လါမးရှး ၁၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)လူၢ်ပျဲၢ်ကီၢ်ဆၣ်အပူၤ ဖဲတဂီၤအံၤအဆၢကတီၢ် သၢဘျီတဘျီ တၢ်လဲၤတ့ၢ်လီၤကဒီး၀ဲဒြိမ့ၣ်ပိၢ်(၃)ဖျၢၣ်လၢ(KNLA)သုး၀ဲၤလီၢ်ခိၣ်သ့ၣ်တၢ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲတနံၤအံၤလါမးရှး ၁၈ သီ ဂီၤခီ ၄း၀၀ နၣ်ရံၣ်ခိၣ်ဃၢၤအဆၢကတီၢ်န့ၣ် တၢ်ဒုးကဲထီၣ်တအိၣ်တၢ်လဲၤတ့ၢ်လီၤကဒီး ဒြိမ့ၣ်ပိၢ်(၃)ဖျၢၣ် လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သးသုး၀ဲၤလီၢ်ခိၣ်သ့ၣ်ဘၣ်ဆၣ်တၢ်ဘၣ်ဒိ ဘၣ်ထံး တအိၣ်၀ဲဘၣ်အဂ့ၢ်န့ၣ် ဖၣ်အၣ်ကီၢ်ရ့ၣ်ခိၣ် ပဒိၣ်စီၤအီၤမီၤအ့ စံး၀ဲန့ၣ်လီၤ.
အ၀ဲစံး၀ဲလၢ“အဟဲကွံၥ်လီၤ၀ဲန့ၣ်(၃)ဖျၢၣ်.ကဘၣ်ဖဲမဂီၤ ၃း၄၀ ဒီး ၄း၁၀ အဘၢၣ်စၢၤန့ၣ်.အဟဲလီၤတဲၥ်တဖျၢၣ်ဒီးတဖျၢၣ်အဘၢၣ် စၢၤန့ၣ်ကအိၣ်ဖဲ ၁၀ မံးနံးလီၤ.လီၤတဲၥ်လၢချံသန့တဖျၢၣ်,လၢစၢၢ်ထး၀ဲၤကျိၤအရူကပၤတဖျၢၣ်ဒီးလၢ(ပြည်ထဲရေး)အရူကပၤန့ၣ် တဖျၢၣ်.တၢ်ဘၣ်ဒိဘၣ်ထံးခီန့ၣ်ယသံကွၢ်န့ၣ်ပှၤတဲတအိၣ်နီမံၤဘၣ်.အိၣ်ဒၣ်ဘၣ်၀ဲထး၀ါ(သိးပၠါ)ဖျိတစဲးတမွဲးလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ.
ခီဖျိတၢ်လဲၤတ့ၢ်လီၤကဒီးဒြိမ့ၣ်ပိၢ်ကဲထီၣ်ကဒီးဒ်အံၤအဃိ ကမျၢၢ်လၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်တဖၣ်ပျံၤတၢ်ဖုးတၢ် ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဆၢကတီၢ်ခဲအံၤဘၣ်လၢဒုးယၤတၢ်သဘံၣ်သဘုၣ်ဆၢကတီၢ်အဃိ ဒုၣ်ဒါအံၤကကူၣ်တရံးပှၤလၢကျဲအဘိဘိသ့၀ဲ အဂ့ၢ်န့ၣ် ပဒိၣ်စီၤအီၤမီၤအ့ စံးအါထီၣ်၀ဲန့ၣ်လီၤ.
“ယဆိကမိၣ်ဒုခဲအံၤပအိၣ်ဒီးတၢ်ဒုးတၢ်ယၤလၢပခးလိၥ်သးဆၢကတီၢ်အဃိ ပဒုၣ်ပဒါန့ၣ်ကကူၣ်ပှၤ,ပပှၤစ့ၢ်ကီးကကူၣ်ဒုၣ်ဒါလီၤ မီၤနီၤ. ပဂဲၥ်လိၥ်တၢ်လၢတၢ်ဒုးတၢ်ယၤအဃိလၢပသုးမုၢ်ဒိၣ်ကူၣ်တရံးဒုး၀ဲဒၣ်ပဒုၣ်ပဒါအသိး ပဒုၣ်ပဒါနါက့ကကူၣ်တရံးဒီးကဂဲၤပှၤ လၢကျဲအဘိဘိလီၤမီၤနီၤ”အဂ့ၢ်န့ၣ် စံး၀ဲန့ၣ်လီၤ.
(သုးက့ ၇)သုး၀ဲၤလီၢ်ခိၣ်သ့ၣ်တၢ်လီၢ်လၢတၢ်လဲၤတ့ၢ်လီၤဒြိမ့ၣ်ပိၢ်ခဲအံၤန့ၣ် အပူၤကွံၥ်လါယနူၤအါရံၤ ၃၁ သီ ကညီတၢ်ပၢၢ်ဆၢ မုၢ်နံၤ အခါဒီး(၂၀၂၄)နံၣ် လါအီးကထိဘၢၣ် ၂၂ သီအနံၤန့ၣ်စ့ၢ်ကီး တၢ်လဲၤတ့ၢ်လီၤ၀ဲဒြိမ့ၣ်ပိၢ်(၂)ဖျၢၣ်စုၥ်စုၥ် ကဲထီၣ်တ့ၢ်အသးဒံးန့ၣ်လီၤ.
ဒ်ခ့ၣ်အဲၣ်ယူၣ်ပှၤဘၣ်မူဘၣ်ဒါစံး၀ဲအသိးန့ၣ် ဒြိလၢတၢ်ဟဲတ့ၢ်လီၤ၀ဲခဲအံၤတဘျီဒီးအပူၤကွံၥ်လၢညါခံဘျီအခါန့ၣ် တၢ်တယးကွၢ်၀ဲလၢ အိၣ်ဟဲလၢကျီၢ်ကတံၥ်တၢ်လီၢ်တတီၤဃီန့ၣ်လီၤ.
