လါအ့ဖြ့ၣ် ၂၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲမဟါတနံၤဃီအတီၢ်ပူၤ ပယီၤသုးခးလီၤကျိဖးဒိၣ်အဃိ ကမျၢၢ်ဘၣ်ဒိ(၃)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲမဟါလါအ့ဖြ့ၣ် ၂၄ သီ မုၢ်ထူၣ်(၁၂)နၣ်ရံၣ်အဆၢကတီၢ်န့ၣ် တၢ်ဒုးကဲထီၣ်တအိၣ်ပယီၤသုးခးလီၤ(၁၂၀ မမ)ကျိဖးဒိၣ် ၃ဖျၢၣ် ဆူခရၢၢ်ကရူၢ် ခရၢၢ်သ၀ီဃၢၤအဃိ ကျိဖးဒိၣ်အက့အခီဘၣ်၀ဲကမျၢၢ်(၂)ဂၤ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤ စံး၀ဲန့ၣ်လီၤ.
ဒ်န့ၣ်အသိးတနံၤဃီတကတီၢ်ဃီဖဲမုၢ်ထူၣ် ၁၂း၀၀ နၣ်ရံၣ်အဆၢကတီၢ်အံၤန့ၣ် ပယီၤသုးတြိၤ(၄၄)သုး၀ဲၤလီၢ်ခိၣ်သ့ၣ် ခးလီၤစ့ၢ်ကီး ကျိဖးဒိၣ်တဖျၢၣ်လီၤတဲၥ်ပိၢ်ဖးထီၣ်၀ဲလၢအံလူၢ်ကရူၢ် ကရၣ်၀့ဆ့ၣ်သ၀ီဃၢၤအဃိ ကမျၢၢ်ဘၣ်ဒိ(၁)ဂၤဒီး တၢ်ကဲထီၣ်သး၀ံၤ တဟါဃီ ဖဲန့ၣ် ခးလီၤကဒီး၀ဲကျိဖးဒိၣ်(၃)ဖျၢၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါလၢအဂၤတဂၤ စံး၀ဲန့ၣ်လီၤ.
“မဟါဖဲ ၁၂ နၣ်ရံၣ်တီတီန့ၣ် ဖဲအံလူၢ်ကရူၢ် ကရၣ်၀့စ့ၣ်န့ၣ် ကျိဖးဒိၣ်လီၤတဲၥ်တဖျၢၣ် ကမျၢၢ်ဘၣ်ဒိတဂၤ. မ့၀ံၤဖဲဟါခီ ၆း၀၈ မံးနံးန့ၣ် ကွံၥ်စိဃီၤကျိဖးဒိၣ်တဖျၢၣ်, ၇း၁၄ မံးနံးန့ၣ်ကွံၥ်လီၤကဒီး၀ဲတဖျၢၣ်. ၇း၅၀ မံးနံးန့ၣ်ကွံၥ်ကဒီး၀ဲတဖျၢၣ် ကွံၥ်စိ၀ဲ(၃)ဖျၢၣ် ဆဲးတဲးဖဲမနၤန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါဖဲတနံၤအံၤလါအ့ဖြ့ၣ် ၁၅ သီ မုၢ်ဃ့ၢ်လီၤ ၁း၀၀ နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး လၢခရၢၢ်ကရူၢ်အပူၤ ပယီၤသုးခးလီၤကဒီးကျိဖးဒိၣ်တဖျၢၣ်ကဲထီၣ်ဒံး၀ဲအဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါအ့ဖြ့ၣ် ၂၁ သီအနံၤစ့ၢ်ကီး လၢကၠဲးထိၣ်-ဘံလ့ကျဲဘၢၣ်စၢၤ အံလူၢ်ဒိၣ်,အံလူၢ်ဖိသ၀ီန့ၣ် (PDF)နုၥ်လီၤခး၀ဲပယီၤသုး တဘျီဒီး(KNLA)အပှၤအိၣ်ခိးခး၀ဲပယီၤသုးသိလ့ၣ်လၢဟဲထီၣ်လၢပကိတကပၤ ကဲထီၣ်ဒံး၀ဲဒၣ် န့ၣ်လီၤ.
ကၠဲးထိၣ်ကီၢ်ဆၣ် စှၤသီအတီၢ်ပူၤအံၤ ပယီၤသုးကလၢၤတဖၣ်တဖၣ်တၢ်ဒုးကဲထီၣ်အိၣ်ဂ့ၤတအိၣ်ဂ့ၤခးလီၤကျိဖးဒိၣ် တလီၢ်လီၢ်အဃိ ကမျၢၢ်သ့ၣ်တဖၣ်ဘၣ်လဲၤက့ၤဖံးမၤ,ဟးထီၣ်က့ၤလီၤအိၣ်လၢတၢ်ပလီၢ်ပဒီတၢ်ပျံၤတၢ်ဖုးပူၤအဂ့ၢ်န့ၣ် လီၢ်က၀ီၤပှၤဘၣ်မူ ဘၣ်ဒါစံး၀ဲန့ၣ်လီၤ.
