လါမးၡး ၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,တီအူကီၢ်ရ့ၣ်(သုးက့-၂)ဟီၣ်ကဝီၤအပူၤဖဲမဟါတနံၤလါမးၡး(၈)သီအနံၤန့ၣ်ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ထီၣ်ဒုးမၤန့ၢ်ကွံၥ်ဝဲပယီၤသုးကလၢၤတဖျၢၣ်လၢအမ့ၢ်(သပၠ့ၣ်ညိး)သုးကလၢၤအံၤဒီးမၤန့ၢ်ဃုၥ်တၢ်စုကဝဲၤသ့ၣ်တဖၣ်အါအါဂီၢ်ဂီၢ်အဂ့ၢ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးဝဲၤလီၢ်ခိၣ်သ့ၣ်ထုးထီၣ်ပၥ်ဖျါဝဲဖဲတနံၤလါမးၡး(၉)သီအနံၤန့ၣ်လီၤ.
ပယီၤသုးကီၣ်ကးကလံၤထံးကီၢ်ခီသုးဝဲၤလီၢ်ခိၣ်သ့ၣ်အစုတီၤဖီလၥ်ခီၣ်သုးရ့ၣ် ခလရ-၇၃ လၢအမ့ၢ်(သပၠ့ၣ်ညိး)သုးကလၢၤအံၤက ညီဒီကလုၥ်တၢ်ထူးဖျဲးသုးမုၢ်ဒိၣ်(KNLA)တီခိၣ်ရိၣ်မဲဃုၥ်ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်တၢ်ထီၣ်မၤန့ၢ်ကွံၥ်ဝဲဖဲမဟါလါမးၡး(၈)သီအနံၤ,တၢ်မၤန့ၢ်ဃုၥ်ဒီးတၢ်စုကဝဲၤကျိချံပှၥ်သၣ်,သုးတၢ်ဖိတၢ်လံၤပီးလီသ့ၣ်တဖၣ်အါအါဂီၢ်ဂီၢ်အဂ့ၢ်ဒ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
ဖဲတၢ်ထီၣ်မၤန့ၢ်ပယီၤသုး(သပၠ့ၣ်ညိး)သုးကလၢၤဘျီဝဲအံၤအဆၢကတီၢ်န့ၣ်တၢ်စုကဝဲၤ,ကျိချံပှၥ်သၣ်ဒီးသုးတၢ်ပီးတၢ်လီလၢတၢ်မၤန့ၢ်အီၤသ့ၣ်တဖၣ်န့ၣ်ဒ်တၢ်ပၥ်ဖျါထီၣ်ဝဲတၢ်ဂီၤပူၤအသိးန့ၣ်တၢ်မၤန့ၢ်ဝဲတၢ်စုကဝဲၤကျိ(၅)ခိၣ်, ကျိဖိကျိဖးဒိၣ်အချံသ့ၣ်တဖၣ်ဒီးသုးတၢ်ပီး တၢ်လီစဲး,မ့ၣ်ပိၢ်သ့ၣ်တဖၣ်အဂ့ၢ်န့ၣ်ပၥ်ဖျါထီၣ်ဝဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိး(သပၠ့ၣ်ညိး)ပယီၤသုးကလၢၤဝဲအံၤန့ၣ်အိၣ်ဆီလီၤအသးဖဲတီအူကီၢ်ရ့ၣ်(သုးက့-၂),ဒီၣ်ဖးခိၣ်ကီၢ်ဆၣ်ဟီၣ်ကဝီၤအပူၤဒီးဖဲ တၢ်ထီၣ်ဒုးသုးကလၢၤအံၤအဆၢကတီၢ်ပယီၤသုးတကပၤသံအဂၤ(၁၀)အမဲၥ်ညါဃ့ၢ်ထူၣ်ဖျဲးထီၣ်အသးအိၣ်ဝဲအဂၤ(၂၀)ဘျဲၣ်စ့ၢ်ကီးအဂ့ၢ်တၢ်ကစီၣ်သန့သ့ၣ်တဖၣ်ပၥ်ဖျါစ့ၢ်ကီးဝဲန့ၣ်လီၤ.
လၢန့ၣ်အမဲၥ်ညါဖဲတနံၤအံၤလါမးၡး(၉)သီအနံၤအံၤစ့ၢ်ကီးန့ၣ်လၢတီအူကီၢ်ရ့ၣ်,ထီတထူၣ်ကီၢ်ဆၣ်ဟီၣ်ကဝီၤအပူၤပယီၤသုး(ကီၤသ့ဒၢ)သုးကလၢၤအပှၤသ့ၣ်တဖၣ်လဲၤဆှၢန့ၢ်ဝဲတၢ်အီၣ်တၢ်အီဒီးသုးပီးလီဆူအပှၤ(နီစိ)သုးကလၢၤအအိၣ်အဆၢကတီၢ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO)ဃုၥ်ဒီး(PDF)သ့ၣ်တဖၣ်ခိးခးဝဲအဂ့ၢ်သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိခံခီခံကပၤတၢ်ဒုးကဲထီၣ်ဝဲဖဲတချုးတုၤ(နီစိ)ပယီၤသုးကလၢၤဒီး(ခုၣ်လၢၢ်ဒၢ)သဝီအဘၢၣ်စၢၤဝံၤပယီၤသုးအပှၤသ့ၣ်တဖၣ်ဃ့ၢ်တမှံထီၣ်ကွံၥ်ဝဲဒီးတၢ်မၤန့ၢ်ဝဲပယီၤသုးအကျိ MA-3 ၁ ခိၣ်ဒီး MA-1 ၄ ခိၣ်အဂ့ၢ် ပရဲလိၥ်ကျိခဲၣ်ဖ့ထုးထီၣ်ပၥ်ဖျါဝဲဖဲ တနံၤအသိးသ့ၣ်ညါဘၣ်န့ၣ်လီၤ.
