လါဖ့ၤဘြူၤအါရံၤ ၂သီ, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၁)သထူၣ်ကီၢ်ရ့ၣ်,ဘံလ့ကီၢ်ဆၣ်သုးကီၣ်ကးမဲးပြ့းခံသုးကလၢၤအံၤတၢ်ထီၣ်မၤန့ၢ်ကွံၥ်ဝဲဖဲမဟါလါဖ့ၤဘြူၤအါရံၤ(၁)သီအနံၤဂီၤခီဒီးတၢ်ဖီၣ်န့ၢ်ဝဲပယီၤသုးအဂၤ(၂၀)ဘျဲၣ်အကျါ,ပၣ်ဃုၥ်ဝဲဒီးအသုးခိၣ်ဖိတဖၣ်အဂ့ၢ်,ခ့ၣ်အဲၣ်ယူၣ်ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
မဲးပြ့ခံပယီၤသုးကလၢၤအံၤ,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ခိၣ်ရိၢ်မဲထီၣ်ဒုးဝဲစးထီၣ်လၢအပူၤကွံၥ်လါယနူၤအါရံၤ(၁)သီအခါလံၤလံၤဒီးသုးကလၢၤအံၤတၢ်မၤန့ၢ်ကွံၥ်ဝဲဖဲမဟါ(၁၁)ခိၣ်ဃၢၤအဂ့ၢ်,ခ့ၣ်အဲၣ်ယူၣ်,သုးက့(၁)သုးက့ခိၣ်သုးခိၣ်ကျၢၢ်ဖိစီၤစိမၠ့ၣ်ထွ့စံးဝဲဒၣ်ဒ်အံၤန့ၣ်လီၤ.
“တၢ်မၤန့ၢ်ဝဲဖဲ(၁၁)နၣ်ရံၣ်အဆၢကတီၢ်လီၤ.ခဲအံၤတၢ်ရှဲလဲကွံၥ်ဝဲဝံၤလံ,ကျိဖိကျိဖးဒိၣ်န့ၢ်လီၤ.စရီလီၤတံၢ်လီၤဆဲးခီပတဲတသ့ဒံးဘၣ်.တၢ်ဖီၣ်ချူးဝဲပယီၤအဂၤ(၂၀)ဘျဲၣ်အကျါန့ၣ်ပၣ်ဃုၥ်ဝဲဒီးအသုးခိၣ်ဖိပတီၢ်(၂)ဂၤန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
ဖဲတၢ်စးထီၣ်မၤဝဲတၢ်ထီၣ်ဒုးဝဲသုးကီၣ်ကးအသုးကလၢၤအံၤအဆၢကတီၢ်အပူၤ,သုးကီၣ်ကးအံၤခးလီၤဝဲကျိဖိကျိဖးဒိၣ်,အမဲၥ်ညါမၤဝဲကလံၤကျါတၢ်ခးလီၤစၢၤတၢ်ဆူၣ်ဆူၣ်အဃိခိၣ်ဃၢၤဟံၣ်လၢအဘူး(၆)ဖျၢၣ်ဘၣ်ဟးဂီၤကွံၥ်ဝဲဒၣ်အဂ့ၢ်,ခ့ၣ်အဲၣ်ယူၣ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ခီဖျိတၢ်ဒုးအဃိ,မဲးပြ့ခံသဝီကရူၢ်ဒီးအံစူခံအစူခၠီသဝီကရူၢ်အပူၤသဝီ(၁၂)ဖျၢၣ်လီၢ်ကဝီၤဖိအဂၤ(၂၀၀၀)ဘျဲၣ်ဘၣ်ဃ့ၢ်ထီၣ်အိၣ်ကဒုဝဲအသးအသိး,ဖိသၣ်တၢ်မၤလိကၠိတဖၣ်ဘၣ်ပတုၥ်ဝဲအသးတုၤလၢခဲအံၤအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,မဲးပြ့ခံသုးကလၢၤအံၤသုးကီၣ်ကးခီၣ်ချ့သုးရ့ၣ်(ခမရ)(၄၀၅)ဆီလီၤသးဟူးဂဲၤတ့ၢ်ဝဲဒီးသုးဂံၢ်ဘါအိၣ်ဝဲ(၁၀၀)ဃၣ်ဃၣ်အဂ့ၢ်,ခ့ၣ်အဲၣ်ယူၣ်ဂံၢ်ခီၣ်ထံးသုးပှၤဟ့ၣ်တၢ်ကစီၣ်ဖိတဖၣ်တယၥ်စံးဝဲဒၣ်န့ၣ်လီၤ.
