လါယနူၤအါရံၤ ၂၇ သီ, ၂၀၂၅ နံၣ်, ခ့ၣ်အဲးစံၣ်
တလၢၤကီၢ်စဲၣ်,ယ့ကီၢ်ဆၣ်ဟီၣ်ကဝီၤအပူၤတၢ်ဒုးတၢ်ယၤကဲထီၣ်အသးတအိၣ်ဘၣ်သနါက့တၢ်သ့ၣ်ညါဘၣ်လၢပယီၤသုးကီၣ်ကးအံၤဟဲမၤအါထီၣ်အသုးဂံၢ်ဘါလၢထံကျဲတကပၤတပယူၥ်ဃီအိၣ်ဝဲအဂ့ၢ်န့ၣ်တလၢၤကီၢ်တၢ်ပၢၢ်ဆၢသုး(MSRF)အပှၤကတိၤတၢ်ပၢ(နဲၤနကါ)စံးဝဲအသိးသ့ၣ်ညါဘၣ်န့ၣ်လီၤ.
ဖဲအပူၤလါယနူၤအါရံၤ(၂၃)သီအနံၤ,ဂီၤခီ(၈)နၣ်ရံၣ်ဃၣ်ဃၣ်အဆၢကတီၢ်န့ၣ်လၢ(ယ့ကီၢ်ဆၣ်)ဟီၣ်ကဝီၤအပူၤပယီၤသုးတၢ်သမံသမိးလၢအမ့ၢ်ဝဲ(မံတဲၣ်တိၤ)တြဲၤဒီးပယီၤသုးခီၣ်သုးရ့ၣ်(၃၁)(ခီစါ)သုးကလၢၤသ့ၣ်တဖၣ်အံၤဒ်သိးဒီးတၢ်ဆှၢထီၣ်ဝဲအသုးဂံၢ်ဘါသုတန့ၢ်တဂ့ၤအဂီၢ်တၢ်ခိးခးပံးကွံၥ်ဝဲကျဲသ့ၣ်တဖၣ်ဝံၤအလီၢ်ခံပယီၤသုးကီၣ်ကးတကပၤဟူးဂဲၤဟဲမၤအါထီၣ်အသုးဂံၢ်ဘါလၢထံကျဲတကပၤအဂ့ၢ်တလၢၤကီၢ်တၢ်ပၢၢ်ဆၢသုး(MSRF)အပှၤကတိၤတၢ်ပၢ(နဲၤနကါ)စံးဝဲဒ်အံၤန့ၣ်လီၤ.
အဝဲစံးဝဲလၢ “ဒုၣ်ဒါသုးကီၣ်ကးအံၤသူဝဲလၢထံကျဲတကပၤဒီးဟဲမၤအါထီၣ်အသုးဂံၢ်ဘါအိၣ်ဝဲလီၤ. အဝဲသ့ၣ်ဟဲနုၥ်လီၤဝဲလၢ(အ ဆ့ၤ)ပီၣ်လဲၣ်ကၢၢ်နံၤဖဲဒူသဝီဖဲန့ၣ်တဆီဒီးဟဲထီၣ်မၤအါထီၣ်အသုးဂံၢ်ဘါလၢယ့ၣ်ဝ့ၢ်အပူၤန့ၣ်လီၤ. လၢပီၣ်လဲၣ်ကၢၢ်နံၤတၢ်လီၢ်အ ဂၤနါက့ဟဲမၤအါထီၣ်အသုးဂံၢ်ဘါအိၣ်ဝဲလီၤ. အကါဒိၣ်ကတၢၢ်န့ၣ်အဝဲသ့ၣ်ကလဲၤတုၤလၢ(စကစ-၁၉)အအိၣ်ဒီးလၢန့ၣ်တဆီက လဲၤထီၣ်ဝဲဆူ ၅၈၁, ၅၉၃ န့ၣ်လီၤ. ဖဲတၢ်လီၢ်ဝဲန့ၣ်မ့ၢ်ဝဲ(ယ့ၣ်ခၠီဖၠါ)ဒီးမ့ၢ်ဝဲတၢ်လီၢ်လၢတၢ်ပၢၢ်ဆၢသုးပၥ် ဖှိၣ်ဂံၢ်ဘါဂ့ၤဝဲဟီၣ်ကဝီၤအ ဃိကလဲၤထီၣ်မၤပှဲၤဝဲအသုးဂံၢ်ဘါန့ၣ်လီၤ.” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ(ယ့ကီၢ်ဆၣ်)ကလံၤထံးဟီၣ်ကဝီၤလၢပီၣ်လဲၣ်အပူၤန့ၣ်အပူၤကွံၥ်သုးကီၣ်ကးအသုးကဘီထံအိၣ်ထဲ(၁)ခိၣ်လီၤဒီးဖဲတၢ်ပၢၢ်ဆၢသုးကရူၢ်လဲၤနုၢ်လီၤခးဝဲပယီၤသုးခီၣ်သုးရ့ၣ်(ခလရ-၃၁)ဝံၤအလီၢ်ခံသုးကီၣ်ကးအံၤမၤအါထီၣ်အသုးကဘီထံအိၣ်တုၤ လၢ(၄)ခိၣ်လံအသိးအသုးကဘီထံသ့ၣ်တဖၣ်အံၤခးတပျုၤတပျီၤဝဲကျိဖးဒိၣ်အိၣ်ဝဲအဂ့ၢ်န့ၣ်(နဲၤနကါ)စံးအါထီၣ်ဝဲဒၣ်န့ၣ်လီၤ.
တကးဒံးဘၣ်ပယီၤသုးကျိၤလၢဟဲနုၥ်လီၤ(ယ့ကီၢ်ဆၣ်)ဟီၣ်ကဝီၤဒူသဝီသ့ၣ်တဖၣ်အပူၤန့ၣ်ပျဲဝဲပှၤသဝီဖိသ့ၣ်တဖၣ်ဝံစိၥ်တီဆှၢဝဲတၢ်အီၣ်တၢ်အီၣ်ဖဲအကြၢးဘၣ်ဆၣ်မ့မ့ၢ်တကီၢ်ခါအခဲအံၤန့ၣ်ပယီၤသုးသ့ၣ်တဖၣ်မၤဃံးထီၣ်ဝဲသမံသမိးပှၤလီၢ်ကဝီၤဖိသ့ၣ်တဖၣ်အလီတဲစိၤအမဲၥ်ညါပံးကွံၥ်ဝဲတၢ်ဝံစိၥ်တီဆှၢအကျဲလံအဂ့ၢ်န့ၣ်(ယ့ကီၢ်ဆၣ်)ပှၤသဝီဖိလၢအတအဲၣ်ဒိးပၥ်ဖျါအမံၤတဂၤစံးဝဲန့ၣ်လီၤ.
အဝဲစံးဝဲလၢ “တၢ်အီၣ်တၢ်အီန့ၣ်လ့တက့ၤတပျဲပှၤဝံစိၥ်တီဆှၢလၢၤဘၣ်. လၢအခီၣ်ထံးအခါန့ၣ်ပျဲပှၤဝံစိၥ်တီဆှၢဝဲဖဲအကြၢးမီၤနီၤ. အခဲအံၤန့ၣ်ပံးကွံၥ်ဒီးမၤဝဲဒ်တဲၥ်လွံၢ်တဲၥ်အသိးလီၤ. သမံသမိးဝဲပှၤလီၢ်ကဝီၤဖိသ့ၣ်တဖၣ်အလီတဲစိၤလီၤ. သိလ့ၣ်မ့ၢ်ဂ့ၤ,စဲးကဲးမ့ၢ်ဂ့ၤ မ့ၢ်လ့ၢ်လိၤလ့ၢ်ထီၣ်န့ၣ်သမံသမိးဝဲဒၣ်လီၤတံၢ်လီၤဆဲးလီၤ.” အဂ့ၢ်စံးဘၣ်ခ့ၣ်အဲးစံၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါယနူၤအါရံၤ(၈)သီအနံၤန့ၣ်လၢ ယ့ကီၢ်ဆၣ်,ကၠိလီဟီၣ်ကဝီၤအပူၤမ့ၢ်လၢပယီၤသုးကျိၤဟဲထီၣ်ဒီးခံခီခံက ပၤတၢ်ဒုးတၢ်ယၤစးထီၣ်ကဲထီၣ်ဝဲအဃိပှၤလီၢ်ကဝီၤဖိလၢအကထိဘျဲၣ်ဘၣ်ဃ့ၢ်အိၣ်ကဒုအသးတုၤလၢတကီၢ်ခါခဲအံၤအမဲၥ်ညါလၢတၢ်အီၣ်တၢ်အီၣ်တကပၤတၢ်လိၣ်အိၣ်ဒံးဝဲအဂ့ၢ်န့ၣ်သ့ၣ်ညါဘၣ်န့ၣ်လီၤ.
