လါမးရှး ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ပယီၤသုးအံၤတၢ်ဒုးကဲထီၣ်တအိၣ် ခးလီၤကျိဖးဒိၣ်အမဲၥ်ညါ သူ၀ဲဒြိဟးတ့ၢ်လီၤမ့ၣ်ပိၢ်ဟဲအါထီၣ်၀ဲဒီး ကမျၢၢ်စ့ၢ်ကီးဘၣ်ဒိဘၣ်ထံးအိၣ်ထီၣ်၀ဲအဂ့ၢ်န့ၣ် လီၢ်က၀ီၤ ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
စးထီၣ်ဖဲတလါအံၤလါမးရှးထီၣ်အံၤန့ၣ် ပယီၤသုးလၢအိၣ်ကၠဲးထိၣ်ကီၢ်ဆၣ်ပူၤသ့ၣ်တဖၣ်အံၤ တၢ်ဒုးကဲထီၣ်တအိၣ် ဘၣ်ဆၣ် သူ၀ဲကျိဖးဒိၣ်,ဒြိမ့ၣ်ပိၢ်ပညိၣ်ဟးခးလီၤ၀ဲတၢ်လၢဒူသ၀ီပူၤဒီးတၢ်ပၢၢ်ဆၢအိၣ်ဆိးလီၢ်ကျဲဟဲအါထီၣ်၀ဲဖျိဖျိဖျါဖျါအဂ့ၢ်န့ၣ် လီၢ်က၀ီၤ ပှၤဘၣ်မူလၢတအဲၣ်ဒိးပၥ်ဖျါအမံၤတဂၤ စံး၀ဲန့ၣ်လီၤ.
“သုးမီၤစိရိၤအံၤသူအါထီၣ်၀ဲဒြိလၢပဟီၣ်က၀ီၤပူၤ.တၢ်လီၢ်လၢကွၢ်၀ဲမ့လီၤဆီန့ၣ်ကွံၥ်လီၤ၀ဲ.မ့၀ံၤတၢ်ပၢၢ်ဆၢအပှၤတကပၤနါက့ ဟးထီၣ်က့ၤလီၤန့ၣ်တဟးပလဲၥ်သးဘၣ်,ပၥ်ဖျါသးလၢကျဲမုၢ်အါလၢသ၀ီပူၤအါအဃိ ပယီၤထံၣ်၀ဲအါဘျီကဘၣ်မ့ၢ်ခးလီၤ ၀ဲဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်ခီဖျိလၢပယီၤသုးအံၤသူအါထီၣ်၀ဲကျိဖးဒိၣ်ဒီးဒြိအဃိ ကမျၢၢ်တဖၣ်အိၣ်ဒီးတၢ်ပျံၤတၢ်ဖုးလဲၤလၢကျီးပူၤတဘူၣ် လၢၤဘၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤ.
“ပယီၤသုးတဖၣ်သူအါထီၣ်၀ဲဒြိတဖၣ်အဃိကမျၢၢ်တဖၣ်ဘၣ်ယိၣ်ဘၣ်ဘှီ၀ဲတၢ်နီၣ်ဂံၢ်တၢတထံၣ်န့ၣ် ဒြိတဖၣ်န့ၣ်တၢ်ပၥ်ပနီၣ် အလီၢ်န့ၣ်ကွံၥ်၀ဲဒၣ်လိၤမးလီၤ.ခံထံၣ်တထံၣ်န့ၣ်ခဲအံၤဘၣ်လၢပှၤဖဲးခုးဖဲးသံၣ်,ပှၤမၤဒိးမၤကၣ်လီၤသး.ဒြိန့ၣ်မ့ထံၣ်၀ဲပှၤအိၣ်ဖှိၣ်အိၣ်တပူၤဃီန့ၣ်ကွံၥ်လီၤ၀ဲအဃိကမျၢၢ်န့ၣ်မၤတၢ်တဘူၣ်လၢၤဘၣ်.ကမၤတၢ်အဂီၢ်ကဲထီၣ်တၢ်ကီတၢ်ခဲအဃိအ၀ဲသ့ၣ်ဘၣ်အိၣ်၀ဲလၢတၢ်ပူၤတၢ်ဖျဲးအလီၢ်လၢအတဘူးတယံၤဒီးတၢ်ပူၤဒ်န့ၣ်လီၤ”အဂ့ၢ်န့ၣ် စံး၀ဲန့ၣ်လီၤ.
ဒ်လီၢ်က၀ီၤတၢ်မၤနီၣ်မၤဃါအိၣ်ဖျါအသိးန့ၣ် လါမးရှး ၁ သီတုၤ ၁၆ သီန့ၣ် လၢဖွ့ဖူကၢ်ကရူၢ်,ခရၢၢ်ကရူၢ်ဒီး ၀ီၢ်ကျီၢ်ကရူၢ် ဒူသ၀ီတဖၣ်အပူၤ ပယီၤသုး(၃၁၀)အမျိၥ်သုး,ခီၣ်ချ့သုးရ့ၣ် (ခမရ- ၂၀၇)သုးရ့ၣ် ခးလီၤ၀ဲကျိဖးဒိၣ်ခဲလၢၥ်တစှၤန့ၢ်(၂၅)ဖျၢၣ်, သူ၀ဲဒြိဟးတ့ၢ်လီၤ ၀ဲမ့ၣ်ပိၢ် ခဲလၢၥ်အိၣ်၀ဲ(၇)ဖျၢၣ်ဒီးကဘီယူၤစ့ၢ်ကီးလဲၤတ့ၢ်လီၤ၀ဲမ့ၣ်ပိၢ်(၂)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးလၢပယီၤသုးအတၢ်ဟူးတၢ်ဂဲၤဒ်အံၤအဃိ ကမျၢၢ်ဘၣ်ဒိဘၣ်ထံးတစှၤန့ၢ်(၄)ဂၤဒီး ဟံၣ်တၢ်သူၣ်ထီၣ်,ကမျၢၢ်တၢ်ဖံးအီၣ် မၤအီၣ်လီၢ်ကျီးပူၤတၢ်ထူၣ်တၢ်ဘိတဖၣ်ဟးဂီၤ၀ဲဒၣ်အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
