လါမးရှး ၁၆ သီ, ၂၀၂၅ နံၣ်, ခ့ၣ်အဲးစံၣ်
ပူၣ်လူၣ်တူၣ်ပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇) တၢ်ကြဲၢ်ကီၢ်ဆၣ်အပူၤအံၤ ဖဲတၢ်ထီၣ်န့ၢ်၀ဲသုးကလၢၤအံၤအခါ ပယီၤသုးတကပၤသံ(၁၂)ဂၤဒီး တၢ်မၤန့ၢ်၀ဲတၢ်စုက၀ဲၤ, ကျိချံပှၥ်သၣ် အါမးအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပၥ်ဖျါ၀ဲဖဲမဟါလါမးရှး ၁၅ သီအနံၤန့ၣ်လီၤ.
ပယီၤသုးခီၣ်သုးရ့ၣ်(ခလရ-၃၁)ပွဲး(၁၂၄၈) ပူၣ်လူၣ်တူၣ်သုးကလၢၤအံၤ ဖဲလါမးရှး ၁၄ သီအနံၤန့ၣ် ကညီဒီကလုၥ်တၢ်ထူၣ်ဖျဲး သုးမုၢ်ဒိၣ်(KNLA) သုးရ့ၣ်(၂၂),ကညီဒီကလုၥ်ဂၢၤသးကရၢ(KNDO)ဒီးတၢ်ပၢၢ်ဆၢသုးပၥ်ဖှိၣ်ကရူၢ်တဖၣ် ပၥ်ဖှိၣ်ထီၣ်သးထီၣ် ဒုးမၤန့ၢ်၀ဲခဲလၢၥ်န့ၣ်လီၤ.
လၢတၢ်ဒုးဘျီ၀ဲအံၤအပူၤန့ၣ် ပယီၤသုးသံအမဲၥ်ညါပယီၤသုးဃ့ၢ်ဖျိးထီၣ်၀ဲဆူကီၢ်ကၠီၣ်တဲၣ်တကပၤ(၁၁)ဂၤအကျါ ဘၣ်ဒိ၀ဲ(၃)ဂၤ န့ၣ်လီၤ. ဒီးပှၤသ့ၣ်တဖၣ်အံၤဖဲအဃ့ၢ်ထီၣ်အခါန့ၣ်စိၥ်ဃုၥ်၀ဲကျိ(၂)ခိၣ်,စုကွံၥ်မ့ၣ်ပိၢ်(၁)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်လံၥ် တၢ်ပၥ်ဖျါ အပူၤ ပၥ်ဖျါ၀ဲန့ၣ်လီၤ.
တကးဒံးဘၣ်အမဲၥ်ညါပူၣ်လူၣ်တူၣ်သုးကလၢၤတၢ်ဒုးဘျီ၀ဲအံၤအပူၤန့ၣ် တၢ်မၤန့ၢ်၀ဲကျိ,ကျိအဒၢ,ကျိဖးဒိၣ်အချံ, စုကွံၥ်မ့ၣ်ပိၢ်, ဟီၣ်လၥ် မ့ၣ်ပိၢ်ဃုၥ်ဒီးသုးတၢ်ပီးတၢ်လီလၢအဂၤအါမးအဂ့ၢ်န့ၣ် ထံၣ်ဘၣ်လၢခ့ၣ်အဲၣ်ယူၣ်တၢ်ဂီၤတၢ်ပၥ်ဖျါ အပူၤန့ၣ်လီၤ.
ဒ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤအသိးန့ၣ် တၢ်ဒုးဘျီ၀ဲအံၤန့ၣ် ဟီၣ်က၀ီၤတၢ်ပၢၢ်ဆၢသုးပၥ်ဖှိၣ်ကရူၢ်တကပၤ ဘၣ်ဒိ၀ဲ(၆)ဂၤဒီး ဘၣ်ဟ့ၣ်လီၤကွံၥ်အသးသမူလၢထံကီၢ်ဒီးပှၤကလုၥ်အဂီၢ်(၃)ဂၤ န့ၣ်လီၤ.
ပူၣ်လူၣ်တူၣ်သုးကလၢၤအံၤလၢတၢ်ကထီၣ်န့ၢ်၀ဲအဂီၢ်တၢ်ဆၢကတီၢ်တံၥ်တၥ်၀ဲလၢတလါဃၣ်ဃၣ်ညါဒီး ဒ်န့ၣ်အသိး စးထီၣ်ဖဲတၢ်စးထီၣ်လဲၤခးတုၤလၢအလီၤတစုန့ၣ် ပယီၤသုးမီၤစိရိၤအံၤသူ၀ဲကဘီယူၤ ဟဲခးလီၤတၢ်တပယူၥ်ခီအဃိ ဒူသ၀ီကမျၢၢ် လၢအိၣ်ဘူးဖဲတၢ်ခိၣ်တၢ်ဃၢၤ၀ဲန့ၣ်တဖၣ်ဘၣ်ဃ့ၢ်ထီၣ်၀ဲဆူကီၢ်ကၠီၣ်တဲၣ် တကပၤန့ၣ်လီၤ.
