လါယနူၤအါရံၤ ၁၄ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆) ၀ီၢ်ရ့ၣ်ကီၢ်ဆၣ် ကၠိလီ(ကျုံးလောင်း)ဟီၣ်က၀ီၤအပူၤ စးထီၣ်ဖဲလါယနူၤအါရံၤ ၉ သီအနံၤန့ၣ် ပယီၤသုးကျိၤဟဲထီၣ်အဃိတၢ်ဒုးကဲထီၣ်အဖီခိၣ် ပယီၤသုးအံၤပံးဃၥ်၀ဲ တၢ်စိၥ်ထီၣ်စိၥ်လီၤတၢ်အီၣ်တၢ်အီဒီးကသံၣ်ကသီသ့ၣ်တဖၣ်အဂ့ၢ်န့ၣ် မိၣ်တၢ်ပၢၢ်ဆၢကရူၢ်(MSRF)ပှၤဘၣ်မူဘၣ်ဒါ စံး၀ဲန့ၣ်လီၤ.
စးထီၣ်ဖဲအပူၤကွံၥ်လါယနူၤအါရံၤ ၉ သီအနံၤန့ၣ် လၢ၀ီၢ်ရ့ၣ်ကီၢ်ဆၣ် ကၠိလီဟီၣ်က၀ီၤပူၤ ဘၣ်ဃးတၢ်ဒုးတၢ်ကစီၣ်တၢ်အိၣ်သး အိၣ်ဒ်လဲၣ်အဂ့ၢ်န့ၣ် မိၣ်တၢ်ပၢၢ်ဆၢကရူၢ်(MSRF)ပှၤကတိၤတၢ်ပၢ နဲၤနကါ ပၥ်ဂၢၢ်ပၥ်ကျၢၤစံးဘၣ်ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤ.
“မ့ၢ်လီၤစးထီၣ်ဖဲလါထီၣ်(၉)သီအံၤန့ၣ်တၢ်ဒုးကဲထီၣ်လၢခံခီခံကပၤအဘၢၣ်စၢၤတုၤလၢခဲအံၤလီၤ.ဖဲမဟါန့ၣ်တၢ်ဒုးကဲထီၣ် တဘျီဒံး. မ့မ့ၢ်တနံၤညါအံၤန့ၣ်ဘှ့ၣ်က့ၤတစဲး.ပယီၤသုးတကပၤန့ၣ်တၢ်သံတၢ်ဘၣ်ဒိဘၣ်ထံးကအိၣ်ဖးအါညါ. တနီၤန့ၣ်ပှၤတဲလၢ အသံကအိၣ်လၢအဂၤ(၅၀),(၆၀)ညါ.လၢကမၤလီၤတံၢ်အဂီၢ်န့ၣ်ပဃုသ့ၣ်ညါအဖၢမုၢ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်ဖဲတနံၤအံၤန့ၣ်လီၤ.
တၢ်ဒုးကဲထီၣ်အဖီခိၣ် ပယီၤသုးရ့ၣ်လၢအိၣ်ဆီလီၤသးဖဲ၀ီၢ်ရ့ၣ်ဟီၣ်က၀ီၤပူၤအံၤတဖၣ် ခးလီၤ၀ဲကျိဖးဒိၣ်တပယူၥ်ဃီအဃိ ကၠိလီသ၀ီ,ကၠီၣ်မံၣ်ကၠီသ၀ီဃုၥ်ဒီးဒူသ၀ီလၢအိၣ်ဘူးဖဲန့ၣ်တဖၣ်ပှၤကမျၢၢ်လၢအကထိဃ့ၢ်ထီၣ်၀ဲဆူမိၣ်ကီၢ်သီပၣ်တံၣ်တၢ်ပၢ ဟီၣ်က၀ီၤဒီးတၢ်လီၢ်လၢအဂၤအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ.
ဒ်န့ၣ်အသိးခီဖျိတၢ်ဒုးကဲထီၣ်အဃိ လၢယ့၀့ၢ်ပူၤဆူဒူသ၀ီအံၤတဆီ ပယီၤသုးပံးတံၢ်ဃၥ်၀ဲတၢ်စိၥ်ထီၣ်စိၥ်လီၤတၢ်အီၣ်တၢ်အီဒီး ကသံၣ်ကသီသ့ၣ်တဖၣ်အဃိ လီၢ်က၀ီၤကမျၢၢ်သ့ၣ်တဖၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤပူၤကမျၢၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အ၀ဲစံး၀ဲလၢ“တၢ်ဒုးကဲထီၣ်အဃိပယီၤသုးတအဲၣ်ပှၤစိၥ်တၢ်အီၣ်တၢ်အီဒီးကသံၣ်ကသီဘၣ်န့ၣ်ကန့ၢ်လၢ(၅)သီလံ. ပှၤစိၥ်ထီၣ်စိၥ်လီၤကသံၣ်ကသီ,တၢ်အီၣ်တၢ်အီတန့ၢ်ဘၣ်ဘျီပှၤသ၀ီဖိဒု ထံၣ်ဘၣ်၀ဲတၢ်ကီတၢ်ခဲန့ၣ်”အဂ့ၢ်န့ၣ် စံး၀ဲန့ၣ်လီၤ.
တကီၢ်ခါခဲအံၤခီဖျိခံခီခံကပၤတၢ်ဒုးကဲထီၣ်အဃိ ပှၤကမျၢၢ်အဂၤ(၄၀၀)ဘျဲၣ်လၢအဘၣ်ဃ့ၢ်တၢ်ဒုးအံၤတဖၣ်ဒ်သိးကဒိးန့ၢ်ဘၣ် တၢ်အီၣ်တၢ်အီဒီးကသံၣ်ကသီတၢ်ဆီၣ်ထွဲမၤစၢၤအဂီၢ်န့ၣ် တၢ်ထၢမၤနီၣ်စရီ၀ံၤ တၢ်ဟ့ၣ်လီၤမၤစၢၤဆီၣ်ထွဲစိဃၥ်၀ဲ ဟုသး,သိအီၣ်, ညၣ်ဒၢဃုၥ်ဒီးတၢ်အီၣ်တၢ်အီလၢအဂၤတဖၣ်အိၣ်၀ဲအဂ့ၢ်န့ၣ် Mon Relief and Development Center’s စံး၀ဲန့ၣ်လီၤ.
လၢန့ၣ်အမဲၥ်ညါတကီၢ်ခါခဲအံၤလၢ၀ီၢ်ရ့ၣ်ကီၢ်ဆၣ် တၢ်ဆါဟံၣ်ဖးဒိၣ်န့ၣ်စ့ၢ်ကီး ပယီၤသုးလၢအသံဒီး အဘၣ်ဒိဘၣ်ထံး ကူစါယါဘျါအသးအိၣ်၀ဲဒၣ်အါမးဒီး ခီဖျိပယီၤသုးအံၤသံအါအဃိ ဖဲလါယနူၤအါရံၤ ၁၁ သီအနံၤန့ၣ် အကဘီယူၤဟဲကွံၥ်လီၤဒံး၀ဲ (၅၀၀)ပီၣ်မ့ၣ်ပိၢ်တဘျီ ဒံးအဂ့ၢ်န့ၣ် MSRF စံး၀ဲန့ၣ်လီၤ.