လါမးၡး ၈ သီ, ၂၀၂၅ နံၣ်, ခ့ၣ်အဲးစံၣ်
ဒ်သိးကညီပိၥ်မုၣ်သ့ၣ်တဖၣ်တၢ်ပၣ်ဃုၥ်မၤသကိးတၢ်လၢထံရူၢ်ကီၢ်သဲး,တၢ်တီခိၣ်ရိၣ်မဲပူၤကအါထီၣ်အဂီၢ်အရ့ဒိၣ်ဝဲလၢခိၣ်နၢ်သ့ၣ်တဖၣ်ကဟ့ၣ်သဆၣ်ထီၣ်ဘၣ်ဝဲဒီးကမၤချ့ထီၣ်တၢ်ဒုးပၣ်ဃုၥ်ပၣ်ဂီၢ်ပိၥ်မုၣ်လၢတၢ်ဖံးတၢ်မၤပူၤအဂ့ၢ်ကညီပိၥ်မုၣ်ကရၢဆီၣ်တခူၣ်ထီၣ်ဝဲဖဲတနံၤလါမးၡး(၈)သီလၢအလီၤဘၣ်ဝဲဟီၣ်ခိၣ်ဒီဘ့ၣ်ပိၥ်မုၣ်အမုၢ်နံၤပှဲၤထီၣ်(၁၁၄)ဝီတဝီအပူၤန့ၣ်လီၤ.
လၢအလီၤဘၣ်ဝဲဟီၣ်ခိၣ်ဒီဘ့ၣ်ပိၥ်မုၣ်အမုၢ်နံၤအတၢ်ဂ့ၢ်မိၢ်ပှၢ်တခီန့ၣ်မ့ၢ်ဝဲ”မၤချ့ထီၣ်ပတၢ်ဟူးတၢ်ဂဲၤလၢမုၣ်ခွါတၢ်တုၤသိးထဲသိးအဂီၢ်”တၢ်ဂ့ၢ်အံၤန့ၣ်မ့ၢ်တၢ်ဂ့ၢ်မိၢ်ပှၢ်လၢအဘၣ်လိၥ်ဖိးမံလိၥ်အသးဒီးပတၢ်အိၣ်သးလၢဆၢကတီၢ်ခဲအံၤလၢတၢ်ကသူၣ်ထီၣ်ကီၢ်သူလ့ၤပဒိၣ်အဂီၢ်အဃိအရ့ဒိၣ်လၢတၢ်ကဘၣ်ဆီၣ်တခူထီၣ်ဒီးမၤချ့ထီၣ်ဘၣ်မုၣ်ခွါတၢ်တုၤသိးထဲသိးကအိၣ်ထီၣ်လၢပှၤတဝၢပူၤတၢ်သနၢၣ်ကိးကပၤဒဲးအဂ့ၢ်ကညီပိၥ်မုၣ်ကရၢစံးလီၤဝဲလၢအလံၥ်တၢ်ပၥ်ဖျါအပူၤန့ၣ်လီၤ.
ကီၢ်သူလ့ၤဟီၣ်ကဝီၤအပူၤပိၥ်မုၣ်သ့ၣ်တဖၣ်ဟ့ၣ်လီၤအသး,နုၥ်လီၤပၣ်ဃုၥ်မၤသကိးတၢ်လၢတၢ်ပၢၢ်ဆၢတၢ်မၤနၢၤအဂီၢ်လၢကၠိသရၣ်မုၣ်သနၢၣ်,ကသံၣ်သရၣ်မုၣ်သနၢၣ်,သဝီသးပှၢ်,သုးဒီးပၢပြးသနၢၣ်,ပှၤဂ့ၢ်ဝီသနၢၣ်သ့ၣ်တဖၣ်နုၥ်လီၤတီခိၣ်ရိၣ်မဲတၢ်အနီၣ်ဂံၢ်အိၣ်ဝဲအါမးဘၣ်ဆၣ်မ့မ့ၢ်လၢတၢ်တီခိၣ်ရိၣ်မဲတကပၤန့ၣ်အနီၣ်ဂံၢ်အိၣ်ဆံးအိၣ်စှၤဝဲဒံးအဂ့ၢ်န့ၣ်ကညီပိၥ်မုၣ်ကရၢအလံၥ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
အဃိစးထီၣ်လၢတၢ်ပၢၢ်ဆၢစးထီၣ်အခါလံၤလံၤကညီပိၥ်မုၣ်အတၢ်ပၣ်ဃုၥ်ပမၤသကိးတၢ်အံၤတၢ်လဲၤထီၣ်လဲၤထီဟဲအိၣ်အါထီၣ်ဖးဒိၣ်အဖီခိၣ်အလီၢ်ခိၣ်လၢကညီခိၣ်နၢ်သ့ၣ်တဖၣ်ကပၥ်ပနီၣ်ပိၥ်မုၣ်တၢ်ပၣ်ဃုၥ်ပၣ်ဂီၢ်ဒီးတၢ်လဲၤထီၣ်လဲၤထီအံၤဒီးပကဘၣ်ဟူးဂဲၤမၤအါထီၣ်ပိၥ်မုၣ်ခၢၣ်စးလၢတၢ်တီခိၣ်ရိၣ်မဲအပူၤအဂ့ၢ်န့ၣ်လၢလံၥ်တၢ်ပၥ်ဖျါအပူၤဆီၣ်တခူစံးဝဲန့ၣ်လီၤ.
ဒ်န့ၣ်အသိးတနံၤလၢအမ့ၢ်ဟီၣ်ခိၣ်ဒီဘ့ၣ်ပိၥ်မုၣ်အမုၢ်နံၤအံၤအဖီခိၣ်ပထံၣ်ဘၣ်လၢပိၥ်မုၣ်လၢအကထိ,ကလးသ့ၣ်တဖၣ်ဘၣ်အိၣ်မူဒံးလၢတၢ်ပျံၤတၢ်ဖုး,တၢ်ဘၣ်ယိၣ်ဘၣ်ဘှီဒီးတၢ်မၤသံ,မၤဆူးမၤဆါအီၤလၢပယီၤသုးမီၤစိရိၤသ့ၣ်တဖၣ်အဃိမူဒါအိၣ်လၢခိၣ်နၢ်သ့ၣ်တဖၣ်ကမၤချ့ထီၣ်တၢ်ဒုးပၣ်ဃုၥ်ပၣ်ဂီၢ်,ဆီၣ်ထွဲပိၥ်မုၣ်ဒီးကဟ့ၣ်စိဟ့ၣ်ကမီၤအဝဲသ့ၣ်လၢကသ့နၥ်န့ၢ်လီၤသး,သ့ဃုကျဲဘှါၡဲအနီၢ်ကစၢ်တၢ်ဂ့ၢ်ကီအဂ့ၢ်စံးစ့ၢ်ကီးဝဲန့ၣ်လီၤ.
လၢန့ၣ်အမဲၥ်ညါကညီပိၥ်မုၣ်လၢအိၣ်ကီၢ်သူလ့ၤအပူၤမ့ၢ်ဂ့ၤ,ကီၢ်ဆၢမ့ၢ်ဂ့ၤဒီးလၢဟီၣ်ခိၣ်ချၢဒီဘ့ၣ်သ့ၣ်တဖၣ်ကပှဲၤဒီးတၢ်ဂံၢ်တၢ်ဘါ,တၢ်သူၣ်ဒူသးဒူ,အိၣ်ဒီးတၢ်နၥ်န့ၢ်လီၤသးလၢပှဲၤလၢပှၤကလုၥ်အဂီၢ်ဒီးပှၤတဝၢတၢ်လဲၤထီၣ်လဲၤထီအဂီၢ်န့ၣ်တက့ၢ်အဂ့ၢ်ကညီပိၥ်မုၣ်ကရၢဆှၢဃီၤဘၣ်ဝဲအတၢ်ဆၢဂ့ၤဆၢဝါဆူကညီပိၥ်မုၣ်ခဲလၢၥ်အအိၣ်န့ၣ်လီၤ.
