လါမးရှး ၆ သီ, ၂၀၂၅ နံၣ်, ခ့ၣ်အဲးစံၣ်
ထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိလၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တီနီၢ်မုၢ်ထီၣ် မၠၣ်၀တံၣ်ကလံၤထံး ကၠီးခဲးတၢ်လီၢ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဟီၣ်က၀ီၤပူၤတဖၣ်အံၤ တၢ်မၤပူၤဖျဲးအီၤ၀ံၤတုၤလၢခဲအံၤတၢ်ဟဲကိးအီၤ တအိၣ်ဒံးဘၣ်အဃိ ထံကီၢ်ပှၤဘၣ်မူဘၣ်ဒါဘၣ်ထွဲတဖၣ်ကဟဲကိးက့ၤအထံဖိကီၢ်ဖိလၢအဆိအချ့အဂ့ၢ်န့ၣ် (DKBA)ဃ့ထီၣ်ဒီး စံးလီၤ၀ဲဖဲမဟါလါမးရှး ၅ သီ မုၢ်ဃ့ၢ်လီၤ(၁)နၣ်ရံၣ် တၢ်မၤဆှဲလဲတၢ်ကစီၣ်မူးတၢ်ရဲၣ်တၢ်ကျဲၤအပူၤန့ၣ်လီၤ.
(ကၠါဖၠၣ်)ပှၤမၤတၢ်ဖိလၢအပူၤကွံၥ်ဖ့ၤဘြူၤအါရံၤအခါ(DKBA)မၤထူၣ်ဖျဲးထီၣ်အီၤလၢအနီၣ်ဂံၢ်ကအိၣ်အဂၤ(၄၂၀)ဘျဲၣ်အံၤတဖၣ် တၢ်ကိးဃၥ်အ၀ဲန့ၣ်တၢ်ဆၢကတီၢ်န့ၢ်၀ဲခံနွံလံဘၣ်ဆၣ်တုၤလၢခဲအံၤထံကီၢ်ဘၣ်ထွဲပှၤဘၣ်မူဘၣ်ဒါဟဲကိး၀ဲတအိၣ်ဒံးဘၣ်အဖီခိၣ် အဲၣ်ဒိးလၢထံကီၢ်ပှၤဘၣ်မူဘၣ်ဒါဘၣ်ထွဲတဖၣ်ဒီးအဘူးအတံၢ်တဖၣ်ကဟဲကိးက့ၤအ၀ဲသ့ၣ်လၢအဆိအချ့အဂ့ၢ်န့ၣ် (DKBA) ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤဆါအီၤ စံ၀ဲန့ၣ်လီၤ.
“အနီၢ်နီၢ်န့ၣ်တၢ်ဆီၣ်သနံးအံၤဖးဃၢညါ.တုၤလၢပဖံးပမၤတပှၢ်တၢၢ်ဘျီကီၢ်ပယီၤပဒိၣ်မ့ၢ်ဂ့ၤ,ထံဂုၤကီၢ်ဂၤပဒိၣ်မ့ၢ်ဂ့ၤအတဟဲကိးက့ၤအပှၤလၢၤဘၣ်.အခီၣ်ထံးခါန့ၣ်မၢပဆှၢမၢပဃု,တုၤလၢပဟ့ၣ်တပှၢ်တၢၢ်ဘျီတဲက့ၤပှၤလၢတဘၣ်သုကလဲးဒံးဘၣ်အိၣ်ခိးပၥ်စၢၤလၢအံၤပအိၣ်ခိးဒီးမဲၥ်ထံမဲၥ်နိလံ.တၢ်အဃိန့ၣ်အမိၢ်အပၢ်ဂ့ၤ,အဖံအဖုဂ့ၤ,ထံကီၢ်လၢအိၣ်အယံၤတဖၣ်န့ၣ်မ့သ့မ့ဘၣ်န့ၣ်ဟဲက့ၤကိးက့ၤမ့ချ့မ့ဘၣ်ဆှၢလၢထံကျိနံၤမ့ၢ်ဂ့ၤ,တိၤခိၣ်ထိးမ့ၢ်ဂ့ၤန့ၣ်ပကဆှၢအဂီၢ်န့ၣ်ပအိၣ်ခိးပၥ်စၢၤလံ.ခဲအံၤပအိၣ်ခိးလၢပှၤကတူၢ်လိၥ်တၢ်အဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါတၢ်မၤဆှဲတၢ်ကစီၣ်တၢ်ရဲၣ်တၢ်ကျဲၤ၀ံၤအခါန့ၣ်လီၤ.
လၢန့ၣ်အမဲၥ်ညါခီဖျိထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိသ့ၣ်တဖၣ်အံၤအထံအကီၢ်ဘၣ်ထွဲပှၤဘၣ်မူဘၣ်ဒါတဟဲက့ၤကိးအ၀ဲသ့ၣ် ဘၣ်ဒီးအ၀ဲသ့ၣ်စ့ၢ်ကီးအနီၣ်ဂံၢ်အါအဃိ တၢ်ကီတၢ်ခဲအိၣ်လၢတၢ်အိၣ်တၢ်ဆိး,တၢ်အီၣ်တၢ်အီဒီးဆူၣ်ချ့တၢ်အံးထွဲကွၢ်ထွဲ တကပၤအဂ့ၢ်န့ၣ် သုးခိၣ်ကျၢၢ်ဂီၢ်ဂ့ၢ် စီၤဆါအီၤ စံးအါထီၣ်၀ဲန့ၣ်လီၤ.
“အအံၤပဘၣ်ဒုးအီၣ်အ၀ဲသ့ၣ်ဒီးမ့ၤဒီးထံ.ပှၤကညီနီၣ်ဂံၢ်တအါဘၣ်နါက့အိၣ်အဂၤ(၄၀၀)ဘျဲၣ်ညါ.ပှၤအဂၤပှဲၤအံၤန့ၣ်အီၣ်တဘျီဘျီ လၢၤဖးအါညါ.ပဒုးအီၣ်အ၀ဲသ့ၣ်န့ၣ်တၢ်အီၣ်တဒ်သိးလိၥ်အသးဘၣ်.ပ၀ဲပှၤကညီန့ၣ်အီၣ်တၢ်ကပီၥ်,အ၀ဲသ့ၣ်န့ၣ်အီၣ်လၢတၢ်ဖံးတၢ်ညါအဃိကီဒိၣ်မးလီၤ.ပအီၣ်အသိးန့ၣ်အ၀ဲသ့ၣ်အီၣ်တသ့ဘၣ်အဃိဘၣ်မၤန့ၢ်အ၀ဲသ့ၣ်တၢ်န့ၣ်ပ့းပိးတခါစ့ၢ်လီၤ.တၢ်ဘၢၣ်စၢၤန့ၣ်အိၣ်တဆူၣ်တချ့ဘၣ်န့ၣ်ဘၣ်လဲၤဆှၢလၢတၢ်ဆါဟံၣ်၀ံၤနဘၣ်လဲၤအိၣ်စိၢ်က့ၤ.မ့၀ံၤဘၣ်ယိၣ်လၢအ၀ဲသ့ၣ်ကစံၣ်မုၢ်စံးဖျိး,မ့လီၤမၢ်န့ၣ်တၢ်ကလီၤတီလၢပခိၣ်လိၤဧါ.တၢ်တခါအံၤမၤသးဒ်သိးနဖီၣ်ဘၣ်မ့ၣ်အူအ့ၣ်လီၤ”အဂ့ၢ်န့ၣ် စံး၀ဲန့ၣ်လီၤ.
ဒ်(DKBA)ပှၤဘၣ်မူဘၣ်ဒါစံး၀ဲအသိးန့ၣ် ကၠါဖၠၣ်ပှၤမၤတၢ်ဖိလၢတၢ်မၤထူၣ်ဖျဲးထီၣ်၀ဲလၢတၢ်တဆှၢဘၣ်၀ဲဒံးဘၣ်ခဲအံၤ သ့ၣ်တဖၣ်အံၤ လၢကဟဲနုၥ်လီၤဖံးမၤတၢ်လၢဟီၣ်က၀ီၤပူၤအဂီၢ်(၉၉)မျးကယၤန့ၣ်အိၣ်ဟဲနုၥ်လီၤခီဃီၤ၀ဲဒၣ်လၢကီၢ်ကၠီၣ်တဲၣ်-မဲၢ်ဆီး၀့ၢ်အံၤတဆီဒီး ဒ်န့ၣ်အသိးပှၤသ့ၣ်တဖၣ်အံၤမ့ၢ်၀ဲထံကီၢ်(၂၂)ဘ့ၣ်ပူၤအထံဖိကီၢ်ဖိသ့ၣ်တဖၣ်န့ၣ်လီၤ.
တကတီၢ်ဃီလၢတၢ်ကမၤဆှဲမၤလဲလဲကွံၥ်(ကၠါဖၠၣ်)တၢ်ဖံးတၢ်မၤသ့ၣ်တဖၣ်အံၤအဂီၢ်ဖဲအပူၤကွံၥ်လါဖ့ၤဘြူၤအါရံၤ ၁၂ သီအနံၤ န့ၣ်စ့ၢ်ကီး လၢကၠီးခဲးဟီၣ်က၀ီၤအံၤတဆီ(DKBA)မၤထူၣ်ဖျဲးအးလီၤကွံၥ်၀ဲ(ကၠါဖၠၣ်)ပှၤမၤတၢ်ဖိ(၂၆၁)ဂၤဆူ ကီၢ်ကၠီၣ်တဲၣ် ပှၤဘၣ်မူ ဘၣ်ဒါစုပူၤ ဒံးန့ၣ်လီၤ.
ဒ်န့ၣ်အသိးဖဲ(DKBA)ဆှၢကွံၥ်(ကၠါဖၠၣ်)ပှၤမၤတၢ်ဖိဆူကၠီၣ်တဲၣ်စုပူၤအိၣ်ထီၣ်ဖဲန့ၣ်၀ံၤလီၢ်ခံ သုးကီၣ်ကးအံၤဒုးသ့ၣ်ညါ၀ဲ (DKBA)လၢခါလၢကဟဲ ဘၣ်ဃးတၢ်ဆှၢကၠါဖၠၣ်ပှၤမၤတၢ်ဖိအံၤတၢ်ကဘၣ်ဆှၢခီဖျိ၀ဲလၢမၠၣ်၀ံၣ်နီၣ်ဂံၢ်(၁)တိၤ အဂ့ၢ်(DKBA) ပှၤဘၣ်မူဘၣ်ဒါစံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်၀ဲဒီး ဒ်န့ၣ်အသိး ဘၣ်ဃးတၢ်ဂ့ၢ်၀ဲအံၤ ဖဲဖ့ၤဘြူၤအါရံၤ ၁၅ သီ အနံၤစ့ၢ်ကီး လၢမဲၢ်ဆီး၀့ၢ်တၢ်လီၢ်တတီၤအပူၤ ကီၢ်ပယီၤပှၤဘၣ်မူဘၣ်ဒါဒီးကၠီၣ်တဲၣ် ပှၤဘၣ်မူဘၣ်ဒါထံၣ်လိၥ်သးမၤ၀ဲ တၢ်အိၣ်ဖှိၣ်အိၣ် ၀ဲဒၣ်န့ၣ်လီၤ.
စးထီၣ်ဖဲန့ၣ်၀ံၤလီၢ်ခံတုၤလၢခဲအံၤ(ကၠါဖၠၣ်)ပှၤမၤတၢ်ဖိလၢအိၣ်ကၠီးခဲးဟီၣ်က၀ီၤပူၤလၢတၢ်ထုးထီၣ်မၤထူၣ်ဖျဲး၀ဲတဖၣ် ထံဂုၤကီၢ်ဂၤဘၣ်ထွဲမၤဘၣ်မူဘၣ်ဒါဟဲကိး၀ဲတအိၣ်,ဘၣ်အိၣ်ကတၥ်ထီသးတုၤလၢခဲအံၤတစုဘၣ်ဟဲကဲထီၣ်၀ဲဒ်အံၤလီၤအဂ့ၢ်န့ၣ် သ့ၣ်ညါန့ၣ်လီၤ.
