လါအ့ဖြ့ၣ် ၁၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ သုးကီၣ်ကးအပှၤဘၠူၣ်စီထံ (ဗျူစောထီး) ၅ ဂၤလၢ တၢ်ဖီၣ်န့ၢ်၀ဲဖဲ(ကင်မွန်းချောင်း)သ၀ီဃၢၤအံၤ ဒ်သုးတၢ်သိၣ်တၢ်သီအိၣ်၀ဲအသိးတၢ်ကဟံထီၣ် ဖီၣ်ထီၣ်ဂ့ၢ်၀ီအဂ့ၢ်န့ၣ် သုးက့ခိၣ် စံး၀ဲန့ၣ်လီၤ.
ဖဲလါအ့ဖြ့ၣ် ၁၅ သီ မုၢ်ဃ့ၢ်လီၤကဘၣ်ဖဲ ၂ နၣ်ရံၣ်ဃၣ်ဃၣ်အဆၢကတီၢ်န့ၣ် ပှၤ(၄၈)ဂၤလၢအိၣ်ဟဲလၢချၢၣ်လွံၢ်ထူၣ်ကီၢ်ရ့ၣ်(သုးက့ ၃) တကပၤအံၤ လၢကဟဲထီၣ်ဘါဃိၣ်ဆူကၠဲၣ်ထံယိဃိၣ်အဂီၢ် ဖဲအဟဲတုၤဖဲ(ကင်မွန်းချောင်း)ဃၢၤ အီၣ်မ့ၤဖဲ(ကဒက်ချောင်း) (ဝါဆိုမိုး) တၢ်အီၣ်ကျးလီၢ်အခါန့ၣ် ဟီၣ်က၀ီၤ(PDF)နုၥ်လီၤဖီၣ်၀ဲဒၣ်န့ၣ်လီၤ.
ပှၤ(၄၈)ဂၤအံၤဖဲအဟဲထီၣ်အခါဒိးန့ၢ်ဃၥ်တၢ်ကစီၣ်ဒီးအသိလ့ၣ်နီၣ်ဂံၢ်လီၤတံၢ်လီၤဆဲးလီၤအသိး အ၀ဲသ့ၣ်န့ၣ်တမ့ၢ် ကမျၢၢ်ခဲလၢၥ် ဘၣ်အကျါ(၅)ဂၤန့ၣ်မ့ၢ်၀ဲသုးကီၣ်ကးအပှၤဘၠူၣ်စီထံအဃိဘၣ်တၢ်ဖီၣ်တ့ၢ်ဃၥ်၀ဲဒီးပှၤလၢအဂၤတဖၣ်တၢ်ပျၢၢ် လီၤက့ၤ၀ဲတနံၤ ဃီဖဲန့ၣ်လီၤ.ဘၣ်ဘၣ်ပှၤ(၅)အံၤဒ်တၢ်သိၣ်တၢ်သီအိၣ်အသိးတၢ်ကဟံအရ့အဂ့ၢ်န့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤလီၤ.
“အ၀ဲသ့ၣ်န့ၣ်အိၣ်လၢချၢၣ်လွံၢ်ထူၣ်,ကဟဲဘါဃိၣ်ဟဲတုၤလဲၤအီၣ်မ့ၤလၢတၢ်အီၣ်ကျးပူၤမီၤနီၤ.ပဒိးန့ၢ်ဃၥ်တၢ်ကစီၣ်လၢပၣ် ဃုၥ်ဒီး ပယီၤအပှၤဘၠူစီထံ(၅)ဂၤ.မ့မ့ၢ်လၢပှၤအဂၤတဖၣ်န့ၣ်ပှၤပျၢ်က့ၤအီၤခဲလၢၥ်.ပှၤပျၢ်က့ၤတနံၤဃီန့ၣ်လီၤ.ပှၤ(၅)အံၤ မ့ၢ်လၢအကဲ ဘၠူၣ်စီထံအဃိ ပကဘၣ်ဟံထီၣ်ဖီၣ်ထီၣ်အရ့.၀ံၤဒီးအ၀ဲသ့ၣ်စ့ၢ်ကီးအၢၣ်လီၤသးစ့ၢ်လီၤ.အ၀ဲသ့ၣ်န့ၣ်ကမ့ၢ်အဟဲဃုသ့ၣ်ညါတၢ် လီၤ”အဂ့ၢ်န့ၣ် စံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤ သုးကီၣ်ကးတကပၤစံး၀ဲလၢ ကမျၢၢ်ပိၥ်ခွါ(၂၅)ဂၤဒီး ပိၥ်မုၣ်(၂၃)ဂၤသ့ၣ်တဖၣ်အံၤ ဟဲ၀ဲဒၣ်လၢကလဲၤထီၣ် ဘါဃိၣ်လၢကၠဲၣ်ထံယိဃိၣ်အဂီၢ်လီၤအသိးဖဲအဟဲတုၤအီၣ်မ့ၤဖဲ(က့ၤမိခၠီ) ကဒဲၣ်ခၠီတၢ်အီၣ်ကျးအံၤအခါ (PDF)ဖီၣ်ဒီးတီၣ်၀ဲလၢ (Light Truck)သိလ့ၣ်ခံခိၣ်အပူၤလၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် သုးကီၣ်ကးထုးထီၣ်ပၥ်ဖျါ၀ဲဖဲမဟါလါအ့ဖြ့ၣ် ၁၇ သီ အနံၤန့ၣ်လီၤ.
တကတီၢ်ဃီမုၢ်ဆ့ၣ်ထီၣ်လါအ့ဖြ့ၣ် ၁၆ သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ် ပှၤ(၄၈)ဂၤအကျါ(၄၃)ဂၤန့ၣ် လၢ၀့ကးသ၀ီအံၤတဆီတၢ်ဖီၣ်က့ၤကိး၀ဲဆူပကိကီၢ်ခီဒိၣ် ဆီထံးကီၢ်ဆၣ်တကပၤဘၣ်ဆၣ် မ့မ့ၢ်ပှၤအဂၤ(၅)န့ၣ်တၢ်ဖီၣ်က့ၤကိး၀ဲ လီၤလီၤဆီဆီအဂ့ၢ်န့ၣ် သုးကီၣ်ကးလံၥ်တၢ်ပၥ်ဖျါအပူၤ စံး၀ဲန့ၣ်လီၤ.
ဒ်(PDF)ပှၤဘၣ်မူဘၣ်ဒါစံး၀ဲအသိးန့ၣ် သုးကီၣ်ကးအပှၤ(၅)ဂၤလၢတၢ်ဖီၣ်တ့ၢ်၀ဲခဲအံၤတဖၣ် ဖဲတၢ်သမံသမိးအ၀ဲသ့ၣ်အခါန့ၣ် လၢချၢၣ်လွံၢ်ထူၣ်ကီၢ်ရ့ၣ်ဟီၣ်က၀ီၤအပူၤ မ့ၢ်ပှၤသ့ၣ်တဖၣ်လၢလုၢ်သ့ၣ်ခါပတၥ်မၤကမၣ်၀ဲပှၤဂ့ၢ်၀ီခွဲးယၥ်ဒိၣ်ဒိၣ်မုၢ်မုၢ်ဒ်အမ့ၢ် ဆၢတံၢ်ဒွဲၣ်အူအီၣ်၀ဲကမျၢၢ်ဟံၣ်ဖိဃီဖိတဒူၣ်ကဲထီၣ်တ့ၢ်၀ဲအိၣ်အဂ့ၢ်န့ၣ် စံး၀ဲန့ၣ်လီၤ.
အဃိတၢ်ဂ့ၢ်တၢ်ကျိၤလၢသုးကီၣ်ကးအလံၥ်တၢ်ပၥ်ဖျါအပူၤစံး၀ဲလၢပှၤသ့ၣ်တဖၣ်အံၤမ့ၢ်၀ဲကမျၢၢ်ကိးဂၤဒဲးတၢ်ဂ့ၢ်အံၤ တမ့ၢ်တၢ်မ့ၢ်တၢ်တီဘၣ်အသိး ဘၣ်ဃးတၢ်ဂ့ၢ်အံၤတၢ်ရဲၣ်တၢ်ကျဲၤအိၣ်စ့ၢ်ကီးလၢကထုးထီၣ်ပၥ်ဖျါ၀ဲလံၥ်တၢ်ပၥ်ဖျါတဘ့ၣ် အဂ့ၢ်န့ၣ် ဟီၣ်က၀ီၤ(PDF)ပှၤဘၣ်မူဘၣ်ဒါ စံး၀ဲန့ၣ်လီၤ.
ဒ်န့ၣ်အသိးတကီၢ်ခါခဲအံၤသုးကီၣ်ကးအပှၤဘၠူၣ်စီထံလၢတၢ်ဖီၣ်န့ၢ်၀ဲ(၅)ဂၤအံၤတၢ်ပၢၤဃၥ်အ၀ဲသ့ၣ်လၢဟီၣ်က၀ီၤတၢ်ဘံၣ်တၢ်ဘၢအလီၢ်တတီၤအဂ့ၢ်န့ၣ် သ့ၣ်ညါဘၣ်လၢသုးက့ပှၤဘၣ်မူဘၣ်ဒါအအိၣ်န့ၣ်လီၤ.
