လါအ့ဖြ့ၣ် ၁၈သီ, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီးတရံးကီၢ်ဆၣ်ဒီးကြုၢ်တုကီၢ်ဆၣ် တီနီၢ်မုၢ်နုၥ်ဟီၣ်ကဝီၤပူၤ စးထီၣ်ကီးတရံးတုလီၤဆူကြုၢ်တု ကျဲဒီတဘိတၢ်ဒုးကဲထီၣ်ဒီးခီဖျိသုးကီၣ်ကးခးလီၤကျိဖးဒိၣ်,ဟဲခးလီၤတၢ်ဒီးကဘီယူၤအဃိ အပှၤကမျၢၢ်လၢအထိဘၣ်ဃ့ၢ်ပဒ့ၣ်ထီၣ်ကွံၥ်ဝဲလၢအနီၢ်ကစၢ်ဒူသဝီဒီးအခဲအံၤလိၣ်ဘၣ်ဝဲဒၣ်ဂ့ၢ်ဂီၢ်အူတၢ်ဆီၣ်ထွဲမၤစၢၤအဂ့ၢ် သ့ၣ်ညါဘၣ်လၢပှၤမၤစၢၤ ပှၤလီၢ်အိၣ်ကမှံဖိအပှၤဘၣ်မူဘၣ်ဒါအအိၣ်န့ၣ်လီၤ.
တကီၢ်ခါခဲအံၤ တီနီၢ်မုၢ်နုၥ်ဟီၣ်ကဝီၤ စးထီၣ်လၢကီးတရံးတုၤလီၤဆူ ကြုၢ်တု,ပှၤကမျၢၢ်လၢအကထိသ့ၣ်တဖၣ်ဘၣ်ဃ့ၢ်အိၣ်ကဒုဝဲဒၣ်လၢတၢ်လီၢ်အါတီၤဒီးလိၣ်ဘၣ်ဝဲဒၣ်တၢ်ဆီၣ်ထွဲမၤစၢၤအဖီခိၣ်အဝဲသ့ၣ်ကလဲၤနုၥ်လီၤမၤစၢၤဝဲဒၣ်အဂ့ၢ် လ့က့ၣ်ကိၥ်သးစၢ်ပှၥ်ဘျးစဲအပှၤဘၣ်မူဘၣ်ဒါတဂၤစံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤ.
အဝဲစံးဝဲလၢ“မဟါကၢၥ် ပှၤတီၣ်ဖျါထီၣ်လၢယအိၣ်န့ၣ်ဖးအါညါန့ၣ်လီၤ.ဟးအိၣ်လၢန့ၣ်(၃၀၀)အိၣ်,လၢအံၤ(၅၀၀)အိၣ်ဒီးအိၣ်ဒံးလၢတၢ်လီၢ်အါတီၤဒီးပှၤကညီနီၣ်ဂံၢ်န့ၣ်ကအိၣ်လၢအကထိန့ၣ်လီၤ.အပၣ်ဃုၥ်ဒီးပှၤလၢဝ့ၢ်ပူၤတနီၤ,လၢ(၅)တၢၣ်တနီၤပၣ်ခဲလၢၥ်လီၤ.လီၤဝဲဒၣ်ကီတရံးတီနီၢ်မုၢ်နုၥ်တုၤလီၤဝဲလၢြကုၢ်တုန့ၣ်လီၤ.အဃိန့ၣ်ပဒွးတချုးလၢၤဘၣ်.ဖဲတၢ်ဆီၣ်ထွဲမၤစၢၤလၢအိၣ်ဒီးပှၤအသိးန့ၣ်ပကလဲၤမၤစၢၤစိဝဲန့ၣ်လီၤ.ပှၤမၤစၢၤတၢ်မ့ၢ်န့ၢ်န့ၣ် အဝဲသ့ၣ်န့ၣ်လိၣ်ဘၣ်ဝဲဒၣ်တၢ်အီၣ်ဃ့ဒီးအခဲအံၤတၢ်စူၤလီၤအဃိအဝဲသ့ၣ်ဃ့ထီၣ်တၢ်အခိၣ်ဒုးတခါန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
တကီၢ်ခါခဲအံၤန့ၣ် သုးကီၣ်ကးအကျိဖးဒိၣ်ဒီးကဘီယူၤသ့ၣ်တဖၣ်ခးလီၤဝဲတၢ်လၢ မီဂီၤ,ညံၤညၤသၤလ့,ယွၤသ့ၣ်,နွါခၠၤကိ,နိၣ်ဖးဒိၣ်ဒီးကီးဝၣ်လဲၤသဝီသ့ၣ်တဖၣ်န့ၣ်ဟီၣ်ကဝီၤအိၣ်ဝဲအဖၢမုၢ်ဒီးပှၤကမျၢၢ်သ့ၣ်တဖၣ်ဘၣ်ဃ့ၢ်ပဒ့ၣ်သးအဂ့ၢ် သ့ၣ်ညါဘၣ်လၢ နိၣ်ဖးဒိၣ်ပှၤလီၢ်ကဝီၤဖိတဂၤအအိၣ်န့ၣ်လီၤ.
နိၣ်ဖးဒိၣ်ပှၤလီၢ်ကဝီၤဖိတဂၤစံးဝဲဒၣ်လၢ“တၢ်ဂုၤတၢ်ဂၤန့ၣ်တလိၣ်ဘၣ်.တၢ်အီၣ်တၢ်အီ အံသၣ်ညၣ်အုၣ်မ့ၢ်အိၣ်န့ၣ်ဘၣ်လီၤ. မ့ၢ်ဝံၤဒီးအခဲအံၤန့ၣ်ပစိၤအ့ၣ်တၢ်သပှၢ်န့ၣ်လီၤ.ပ့ၢ်ပီၤမ့ၢ်န့ၢ် န့ၣ်ဂ့ၤလီၤ.ဒီးပဃ့ၢ်ထီၣ်ခဲအံၤဘၣ်လၢတၢ်စူၤအဃိပမံတဘၣ်ဘၣ်.မူခိၣ်မ့တစူၤန့ၣ်ပမံလၢသ့ၣ်ခီၣ်ထံးဝၣ်ခီၣ်ထံးသ့ဒံး.အခဲအံၤဘၣ်ထံးဖှိၣ်လိၥ်သးဒီဒူၣ်ဒီးဘၣ်မံးဒ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ကီးတရံး-ကြုၢ်တု တၢ်ဒုးစးထီၣ်သးလၢလါအ့ဖြ့ၣ်(၁၅)သီအခါလံၤလံၤဒီးတၢ်ဒုးဆူၣ်ဒံးဝဲဒၣ်အဖၢမုၢ်အသိး သုးကီၣ်ကးတကပၤဟဲတ့ၢ်လီၤမ့ၣ်ပိၢ်ဒီးကဘီယူၤ ခးလီၤကျိဖးဒိၣ်လၢဒူသဝီလၢအဘူးတဖၣ်အိၣ်ဝဲတုၤခဲအံၤလီၤအဂ့ၢ်သ့ၣ်ညါဘၣ်လၢလီၢ်ကဝီၤဖိသ့ၣ်တဖၣ်အအိၣ်န့ၣ်လီၤ
ခီဖျိလၢသုးကီၣ်ကးခးလီၤတၢ်ဒီးကဘီယူၤဒ်အံၤအဃိ လီၢ်ကဝီၤကမျၢၢ်တစှၤန့ၣ်အဂၤ(၁၀)ဘၣ်သံဝဲအသိးဘၣ်ဒိဘၣ်ထံးဝဲဒၣ်အါအါကလဲၥ်အမဲၥ်ညါ တၢ်သိၣ်လိကၠိ,ကမျၢၢ်ဟံၣ်ဃီဒီး သီခါဖၠၣ်သ့ၣ်တဖၣ်စ့ၢ်ကီးဘၣ်ဟးဂူၥ်ဟးဂီၤအိၣ်ဝဲအါမးအဂ့ၢ်လီၢ်ကတီၤကမျၢၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါဖဲတနံၤအံၤဂီၤခီ(၈)နၣ်ရံၣ်အဆၢကတီၢ်န့ၣ် သုးကီၣ်ကးဟဲတ့ၢ်လီၤမ့ၣ်ပိၢ်ဖဲ ကြုၢ်တုကီၢ်ဆၣ် သလွဲထီၤသဝီအဃိကမျၢၢ်ဘၣ်သံတဂၤအသိးတၢ်ဘၣ်ဒိဘၣ်ထံးအိၣ်စ့ၢ်ကီးဝဲအဂ့ၢ် သ့ၣ်ညါဘၣ်န့ၣ်လီၤ.
