လါဖ့ၤဘြူၤအါရံၤ (၈)သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်ဟီၣ်ကဝီၤနိၣ်ခၠိနဲၣ်ဒုးယၤသုးကလၢၤအပူၤ,ဒ်သိးကဘီယူၤစီၢ်လီၤကန့ၢ်အဂီၢ်ဒီးကခးဘၣ်ဝဲတၢ်ပျီပျီရှဲရှဲအဂီၢ်,ပယီၤသုးသ့ၣ်တဖၣ်အံၤဒွဲၣ်အူအီၣ်ကွံၥ်ဝဲကမျၢၢ်လီၢ်ကဝီၤဖိဟံၣ်ဃီအိၣ်ဝဲလၢအဖျၢၣ်(၅၀)ဘျဲၣ်ဃၣ်ဃၢ်လံအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
နိၣ်ခၠိနဲၣ်ဒုးယၤသုးကလၢၤအပူၤပယီၤသုးသ့ၣ်တဖၣ်အံၤ,အပူၤကွံၥ်(၂၀၂၄)နံၣ်လါဒံၣ်စဲဘၢၣ်လၢၥ်အပူၤဟဲမၤအါထီၣ်ဝဲအသုးဂံၢ်ဘါဒီးဆီတလဲဝဲအဒုးယၤခိၣ်သ့ၣ်တဖၣ်အိၣ်ဝဲဒီး,ပယီၤသုးသ့ၣ်တဖၣ်အံၤစးထီၣ်ဖဲဟဲမၤအါထီၣ်အဂံၢ်ဘါဒီးဆီတလဲဝဲအဒုးယၤအခိၣ်အနၢ်သ့ၣ်တဖၣ်ဝံၤအလီၢ်ခံ,ဒွဲၣ်အူအီၣ်ဝဲကမျၢၢ်ဟံၣ်ဃီတဖၣ်အိၣ်ဝဲတပယူၥ်ဃီဒီးတုၤလၢခဲအံၤထီၣ်ဘးဝဲလၢအဖျၢၣ်(၅၀)ဘျဲၣ်ဃၣ်ဃၣ်လံအဂ့ၢ်,ဝီၢ်ရ့ၣ်ကီၢ်ဆၣ်ပှၤဘၣ်မူဘၣ်ဒါတဂၤစံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ“ပယီၤသုးန့ၣ်ခဲအံၤဒွဲၣ်အူအီၣ်ဟံၣ်အိၣ်လၢအဖျၢၣ်(၅၀)ဘျဲၣ်ဃၣ်ဃၣ်လံန့ၣ်မ့ၢ်ဝဲလီၤ.ပယီၤသုးသ့ၣ်တဖၣ်အံၤန့ၣ်စးထီၣ်ဖဲအပူၤကွံၥ်ဟဲထီၣ်ဆီတလဲအပှၤဝံၤအလီၢ်ခံ,မၤလဲၢ်ထီၣ်ဝဲအတၢ်လီၢ်ကအိၣ်လၢတအ့ကၢၣ်န့ၣ်လီၤ.ဖဲအမၤလဲၢ်ထီၣ်တၢ်လီၢ်တၢ်ကျဲအဆၢကတီၢ်တခီဒွဲၣ်အူဝဲကမျၢၢ်ဟံၣ်တဖၣ်န့ၣ်လီၤ.အခီပညီန့ၣ်,မၤပျီမၤရှဲဝဲတၢ်လီၢ်တၢ်ကျဲတဖၣ်မီၤနီၤ.ဒီးမၤပျီဝဲတၢ်လီၢ်တၢ်ကျဲဒ်အံၤန့ၣ်အတၢ်ပညိၣ်တခီန့ၣ်ယဆိမိၣ်ကမ့ၢ်ဒၣ်လၢအဝဲသ့ၣ်အကဘီယူၤကဟဲစီၢ်လီၤအဂီၢ်ဒီး,အဝဲသ့ၣ်ကခးဘၣ်တၢ်ပျီပျီရှဲရှဲအဂီၢ်လီၤ.တုၤလၢခဲအံၤမၤဝဲအဖၢမုၢ်လီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ,နိၣ်ခၠိနဲၣ်ဒုးယၤသုးကလၢၤအပူၤပယီၤသုးသ့ၣ်တဖၣ်အံၤဒိးလီၤဝဲမ့ၣ်ပိၢ်ဝးဝးလၢခိၣ်ဃၢၤတၢ်လီၢ်တၢ်ကျဲတဖၣ်အပူၤအိၣ်ဝဲအသိး,ခီဖျိမၤလဲၢ်ထီၣ်ဝဲတၢ်လီၢ်တၢ်ကျဲန့ၢ်အဃိ,လၢတၢ်ဆှၢထီၣ်တၢ်အီၣ်တၢ်အီဒီးစုကဝဲၤတၢ်ပီးတၢ်လီတကပၤအဒုးယၤသုးကလၢၤအပူၤမၤဝဲန့ၢ်ဂ့ၤဂ့ၤလီၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်စ့ၢ်ကီးန့ၣ်လီၤ.
နိၣ်ခၠိနဲၣ်ဒုးယၤသုးကလၢၤအံၤ,အပူၤကွံၥ်လါဒံၣ်စဲၣ်ဘၢၣ်လၢၥ်အပူၤခီဖျိပယီၤသုးတကပၤမၤအါထီၣ်ဝဲသုးဂံၢ်ဘါဒီးဆှၢထီၣ်ဝဲအစ့ၣ်ကူၣ်တဖၣ်အဃိ,တကီၢ်ခါခဲအံၤပယီၤသုးနီၢ်ဂံၢ်နီၢ်ဒွးအိၣ်ဝဲလၢ(၂၀၀)ဘျဲၣ်ခိၣ်ဃၢၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်န့ၣ်လီၤ.
တကတီၢ်ဃီ,ဒုးယၤသုးကလၢၤအပူၤပယီၤသုးအဒုးယၤခိၣ်အသီလၢအမ့ၢ်(မ့ၣ်ခဲၣ်)ဒီးဒုးယၤခိၣ်လီၢ်လံၤ(၀နၣ်လဲၤ)သ့ၣ်တဖၣ်အိၣ်ဒံးဝဲဒၣ်အဖၢမုၢ်အသိး,အသုးရ့ၣ်ခိၣ်အိၣ်စ့ၢ်ကီးဝဲ(၂)ဂၤအမဲၥ်ညါ,သုးဂံၢ်ဘါလၢဟဲထီၣ်ပၥ်ဖှိၣ်အါထီၣ်ဝဲအသးသးတဖၣ်အံၤမ့ၢ်ဝဲ(တမ)(၄၄)စုတီၤဖီလၥ်သ့ၣ်တဖၣ်အဂ့ၢ်,သ့ၣ်ညါဘၣ်ဒ်ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်အသိးန့ၣ်လီၤ.
နိၣ်ခၠိနဲၣ်ဒုးယၤပယီၤသုးကလၢၤအံၤအိၣ်ဝဲဒၣ်ဖဲဃိၣ်သၢဖျၢၣ်,သရိၥ်ဝါကျဲမုၢ်အဖီခိၣ်ဒီးမ့ၢ်ဝဲသုးကလၢၤလၢအရ့ဒိၣ်လၢပယီၤသုးတဖၣ်အဂီၢ်အဃိဒ်သိးသုတလီၤကွံၥ်တဂ့ၤအဂီၢ်,သုးကီၣ်ကးတကပၤသူကဘီယူၤမၤဝဲတၢ်ခးလီၤတၢ်တပယူၥ်ဃီအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,စးထီၣ်လၢ(၂၀၂၄)လါမးရှးအခါလံၤလံၤအပူၤ,တၢ်ပၢၢ်ဆၢသုးပၥ်ဖှိၣ်တကပၤစ့ၢ်ကီး,ခိးတြီတံၥ်ဃၥ်ဝဲသုးကီၣ်ကးဒီးခံခီခံကပၤတၢ်ခးလိၥ်သးအိၣ်ဝဲတပယူၥ်ဃီအဖီခိၣ်နိၣ်ခၠိနဲၣ်သဝီဟံၣ်ခိၣ်အဖျၢၣ်(၄၀၀)ဘျဲၣ်,ဒူသဝီကမျၢၢ်(၂၅၀၀)ခိၣ်ဃၢၤဃုၥ်ဒီးသဝီလၢအိၣ်ဘူးတဖၣ်ဘၣ်ဃ့ၢ်ထီၣ်အိၣ်ကဒုဝဲအသးတုၤလၢခဲအံၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
