ်ထံးကဲထီၣ်၀ဲဒၣ်အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးကၠဲးထိၣ်ကီၢ်ဆၣ်လၢမဲးပြ့ခံကမျၢၢ်လဲၤဃ့ၢ်အိၣ်ကဒုအသးအံၤစ့ၢ်ကီး ဖဲစှၤသီအတီၢ်ပူၤအံၤ ပယီၤသုးခးလီၤကျိဖးဒိၣ် ဆူလီၢ်က၀ီၤကမျၢၢ်အိၣ်ဆိးလီၢ်ကျဲတပယူၥ်ဃီဒီးဖဲလါယနူၤအါရံၤ ၁၀ သီအနံၤ ခီဖျိပယီၤသုးအကျိဖးဒိၣ်အံၤအဃိ ပှၤကမျၢၢ် အဟံၣ်တၢ်သူၣ်ထီၣ်အူအီၣ်ဟးဂီၤ၀ဲဒၣ်(၂)ဖျၢၣ်ပၣ်ဃုၥ်၀ဲဒီးစ့အကလီၢ်(၂၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
