လါယနူၤအါရံၤ ၁၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤအပူၤ ကီၢ်ဆၣ်စံၣ်ညီၣ်ကွီၢ်အဖိခွါအသံစိၣ်လၢ တၢ်က့ၤထံၣ်၀ဲဖဲအပူၤကွံၥ်လါယနူၤအါရံၤ ၁၀ သီ လၢကစၢၢ်ဒိၣ်ကီၢ်ဆၣ် မုၢ်ထီၣ်ဟီၣ်က၀ီၤပူၤအံၤ မ့ၢ်၀ဲကီၢ်သူလ့ၤသုးမုၢ်ဒိၣ် (KTLA)မၤသံ၀ဲလီၤ အဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤအဲၣ်နၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
စီၤကညီဒိၣ်စိလၢအဘၣ်တၢ်မၤသံအီၤအံၤ အသးနံၣ်အိၣ်၀ဲ(၂၈)နံၣ် မ့ၢ်၀ဲခ့ၣ်အဲၣ်ယူၣ် (သုးက့ ၄) လၢၢ်ဒိၣ်စိကီၢ်ဆၣ် စံၣ်ညီၣ်ကွီၢ် စီၤကဲဒိၣ် အဖိခွါဒီး ဖဲအပူၤကွံၥ်လါဒံၣ်စ့ဘၢၣ် ၂၀ သီအနံၤန့ၣ် လၢကမၤအဖိနံၤအိၣ်ဖျဲၣ်ဆၢက့ၤအံၤအဂီၢ်ဖဲအ၀ဲလဲၤ ပှ့ၤတၢ်လၢကျဲအခါ လီၤမၢ်၀ဲလၢကျဲပူၤဒီး တၢ်ဆၢကတီၢ်တံၥ်တၥ်အသီ(၂၀)မး တၢ်က့ၤထံၣ်အီၤဖဲ၀းကူၣ်သ၀ီ ထံကမျၢပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
စီၤကညီဒိၣ်စိအံၤ ညီနုၢ်န့ၣ်မ့ၢ်ပှၤတဂၤလၢအဟးထီၣ်လ့ၢ်လိၤ၀ဲဖဲမုၢ်ထီၣ်ဟီၣ်က၀ီၤပူၤအံၤလၢဆဲးကၢးဒီး တၢ်လီၢ်လၢတၢ်က့ၤထံၣ်၀ဲ အသံစိၣ်အံၤစ့ၢ်ကီး အိၣ်ဘူး၀ဲဒီးကီၢ်သူလ့ၤသုးမုၢ်ဒိၣ်(KTLA) ဆၣ်ကဆီသုးတြိၤ သုးရ့ၣ်(၃)တၢ်သမံသမိးတြဲၤ အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ“ဖဲလါယနူၤအါရံၤ ၁၀ အနံၤန့ၣ် လၢ၀းကူၣ်သ၀ီန့ၣ် တၢ်ထံၣ်န့ၢ်က့ၤအစိၣ်န့ၣ် တၢ်ကွံၥ်လီၤအီၤလၢထံပူၤလီၢ်လံၤအပူၤမီၤနီၤ.ပှၤလၢအမၤသံတၢ်န့ၣ်မ့ၢ်ဒၣ်(KTLA)အပှၤလီၤမီၤ. တၢ်လီၢ်ဖဲန့ၣ်အိၣ်ဒၣ်(KTLA)လီၤ.(PDF)မ့အိၣ်နါက့တမ့ၢ်လၢအကမၤသံ၀ဲဘၣ်.အ၀ဲန့ၣ်အဒုၣ်အဒါတအိၣ်ဒီးပှၤဂၤနီတဂၤဘၣ်.ဖဲန့ၣ်နါက့ပယီၤသုးတအိၣ်စ့ၢ်ဘၣ်.အဃိန့ၣ်ပှၤလၢအဟူးဂဲၤဖဲန့ၣ်မ့ၢ်ဒၣ်(KTLA)လီၤ.နါက့နမ့တဲန့ၣ်တမ့ၢ်အအၢၣ်လီၤအတၢ်ကမၣ်ဘၣ်.တၢ်မ့ၢ်တၢ်တီန့ၣ်မုၢ်တနံၤကဖျါထီၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ.
လၢန့ၣ်အမဲၥ်ညါစီၤကညီဒိၣ်စိအံၤ အပူၤကွံၥ်မ့ၢ်တ့ၢ်၀ဲဒၣ်ခ့ၣ်အဲၣ်ယူၣ်(သုးက့ ၄)အသုးတဂၤဘၣ်ဆၣ် လီၢ်ခံန့ၣ်အ၀ဲဟးထီၣ်ကွံၥ် လၢတၢ်ဖံးတၢ်မၤပူၤ၀ံၤက့ၤအိၣ်က့ၤဆိး၀ဲဒီးအဖိအမါအဂ့ၢ်န့ၣ် ပဒိၣ်စီၤအဲၣ်နၤစံးအါထီၣ်၀ဲန့ၣ်လီၤ.
စီၤကညီဒိၣ်စိအစိၣ်အံၤ ဖဲမဟါလါယနူၤအါရံၤ ၁၁ သီအနံၤန့ၣ် တၢ်ကုၢ်ထီၣ်ကွံၥ်၀ဲလံဒီး အမါဃုၥ်ဒီးအဖိ(၂)နံၣ်အံၤတဂၤအိၣ် လီၤတဲၥ်ကွံၥ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါအီးကထိဘၢၣ်အခါန့ၣ်စ့ၢ်ကီး လၢဘျံးဒ၀ဲၢ်ကီၢ်ရ့ၣ် ကီၢ်သူလ့ၤသုးမုၢ်ဒိၣ် (KTLA)ဆၣ်ကဆီသုးတြိၤအပှၤ လၢဘၣ်တၢ်တီခိၣ်ရိၣ်မဲအီၤလၢသုးခိၣ်အဲၣ်ခွံအံၤ ဖီၣ်မၤသံဒံး၀ဲလီၢ်က၀ီၤကမျၢၢ်(၃)ဂၤကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
