လါဖ့ၤဘြူၤအါရံၤ ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲးယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ ခီဖျိသုးကီၣ်ကးအကဘီယူၤလဲၤခး လီၤတၢ်အဃိ ၀ဲပၠၣ်ကရူၢ်ပူၤဒူသ၀ီ(၁၁)ဖျၢၣ် ဘၣ်ဃ့ၢ်ထိၣ်၀ဲဒီး လၢအ၀ဲသ့ၣ်အဂီၢ်လိၣ်ဘၣ်၀ဲဂံၢ်ခီၣ်ထံးတၢ်အီၣ်တၢ်အီ,ကသံၣ်ကသီ တၢ်ဆီၣ်ထွဲမၤစၢၤ အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ.
စးထီၣ်ဖဲအပူၤကွံၥ်လါဖ့ၤဘြူၤအါရံၤ ၁၅ သီ မုၢ်နၤခီ ၁၁း၀၀ နၣ်ရံၣ်ဘျဲၣ်အဆၢကတီၢ်န့ၣ် သုးကီၣ်ကးအကဘီယူၤလဲၤတ့ၢ်လီၤ၀ဲ မ့ၣ်ပိၢ်အတွဲတဖၣ်ဆူ ၀ဲပၠၣ်ကရူၢ် ဖါပီၢ်သ၀ီအခိၣ်အဃၢၤကအိၣ်လၢ(၆)ဘျီညါအဃိ သ၀ီ(၁၁)ဖျၢၣ်ပူၤ ဟံၣ်ခိၣ် (၁၂၃၀)ဖျၢၣ်, ပှၤနီၣ်ဂံၢ်(၇၀၅၃)ဂၤ ဘၣ်ဃ့ၢ်ထီၣ်၀ဲဒၣ်ဒ်အံၤလီၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
တကီၢ်ခါခဲအံၤကမျၢၢ်လၢအဃ့ၢ်ထီၣ်သ့ၣ်တဖၣ်တနီၤန့ၣ်လဲၤစံၣ်အိၣ်၀ဲလၢပှၤဒူပှၤသ၀ီ,အကျီးပူၤဒဲဒီးတနီၤန့ၣ်စံၣ်ထီၣ်၀ဲလၢ ထးခီအိၣ်အသိးလၢလၥ်ခီတကပၤစ့ၢ်ကီးအိၣ်အဃိလၢအ၀ဲသ့ၣ်အဂီၢ်လိၣ်ဘၣ်၀ဲတၢ်အီၣ်တၢ်အီ,ကသံၣ်ကသီသ့ၣ်တဖၣ်အဂ့ၢ်န့ၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
အ၀ဲစံး၀ဲလၢ“ဖဲ(၁၅)သီအနံၤန့ၣ်ပယီၤသုးကဘီယူၤဟဲခးလီၤတၢ်.ဘၣ်၀ဲဒၣ်ဖါပီၢ်,၀ဲပၠၣ်,မဲၢ်ကနးခံသ၀ီတဖၣ်န့ၣ်.ခဲအံၤကမျၢၢ်တဖၣ်န့ၣ်ဘၣ်စံၣ်မှံဟးဖျိးန့ၣ်.ပှၤဃ့ၢ်ထီၣ်နီၣ်ဂံၢ်န့ၣ်အဂၤ(၃၀၀၀)ဘျဲၣ်,တၢ်ကီတၢ်ခဲဒုအိၣ်လီၤအ၀ဲသ့ၣ်စံၣ်ထီၣ်န့ၣ်ကူတဘ့ၣ်လၢလိၤက့ၤတဘ့ၣ်လၢလိၤလီၤ.အဃိအ၀ဲသ့ၣ်န့ၣ်လိၣ်၀ဲဘၣ်တၢ်အီၣ်တၢ်အီၣ်,တၢ်ခိၣ်ဒုး,ကသံၣ်ကသီသ့ၣ်တဖၣ်မီၤနီၤ.သ၀ီအိၣ်ဘူးဖဲန့ၣ်တဖၣ်န့ၣ်အိၣ်လၢသ၀ီပူၤတဘူၣ်ဘၣ်အိၣ်လၢမံၤခိၣ်ပှၢ်ကျါ.တမ့ၢ်ထဲ၀ဲပၠၣ်ကရူၢ်တဘ့ၣ်ဘၣ်မဲၢ်ကနးခံစ့ၢ်ကီးပှၤအိၣ်တဘူၣ်လၢၤဘၣ်ပှၤစံၣ်လၢၥ်လံ”အဂ့ၢ်န့ၣ် စံး၀ဲန့ၣ်လီၤ.
လၢန့ၣ်အမဲၥ်ညါတချုးကဘီယူၤလဲၤခးလီၤတၢ်လၢ၀ဲပၠၣ်ကရူၢ် ဖါပီၢ်သ၀ီပူၤဒံးဘၣ်အခါန့ၣ် ဖဲလါဖ့ၤဘြူၤအါရံၤ ၁၄ သီ ၂း၀၀ နၣ်ရံၣ်အဆၢကတီၢ်န့ၣ် (သုးက့ ၅)ကမၤမိၢ်(ခမရ-၄၀၈)ခးလီၤကျိဖးဒိၣ်(၃)ဖျၢၣ်လီၤတဲၥ်ပိၢ်ဖးထီၣ်၀ဲဒံး၀ဲလၢဖါပီၢ်သ၀ီပူၤ,သ၀ီချၢ အဃိ ဖဲန့ၣ်ဟံၣ်(၃)ဖျၢၣ်,စဲးထဲၢ်စံၥ်(၁)ခိၣ်ဟးဂီၤ၀ဲဒၣ်န့ၣ်လီၤ.
တကတီၢ်ဃီဖဲမုၢ်ဆ့ၣ်ထီၣ်(၁၅)သီ ၇း၀၀ နၣ်ရံၣ်အဆၢကတီၢ်စ့ၢ်ကီး ပယီၤသုးတဒူၣ်ဃီ၀ဲအံၤခးလီၤကဒီးကျိဖးဒိၣ်(၂)ဖျၢၣ် လီၤတဲၥ်ပိၢ်ဖးထီၣ်ကဒီး၀ဲလၢဖါပီၢ်သ၀ီပူၤသ၀ီချၢအဃိ သ၀ီဖိအသိလ့ၣ်ယီၢ်(ဆဲးကၢး)ဟးဂီၤ၀ဲဒၣ်တခိၣ်ကဲထီၣ်ဒံး၀ဲ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဒ်န့ၣ်အသိးဖၣ်အၣ်ကီၢ်ဆၣ်၀ဲပၠၣ်ကရူၢ်အမဲၥ်ညါ ဖဲလါဖ့ၤဘြူၤအါရံၤ ၁၅ သီ မုၢ်နၤခီ ၁၁း၃၀ အဆၢကတီၢ်န့ၣ် ပယီၤသုးကဘီယူၤ လဲၤတ့ၢ်လီၤဒံး၀ဲမ့ၣ်ပိၢ်(၂)ဖျၢၣ်လၢဘံလ့ကီၢ်ဆၣ် ကီၢ်ဟဲသ၀ီပူၤအဃိ ကမျၢၢ်ဘၣ်ဒိ(၅)ဂၤဒီး ဟံၣ်ဟးဂီၤ၀ဲ(၉)ဖျၢၣ်ကဲထီၣ်ဒံး ၀ဲန့ၣ်လီၤ.
တကီၢ်ခါခဲအံၤဒူသထူၣ်ကီၢ်ရ့ၣ်ဒီတဘ့ၣ်အပူၤန့ၣ် ခီဖျိပယီၤသုးအံၤမၤအါထီၣ် အဂံၢ်အဘါ,ခးလီၤကျိဖးဒိၣ်,သူ၀ဲဒၣ်ဒြိ,တကးဒံးဘၣ် ဟဲခးလီၤတၢ်ဒီးကဘီယူၤတလီၢ်လီၢ်အဃိ လီၤဆီဒၣ်တၢ်ဘံလ့,ကၠဲးထိၣ်, ဖၣ်အၣ်ကီၢ်ဆၣ်ပူၤ ကမျၢၢ်ထံဖိကီၢ်ကမျၢၢ်တဖၣ်အါဒၣ် တက့ၢ်န့ၣ်ဘၣ်ဃ့ၢ်မှံဟးဖျိးဘၣ်အိၣ်လၢတၢ်ပျံၤတၢ်ဖုး, တၢ်ဘၣ်ယိၣ် ဘၣ်ဘှီပူၤအဂ့ၢ်န့ၣ် ကီၢ်ရ့ၣ်ခိၣ် စံးအါထီၣ်၀ဲန့ၣ်လီၤ.
“အ၀ဲသ့ၣ်န့ၣ်ခဲအံၤပသ့ၣ်ညါဘၣ်လၢအ၀ဲသ့ၣ်နီၣ်ဂံၢ်လီၤစှၤထီၣ်လံ.အဃိကဟဲထီၣ်လၢခီၣ်န့ၣ်တၢ်ကီတၢ်ခဲအိၣ်အဃိအ၀ဲသ့ၣ်န့ၣ် သူအါက့ၤ၀ဲလၢကဘီယူၤ,ဒြိသ့ၣ်တဖၣ်လီၤ.လီၤဆီဒၣ်တၢ်ဒ်သိးကၠဲးထိၣ်ကီၢ်ဆၣ်အပူၤန့ၣ်ဒြိစ့ၢ်ကီးကွံၥ်လီၤ၀ဲ,လၢကျိဖးဒိၣ်စ့ၢ်ကီး ကွံၥ်လီၤ၀ဲလီၤ.မ့မ့ၢ်လၢဘံလ့ကီၢ်ဆၣ်ပူၤန့ၣ်သူ၀ဲဒၣ်လၢကဘီယူၤဟးကွံၥ်လီၤ၀ဲလၢသ၀ီပူၤ.ခးလီၤတၢ်န့ၣ်တကွၢ်၀ဲလၢတၢ်ခးပနီၣ်လီၢ်လီၤတံၢ်လီၤဆဲးဘၣ်.လၢအဲၣ်ဒိးကွံၥ်၀ဲန့ၣ်ကွံၥ်၀ဲလီၤ.”အဂ့ၢ်န့ၣ် စံး၀ဲန့ၣ်လီၤ.
ဒူသထူၣ်ကီၢ်ရ့ၣ်ပူၤ စးထီၣ်ဖဲ(၂၀၂၅)လါယနူၤအါရံၤထီၣ် ၁ သီ တၢ်စးထီၣ်လဲၤက၀ီၤခးမဲးပြ့ခံသုးကလၢၤဒီး တၢ်ထီၣ်န့ၢ် မဲးပြ့ခံသုးကလၢၤ၀ံၤလီၢ်န့ၣ် ပယီၤသုးအံၤခးလီၤကျိဖးဒိၣ်သူအါထီၣ်၀ဲဒြိ,ကဘီယူၤတၢ်ဟူးတၢ်ဂဲၤဟဲထီၣ်၀ဲဖျိဖျိဖျါဖျါ အဂ့ၢ်န့ၣ် သ့ၣ်ညါဘၣ်န့ၣ်လီၤ.
