လါဖ့ၤဘြူၤအါရံၤ ၁၀ သီ, ၂၀၂၅ နံၣ်, ခ့ၣ်အဲးစံၣ်
လၢတၢ်ကဒုးမၤပျီကွံၥ်ဝဲသုးမီၤစိရိၤသုးကလၢၤလၢအိၣ်(ပရဲလိၥ်ကျိ)ဟီၣ်ကဝီၤပူၤသ့ၣ်တဖၣ်အဂီၢ်တၢ်ဒုးအိၣ်ထီၣ်ကဒီးဝဲ(ပရဲလိၥ်ကျိခဲၣ်ဖ့)ဝဲအံၤအဂ့ၢ်သ့ၣ်ညါဘၣ်အသိးတၢ်အိးထီၣ်ဝဲ(ခဲၣ်ဖ့)မူးတၢ်ရဲၣ်တၢ်ကျဲၤအံၤဖဲအပူၤကွံၥ်မဟါလါဖ့ၤဘြူၤအါရံၤ(၈)သီအနံၤအဂ့ၢ်န့ၣ်သ့ၣ်ညါဘၣ်န့ၣ်လီၤ.
ဘၣ်ထွဲဒီးတၢ်ဒုးအိၣ်ထီၣ်ဝဲ(ပရဲလိၥ်ကျိခဲၣ်ဖ့)အံၤန့ၣ်မ့ၢ်ဒ်သိးဒီးတၢ်ကဒုးလီၤပှီၢ်ကွံၥ်သုးမီၤစိရိၤသနူအဂီၢ်ဒီးတၢ်ကမၤပျီကွံၥ်ဝဲသုးမီၤစိရိၤသုးကလၢၤလၢအိၣ်(ပရဲလိၥ်ကျိ)ဟီၣ်ကဝီၤပူၤတဖၣ်အဂီၢ်တကးဒံးဘၣ်မ့ၢ်စ့ၢ်ကီးဝဲတၢ်ဒီသဒၢကမျၢၢ်ထံဖိကီၢ်ဖိသ့ၣ်တဖၣ်ကပူၤဖျဲးထီၣ်လၢသုးမီၤစိရိၤအသုးဒုးယၤတၢ်ဟူးတၢ်ဂဲၤတဖၣ်အဂီၢ်အဂ့ၢ်န့ၣ်ပှၤလၢအတီခိၣ်ရိၣ်မဲ(ပရဲလိၥ်ကျိခဲၣ်ဖ့)အပှၤပၢၤလီၢ်ဆ့ၣ်နီၤကမံးတံၥ်(သရၣ်မုၣ်နါကၠံၤအ့စွ့ၤ)စံးဝဲဒ်အံၤန့ၣ်လီၤ.
“တၢ်ပညိၣ်န့ၣ်အိၣ်ဝဲ(၃)ထံၣ်မ့ၢ်ဝဲလၢတၢ်ကဒုးလီၤပှီၢ်ကွံၥ်ဝဲသုးကလၢၤလၢအအိၣ်တ့ၢ်လၢပရဲလိၥ်ကျိဟီၣ်ကဝီၤပူၤသ့ၣ်တဖၣ်ဒီးခံထံၣ်တထံၣ်န့ၣ်တၢ်ကမၤဆူၣ်ထီၣ်တၢ်ဒီသဒၢထံဖိကီၢ်ဖိသ့ၣ်တဖၣ်အတၢ်ဘံၣ်တၢ်ဘၢအဂီၢ်လၢတၢ်မၤပျံၤမၤဖုးအကလုၥ်ကလုၥ်လၢအဟဲလၢသုးမီၤစိရိၤအိၣ်တကပၤန့ၣ်လီၤ.
သၢထံၣ်တထံၣ်န့ၣ်မ့ၢ်တၢ်ကဒုးလီၤပှီၢ်ကွံၥ်ဝဲသုးမီၤစိရိၤသနူအံၤဒီးကဖီၣ်လိၥ်သးစု,မၤသ ကိးတၢ်ဒီးကလုၥ်ဒူၣ်အဂၤသ့ၣ်တဖၣ်ဒ်သိးပကဒိးန့ၢ်ဘၣ်ဝဲ(ဖဲၣ်ဒရဲၢ်ဒံၣ်မိၤကရ့ၣ်စံၣ်)လၢအမ့ၢ်အတီမီၤနီၤ. ” အဂ့ၢ်န့ၣ်စံးဘၣ်ခ့ၣ်အဲး စံၣ်-ကညီတၢ်ကစီၣ်န့ၣ်လီၤ.
(ပရဲလိၥ်ကျိခဲၣ်ဖ့)တၢ်ဃုစ့ပၥ်ကီၤအံၤဘၣ်တၢ်တီခိၣ်ရိၣ်မဲအီၤလၢထံကီၢ်အါဘ့ၣ်ပှၤကညီတဝၢခိၣ်နၢ်သ့ၣ်တဖၣ်ဃုၥ်ဒီးကလုၥ်ဒူၣ်ခိၣ်နၢ်သ့ၣ်တဖၣ်ဒီး(ခဲၣ်ဖ့)အံၤတၢ်စးထီၣ်အိးထီၣ်လံဝဲဖဲတလါအံၤလါဖ့ၤဘြူၤအါရံၤ(၃)သီအနံၤဒီးကတုၤလီၤဝဲလၢလါမးၡး(၃၁) သီအနံၤ,လၢ(၂)လါအတီၢ်ပူၤဃၣ်ဃၣ်န့ၣ်လီၤ. မ့မ့ၢ်လၢ(ခဲၣ်ဖ့)တဘျီညါအံၤန့ၣ်တၢ်တိၥ်ပၥ်ပနီၣ်စ့ယိၤခဲလၢၥ်(၃)ကကွဲၢ်ဘးအဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိးတၢ်ဆီၣ်ထွဲမၤစၢၤလၢတၢ်မ့ၢ်ဒိးန့ၢ်ဘၣ်ဝဲလၢ(ပရဲလိၥ်ကျိခဲၣ်ဖ့)တဘျီညါအံၤအပူၤန့ၣ်တၢ်ကက့ၤသူဝဲလၢတၢ်ကဒုးလီၤပှီၢ်ကွံၥ်ဝဲသုးမီၤစိရိၤသုးကလၢၤလၢအအိၣ်တ့ၢ်သ့ၣ်တဖၣ်ဒီးတၢ်လိၣ်လၢတၢ်ဖံးတၢ်မၤ,တၢ်ရဲၣ်တၢ်ကျဲၤကကဲထီၣ်လိၣ်ထီၣ်အဂီၢ်သ့ၣ်တဖၣ်အဂ့ၢ်န့ၣ်(ခဲၣ်ဖ့)ပှၤပၢၤလီၢ်ဆ့ၣ်နီၤကမံးတံၥ်သရၣ်မုၣ်နါကၠံၤအ့စွ့ၤစံးအါထီၣ်ဝဲဒၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါလၢတၢ်ဒုးအိၣ်ထီၣ်ဝဲ(ပရဲလိၥ်ကျိခဲၣ်ဖ့)အဝဲအံၤန့ၣ်ကကဲထီၣ်စ့ၢ်ကီးဝဲဒၣ်တၢ်မၤစှၤလီၤဝဲပယီၤသုးကီၣ်ကး(အီၣ်စ့ၣ်ယး)သုးကျိၤလၢအဟဲထီၣ်သ့ၣ်တဖၣ်အံၤအဃိကမျၢၢ်ထံဖိကီၢ်ဖိသ့ၣ်တဖၣ်ခဲလၢၥ်ကဆီၣ်ထွဲဘၣ်ဝဲ(ခဲၣ်ဖ့)တဘျီအံၤဃူဃူဖိးဖိးအဂ့ၢ်(ခိၤဘြၤ)သုးကျိၤ-၁ သုးကျိၤခိၣ်, သုးခိၣ်စီၤကီၢ် ဆီၣ်တခူထီၣ်ဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိးအပူၤနံၣ်(၂၀၂၄)အနံၣ်အတီၢ်ပူၤန့ၣ်တၢ်ဒုးအိၣ်ထီၣ်တ့ၢ်ဝဲ(သီသံၣ်ခိၣ်ခဲၣ်ဖ့),(တီနီၢ်ခဲၣ်ဖ့)သ့ၣ်တဖၣ်အိၣ်ဝဲအသိးဖဲတၢ်ဒုးအိၣ်ထီၣ်(တီနီၢ်ခဲၣ်ဖ့)လၢတၢ်ကဒုးလီၤပှီၢ်ကွံၥ်ဝဲသုးကီၣ်ကး(အီၣ်စ့ၣ်ယး)ထံကီၢ်ပတီၢ်သုးကျိၤအံၤအဂီၢ်ဒ်တၢ်တိၥ်ပၥ်ပနီၣ်ဝဲစ့ပၥ်ကီၤစ့ယိၤအကကွဲၢ်(၂၀)တပှဲၤထီၣ်ဘးဘၣ်ဘၣ်ဆၣ်ပစံးသ့လၢ(ခဲၣ်ဖ့)အံၤအသူးအသၣ်ဟဲအိၣ်ဖျါထီၣ်ဝဲဒၣ်အဂ့ၢ်န့ၣ်သ့ၣ်ညါဘၣ်လၢ(ခဲၣ်ဖ့)ကမံးတံၥ်အပှၤဘၣ်မူဘၣ်ဒါအအိၣ်န့ၣ်လီၤ.
