လါမးရှး ၁၆ သီ, ၂၀၂၅ နံၣ်, ခ့ၣ်အဲးစံၣ်
(Shalom Arts and Leadership college-SALC)ကၠိလၢပညိၣ်ဃၥ်၀ဲဒ်သိးကၠိဖိတဖၣ်ကဒိးန့ၢ်ဘၣ်ပတီၢ်ထီတၢ်သ့တၢ်ဘၣ် တၢ်ကူၣ်ဘၣ်ကူၣ်သ့ဒီး အကံၢ်အစီကအိၣ်လၢတၢ်တီခိၣ်ရိၣ်မဲတကပၤအဂီၢ်အံၤန့ၣ် တနံၣ်အံၤ ၂၀၂၄-၂၀၂၅ တၢ်မၤလိနံၣ်အံၤအဂီၢ် ဒုးအိၣ်ဖျဲၣ်ထီၣ်ကဒီး၀ဲ ပှၤကၠိဖိ(၆၀)ဂၤ န့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲက၀ီၤအပူၤ ဖဲလါမးရှး ၁၅ သီ ဂီၤခီ ၁၀း၀၀ အဆၢကတီၢ် (SALC)မၤ၀ဲ ၁၂ ၀ီတ၀ီ နံၣ်ကတၢၢ်တၢ်ပျၢၢ်ကၠိမူးတၢ်ရဲၣ်တၢ်ကျဲၤအံၤဒီး တၢ်ပျၢ်ကၠိဘျီ၀ဲအံၤ ပှၤကၠိဖိလၢအဖျိ ထီၣ်၀ဲ(Bachelor of Arts-BA)န့ၣ် (၂၀)ဂၤ ,ဖျိထီၣ်(Higher secondary Division-HSD) ၃၇ ဂၤ, (SCI-Shalom Computer Institute) န့ၣ်ဖျိထီၣ်၀ဲ(၃)ဂၤ စုၥ်စုၥ်န့ၣ် လီၤ.
တၢ်ပျၢ်ကၠိမူးတၢ်ရဲၣ်တၢ်ကျဲၤလၢဟဲတုၤဃီၤ၀ဲတဘျီအံၤ လၢတၢ်ကီတၢ်ခဲအကလုၥ်ကလုၥ်ဖျိထီၣ်အဖီခိၣ်အံၤန့ၣ် တၢ်တူၢ်ဘၣ် အိၣ်ဒ်လဲၣ်ဒီးခါဆူမဲၥ်ညါအတၢ်တိၥ်ပၥ်တၢ်ရဲၣ်တၢ်ကျဲၤအိၣ်ဒ်လဲၣ်အဂ့ၢ်န့ၣ် ကၠိဖိမုၣ် နီၢ်အဲမ်လံၤလၢအဖျိထီၣ်၀ဲ(BA)အံၤတဂၤ စံး၀ဲဒ်အံၤ န့ၣ်လီၤ.
“ခဲအံၤဒုယသးခုဒိၣ်မးလီၤ.တၢ်လွံၢ်နံၣ်အတီၢ်ပူၤအံၤယမၤလိဘၣ်တၢ်ကူၣ်ဘၣ်ကူၣ်သ့ဖဲအံၤန့ၣ်ယတူၢ်ဘၣ်လၢယဒိၣ်ထီၣ်ဘၣ်ဖဲလီၤမီၤနီၤ.အဃိယပၥ်ကဖၢလၢလီၤဘၣ်ယသးဒိၣ်မး.ကၠိတဖျၢၣ်အံၤအမၤလိပှၤတၢ်ခဲလၢၥ်လီၤမီၤနီၤ.အဃိယစံးဘျုးဘၣ်ပှၤကိးဂၤဒဲးလီၤ.ခါဆူညါလၢယကထီၣ်ဆဲးကၠိအဂီၢ်တအိၣ်ဘၣ်ခီဖျိယဃုပှၤလၢအဆှၢယၤတအိၣ်ဘၣ်အဃိမီၤနီၤ.ယဆိမိၣ်ယကဖီၣ်တၢ်မၤ (မ့တမ့ၢ်)ယကဟဲက့ၤသိၣ်လိက့ၤတၢ်ဖဲအံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
ဒ်န့ၣ်အသိးလၢတၢ်ပျၢ်ကၠိဘျီ၀ဲအံၤထံၣ်ဘၣ်ပှၤကၠိဖိဖျိထီၣ်အံၤသူၣ်မံသးမံဒိၣ်မးဒီးခါဆူမဲၥ်ညါစ့ၢ်ကီးတၢ်ခွဲးတၢ်ယၥ်မ့အိၣ်န့ၣ် ဆၢမုၢ်လၢ်လၢကဆဲးဃုသ့ၣ်ညါမၤလိဒံးတၢ်ဆူမဲၥ်ညါအဂ့ၢ်န့ၣ် (SALC)ကၠိခိၣ် သရၣ်စီၤ၀့လယၢၣ် ဆီၣ်တခူထီၣ်၀ဲပှၤကၠိဖိ သ့ၣ်တဖၣ် န့ၣ်လီၤ.
“ပထံၣ်ဘၣ်လၢပပှၤကၠိဖိစံၣ်လီၤကၠိမၤနၢၤတၢ်အံၤပသးခုဒိၣ်မးလီၤ.ပဟ့ၣ်ဂံၢ်ဟ့ၣ်ဘါစ့ၢ်ကီးအ၀ဲသ့ၣ်လၢမ့သ့န့ၣ်ကလဲၤဒံးဆူညါ. တၢ်ခွဲးတၢ်ယၥ်န့ၣ်ပအိၣ်ခိးအီၤန့ၣ်တဟဲဘၣ်.ပကဘၣ်မၤအိၣ်ထီၣ်န့ၢ်အီၤလီၤအဃိသးန့ၣ်သူၣ်စၢ်သးဘီၣ်သ့ၣ်တဖၣ်ကိးဂၤဒဲးန့ၣ် မ့ၢ်တၢ်ကစီၣ်လၢအဲၣ်ဒိးဒုးသ့ၣ်ညါသုန့ၣ်လီၤ”အဂ့ၢ်န့ၣ် စံး၀ဲန့ၣ်လီၤ.
တၢ်ပျၢ်ကၠိမူးတၢ်ရဲၣ်တၢ်ကျဲၤအပူၤန့ၣ် ကၠိသရၣ်ခိၣ်နၢ်ကတိၤဟ့ၣ်ဂံၢ်ဟ့ၣ်ဘါလီၤတၢ်, တၢ်ဟ့ၣ်လီၤက့ၤကၠိဖိလၢအဖျိ ထီၣ်သ့ၣ် တဖၣ်အံၤ အလံၥ်အုၣ်သး,ဟ့ၣ်လီၤပှၤကၠိဖိအဒိးန့ၢ်ဘၣ်နီၣ်ဂံၢ်(၁),နီၣ်ဂံၢ်(၂),နီၣ်ဂံၢ်(၃)ခိၣ်ဖးသ့ၣ်တဖၣ်အမဲၥ်ညါ တၢ်ရဲၣ်တၢ်ကျဲၤ အပူၤ အိၣ်၀ဲဒီးကၠိဖိတၢ်သူၣ်၀ံၣ်သးဆၢသ့ၣ်တဖၣ်န့ၣ်လီၤ.
တၢ်ပျၢ်ကၠိမူးတၢ်ရဲၣ်တၢ်ကျဲၤလၢတၢ်မၤ၀ဲဘျီအံၤန့ၣ် ကၠိဖိ,ကၠိပှၤဘၣ်မူဘၣ်ဒါ,မဲၢ်လးဒဲက၀ီၤခိၣ်နၢ်, ကညီဘၣ်ကီဘၣ်ခဲကမံးတံၥ် ခိၣ်နၢ်, ခိၣ်နၢ်ဘၣ်ထွဲပှၤဘၣ်မူဘၣ်ဒါလၢအဂၤဃုၥ်ဒီးကၠိဖိမိၢ်ပၢ်,ကမျၢၢ်ပၥ်ဖှိၣ်ဟဲထီၣ်၀ဲ(၄၀၀)ဃၣ်ဃၣ်န့ၣ်လီၤ.
(SALC)ကၠိအံၤ ဘၣ်တၢ်ဒုးအိၣ်ထီၣ်အီၤစးထီၣ်ဖဲ(၁၉၉၉)နံၣ်အခါဒီး မ့ပၥ်ဖှိၣ်စးထီၣ်အခါဖဲန့ၣ်တုၤဃီၤလၢတနံၣ်အံၤ(၂၀၂၄-၂၀၂၅) တၢ်မၤလိ နံၣ်အံၤတစုန့ၣ် ပှၤကၠိဖိဖျိထီၣ်အနီၣ်ဂံၢ်ပၥ်ဖှိၣ်ခဲလၢၥ်ကအိၣ်၀ဲအဂၤ(၁၀၀၀)ဃၣ်ဃၣ်လံအဂ့ၢ်န့ၣ် ကၠိပှၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤ.
