လါမးၡး ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်(သုးက့-၃)ဟီၣ်ကဝီ,မူကီၢ်ဆၣ်အပူၤဖဲမဟါလါမးၡး(၆)သီအနံၤန့ၣ်ခီဖျိလၢပ ယီၤသုးကီၣ်ကးကလံၤကျါတၢ်ဟဲတ့ၢ်လီၤမ့ၣ်ပိၢ်အဃိတသီအတီၢ်ပူၤကမျၢၢ်ဘၣ်သံဘၣ်ဒိဘၣ်ထံးခဲလၢၥ်(၅)ဂၤအဂ့ၢ်ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဝဲဖဲတနံၤလါမးၡး(၈)သီအနံၤန့ၣ်လီၤ.
ပယီၤသုးကီၣ်ကးကဘီယူၤဒုးသုးလၢအအိၣ်ဟဲန့ၢ်လၢတီအူသုးကီၣ်ကးကလံၤသုးသန့တဘ့ၣ်ဖဲလါမးၡး(၆)သီအနံၤမုၢ်ဃ့ၢ်လီၤ(၂)နၣ်ရံၣ်အဆၢကတီၢ်န့ၣ်ဟဲတ့ၢ်လီၤမ့ၣ်ပိၢ်ဖဲ(ကၠီၣ်ကၠံပီၣ်)သဝီအပူၤဝံၤဖဲ(၂း၀၅)မံးနံးအဆၢကတီၢ်ကဒီးန့ၣ်ဟဲခးလီၤကဒါက့ၤတၢ်ဖဲ(မကၠံတီ)သဝီပူၤဒ်အံၤအဖီခိၣ်ပှၤသဝီဖိဘၣ်သံကွံၥ်ဝဲ(၃)ဂၤ,ဘၣ်ဒိ၂)ဂၤအဂ့ၢ်ခ့ၣ်အဲၣ်ယူၣ်အလံၥ်တၢ်ပၥ်ဖျါအပူၤအသိးသ့ၣ်ညါဘၣ်န့ၣ်လီၤ.
ခီဖျိဖဲအပူၤကွံၥ်စှၤသီအတီၢ်ပူၤန့ၣ်ပယီၤသုးကီၣ်ကးဒီးကညီတၢ်ပၢၢ်ဆၢသုးသ့ၣ်တဖၣ်အဘၢၣ်စၢၤတၢ်ဒုးတၢ်ယၤကဲထီၣ်အသးအိၣ်ဝဲအဃိဒ်ညီနုၢ်အသိးန့ၣ်ပယီၤသုးတကပၤသူဝဲကလံၤကျါကဘီယူၤဟဲတ့ၢ်လီၤဝဲမ့ၣ်ပိၢ်ဖဲဒူသဝီဝဲန့ၣ်သ့ၣ်တဖၣ်ဒ်အံၤလီၤအဂ့ၢ်,တကီၢ်ခါခဲအံၤကမျၢၢ်ဖဲန့ၣ်သ့ၣ်တဖၣ်တၢ်အိၣ်သးအိၣ်ဝဲဒ်လဲၣ်အဂ့ၢ်န့ၣ်လီၢ်ကဝီၤကီၢ်ဆၣ်အပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
“ဖဲအပူၤကွံၥ်န့ၣ်တၢ်ဒုးတၢ်ယၤကဲထီၣ်ဝဲတစဲးဖိဖဲဒူသဝီအကပိၥ်ကပၤဖဲန့ၣ်န့ၣ်မီၤနီၤ. ပှၤလဲၤဟူးဂဲၤဖဲန့ၣ်ဒီးတၢ်ဒုးကဲထီၣ်သးဖဲန့ၣ်ဝံၤ အလီၢ်ခံပယီၤသုးအံၤဒ်ညီနုၢ်တၢ်မ့ၢ်မၤအီၤဝံၤအဝဲသ့ၣ်ဟဲက့ၤဟူးဂဲၤက့ၤလၢကဘီယူၤဒ်န့ၣ်လီၤ. သဝီပူၤဖဲန့ၣ်ပှၤကမျၢၢ်ဃ့ၢ်ထီၣ်ဝဲဒီး ပှၤအိၣ်တ့ၢ်က့ၤထဲစှၤဂၤလီၤ. တၢ်အိၣ်သးမ့ၢ်ဂ့ၤန့ၣ်ပှၤဟဲက့ၤဝဲလၢသဝီပူၤဒီးမ့ၢ်တဂ့ၤန့ၣ်ပှၤဘၣ်သုးလီၢ်သုးကျဲဒ်န့ၣ်မီၤနီၤ.” အဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါတနံၤဃီဃီအတီၢ်ပူၤခီဖျိပယီၤသုးကီၣ်ကးဟဲဟူးဂဲၤဝဲကလံၤကျါတၢ်ဟူးတၢ်ဂဲၤလၢကမျၢၢ်ဒူသဝီအပူၤလၢခံဘျီအတီၢ်ပူၤအဃိကမျၢၢ်ဟံၣ်ဃီဘၣ်ဟးဂီၤကွံၥ်စ့ၢ်ကီးဝဲ(၆)ဖျၢၣ်အသိးဘၣ်အူအီၣ်ဟးဂီၤကွံၥ်ဝဲ(၁)ဖျၢၣ်အဂ့ၢ်သ့ၣ်ညါဘၣ်အသိးဒ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤအသိးန့ၣ်ကမျၢၢ်လၢအဘၣ်သံဝဲသ့ၣ်တဖၣ်မ့ၢ်ဝဲ(ဒီၣ်ထွ့)သးနံၣ်(၆၃)နံၣ်, မၣ်ခဲၣ်အူ(၅၃)နံၣ်, အူအီၣ်မၠ့ၣ်အ့ (၅၅)နံၣ်သ့ၣ်တဖၣ်န့ၣ်လီၤ.
ဒ်န့ၣ်အသိးကမျၢၢ်လၢအဘၣ်ဒိဘၣ်ထံး(၂)ဂၤသ့ၣ်တဖၣ်စ့ၢ်ကီးန့ၣ်မ့ၢ်ဝဲ မၣ်ဝ့ဝ့အ့သးနံၣ်(၁၅)နံၣ်တဂၤဒီး မၣ်ဖၠိယတနၣ်အီၤ(၂၄)နံၣ် သ့ၣ်တဖၣ်အံၤအဂ့ၢ်န့ၣ်သ့ၣ်ညါဘၣ်န့ၣ်လီၤ.
တကတီၢ်ဃီဖဲတနံၤဃီဝဲန့ၣ်န့ၣ်ပယီၤသုးကီၣ်ကးအံၤဟူးဂဲၤမၤဝဲကလံၤကျါတၢ်ဟဲတ့ၢ်လီၤမ့ၣ်ပိၢ်လၢလၢၢ်ဒိၣ်ကီၢ်ဆၣ်ဟီၣ်ကဝီၤအပူၤလၢ(တယ့စံလီ)သဝီအပူၤအဃိဘၣ်ဟးဂီၤကွံၥ်ဝဲကမျၢၢ်(၁)တဖျၢၣ်ဒံးအဂ့ၢ်ခ့ၣ်အဲၣ်ယူၣ်ပၥ်ဖျါဝဲန့ၣ်လီၤ.
မ့ၢ်ဘၣ်ကွၢ်ကဒါက့ၤလၢချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤပယီၤသုးကီၣ်ကးတကပၤဟူးဂဲၤမၤဝဲကလံၤကျါတၢ်ဟဲတ့ၢ်လီၤမ့ၣ်ပိၢ်,ခးလီၤကျိဖးဒိၣ်တၢ်ဟူးတၢ်ဂဲၤသ့ၣ်တဖၣ်အိၣ်ဒံးကွ့ၢ်ကွ့ၢ်အဃိကမျၢၢ်တၢ်သံတၢ်ပှၥ်,တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤအိၣ်ဝဲကိးနံၤဒဲးဃၣ်ဃၣ်အဂ့ၢ်သ့ၣ်ညါဘၣ်လၢလီၢ်ကဝီၤကီၢ်ဆၣ်အပှၤဘၣ်မူဘၣ်ဒါအအိၣ်န့ၣ်လီၤ.
